ᒨᓯᓯ ᓯᑕᒪᖏᑦ 4
4
ᑯᕼᐋᑎᐅᑉ ᐃᕐᓂᖏᑕ ᐱᔭᒃᓴᖏᑦ
1ᐊᑕᓂᖅ ᒨᓯᓯᒧᑦ ᐂᕉᓂᒧᓪᓗ ᐅᖃᕐᐳᖅ, 2“ᑯᕼᐋᑎᐅᑉ ᐃᕐᓂᖏᑦ ᓈᓴᓚᐅᒃᑭᑦ ᓕᕔᑎᑦ ᑭᖑᕚᖏᓐᓂᑦ ᐱᓯᒪᔪᑦ, ᐃᓚᒌᑦ ᐃᓛᒃᑰᕐᑎᓪᓗᒋᑦ, ᓯᕗᓕᕕᓂᖏᑕᓗ ᐃᓚᒌᖕᓂᖏᑦ ᒪᓕᒡᓗᒋᑦ. 330ᓂᒃ ᐊᕐᕌᒍᓕᖕᓂᑦ ᐱᒋᐊᕐᓗᒋᑦ ᐊᖓᔪᒃᓰᓪᓗ 50ᓂᒃ ᐊᕐᕌᒍᓖᑦ ᑎᑭᓪᓗᒋᑦ, ᐱᔨᑦᓯᕐᓂᕐᒧᑦ ᐱᓇᓱᐊᕈᓐᓇᕐᑐᓕᒫᑦ ᑐᐱᕐᔪᐊᒥ ᑲᑎᒪᕕᖕᒥ. 4ᐃᒫᒃ ᑕᕝᕙ ᑯᕼᐋᑎᐅᑉ ᐃᕐᓂᖏᑦ ᐱᔨᑦᓯᕐᓂᐊᕐᐳᑦ ᑐᐱᕐᔪᐊᒥ ᑲᑎᒪᕕᖕᒥ, ᐃᑦᔪᕐᓁᓐᓂᕐᐹᓂᒃ ᐱᓇᓱᐊᕐᑎᐅᓪᓗᑎᒃ.
5“ᐃᓅᖃᑎᒌᒡᔪᐊᑦ ᐊᐅᓪᓚᕐᓂᐊᕐᓗᑎᒃ ᐸᕐᓇᓕᕌᖓᑕ, ᐂᕉᓂ ᐃᕐᓂᖏᓪᓗ ᐃᑎᖃᑦᑕᕐᓂᐊᕐᐳᑦ ᐅᓕᒡᔪᐊᖅ ᑖᓗᑕᖅ ᐲᕆᐊᖃᕐᐹᑦ ᐃᒃᓯᕐᕕᒡᓗ ᐊᖏᕈᑎᑕᓕᒃ ᑖᑦᓱᒥᖓ ᐅᓕᒡᓗᒍ. 6ᐆᒪᔪᕕᓃᓪᓗ ᐹᑦᔪᕆᒥᒃ ᐊᑎᓖᑦ ᐊᒥᖏᓐᓂᒃ ᐅᓕᓕᐊᕆᓯᒪᔪᓂᒃ ᐅᓕᒡᓗᒍ, ᖄᓕᒫᖓᓗ ᐅᓕᒡᓗᒍ ᖃᓪᓗᓈᕐᑕᒥᒃ ᑐᖑᔪᕐᑐᒥᒃ; ᐊᑭᕋᐅᑎᖏᓪᓗ ᑕᑭᔪᑦ ᐃᓕᓗᒋᑦ.
7“ᓂᕐᕆᕕᒃ ᓂᐊᖂᔭᓂᒃ ᑕᑯᔭᒃᓴᖃᕐᕕᒃ ᐅᓕᒃᑕᒃᓴᕆᕚᑦ ᖃᓪᓗᓈᕐᑕᒥᒃ ᑐᖑᔪᕐᑐᒥᒃ, ᖄᖓᓄᓪᓗ ᐃᓕᓗᒋᑦ ᐴᒍᑍᓪᓗ ᐸᓕᐊᓪᓗ, ᐅᐊᓴᕐᕖᓪᓗ ᐃᒪᖃᐅᑏᓪᓗ; ᓂᐊᖂᔧᓪᓗ ᑕᑯᔭᒃᓮᑦ ᖄᖓᓄᑦ ᐃᓕᓗᒋᑦ. 8ᑖᒃᑯᐊ ᖄᖓᒍᑦ ᐅᓕᒋᐊᖃᕐᐰᑦ ᖃᓪᓗᓈᕐᑕᒥᒃ ᐊᐅᐸᓪᓚᕆᒃᑐᒥᒃ, ᖄᖓᒍᓪᓗ ᐅᓕᒡᓗᒋᑦ ᐆᒪᔪᐃᑦ ᐹᑦᔪᕆᒥᒃ ᐊᑎᓖᑦ ᐊᒥᖏᓐᓂᒃ; ᐊᑭᕋᐅᑎᖏᓪᓗ ᑕᑭᔪᑦ ᐃᓕᓗᒋᑦ.
9“ᖃᓪᓗᓈᕐᑕᒥᒃ ᑐᖑᔪᕐᑐᒥᒃ ᐱᔭᕆᐊᖃᕐᐳᑦ ᓇᓂᕈᐊᒃᑯᕖᓪᓗ ᖃᐅᒻᒪᖅᑯᑎᖃᕐᕖᑦ ᐅᓕᒡᓗᒋᑦ, ᖃᐅᒻᒪᖅᑯᑏᑦ ᐊᑕᓗᑎᒃ, ᒪᓂᖓᑕᓗ ᐋᖅᑭᒋᐊᕈᑎᖏᑦ ᐱᖃᓯᐅᑎᓗᒋᑦ, ᐊᓪᓕᕋᖏᓪᓗ, ᐅᕐᓱᖃᕐᕕᓕᒫᖏᓪᓗ, ᐅᕐᓴᒃᓴᕆᐊᖃᖃᑦᑕᕐᑕᑎᒃ. 10ᐅᓖᑦ ᐆᒪᔪᑦ ᐹᑦᔪᕆᐅᑉ ᐊᒥᖏᑕ ᖄᖏᓐᓄᑦ ᐃᓕᔭᕆᐊᖃᕐᐰᑦ ᓱᓇᒃᑯᑖᖏᓪᓗ, ᐃᓕᓗᒋᓪᓗ ᐊᑭᕋᐅᑎᖏᖕᓄᑦ.
11“ᑐᓂᕐᕈᓯᕐᕕᒃ ᒎᓘ ᐅᓕᒋᐊᖃᕐᐹᑦ ᖃᓪᓗᓈᕐᑕᒥᒃ ᑐᖑᔪᕐᑕᒥᒃ, ᖄᖓᒍᑦ ᐆᒪᔪᐃᑦ ᐹᑦᔪᕆᑦ ᐊᒥᖏᓐᓂᒃ ᐅᓕᒡᓗᒋᑦ; ᐊᑭᕋᕐᕕᖏᓪᓗ ᑕᑭᔪᑦ ᐃᓕᓗᒋᑦ. 12ᓱᓇᒃᑯᑖᓪᓗ ᐃᑦᔪᕐᓁᑦᑐᕕᖕᒥ ᐱᔨᑦᓯᕐᓂᕐᒧᑦ ᐊᑐᕐᑕᐅᓲᑦ, ᖃᓪᓗᓈᕐᑕᒧᑦ ᑐᖑᔪᕐᑐᒧᑦ ᐴᕐᓗᒋᑦ, ᐅᓕᒡᓗᒋᓪᓗ ᐆᒪᔪᐃᑦ ᐹᑦᔪᕆᑦ ᐊᒥᖏᓐᓄᑦ, ᐊᑭᕋᐅᑎᒧᓪᓗ ᐃᓕᓗᒋᑦ. 13ᐊᕐᔭᓕᓃᓪᓗ ᑐᓂᕐᕈᓯᕐᕕᐅᑉ ᖄᖓᓂᑦ ᐲᔭᕐᑕᐅᔭᕆᐊᖃᕐᐳᑦ, ᐅᓕᒡᓗᒍᓗ ᐊᐅᐸᓪᓚᕆᒃᑐᒥᒃ. 14ᖄᖓᓄᓗ ᐃᓕᓗᒋᑦ ᓱᓇᒃᑯᑖᑦ ᑕᕝᕙᓂ ᐱᔨᑦᓯᕐᑐᒧᑦ ᐊᑐᕐᑕᐅᓲᑦ ᐊᓪᓕᕅᓪᓗ ᐃᑯᒪᔪᒃᑯᕖᑦ, ᓂᕿᒥᒡᓗ ᑲᐳᒻᒥᑖᕈᑏᑦ, ᖃᓗᕋᐅᑏᓪᓗ, ᐅᐊᓴᕐᕖᓪᓗ, ᑐᓂᕐᕈᓯᕐᕕᖕᒥᓗ ᓱᓇᑐᐃᓐᓁᑦ ᐊᑐᕐᑕᐅᓲᑦ ᐅᓕᒃᑕᐅᔭᕆᐊᖃᕐᐳᑦ ᐆᒪᔪᐃᑦ ᐹᑦᔪᕆ ᐊᒥᖏᓐᓂᒃ ᐊᑭᕋᐅᑎᖏᓪᓗ ᐃᓕᓗᒋᑦ. 15ᐂᕉᓂ ᐃᕐᓂᖏᓪᓗ ᐃᑦᔪᕐᓁᑦᑐᕕᖕᒥᐅᑍᑦ ᐃᓗᓕᓕᒫᖏᓪᓗ ᐅᓕᒃᑐᕇᕐᐸᒋᑦ, ᑕᖕᒫᕐᓯᒪᔪᓗ ᐸᕐᓇᒌᕐᐸᑕ, ᑕᕝᕙ ᑯᕼᐋᑎᐅᑉ ᐃᕐᓂᖏᑦ ᑖᒃᑯᓂᖓ ᐊᒃᔭᕐᓯᔭᕐᑐᕆᐊᖃᓕᕐᐳᑦ; ᐃᑦᔪᕐᓁᑦᑐᓂᒡᓕ ᓇᓪᓕᐊᓐᓂᒃ ᐊᒃᑐᐃᒋᐊᖃᓐᖏᓚᑦ, ᑐᖁᔪᖃᑐᐃᓐᓇᕆᐊᖃᕐᒪᑦ.
“ᑖᒃᑯᐊ ᑕᕝᕙ ᑐᐱᕐᔪᐊᒥᑦ ᑲᑎᒪᕕᖕᒥᑦ ᐱᓯᒪᔪᑦ ᑯᕼᐋᑎᐅᑉ ᐃᕐᓂᖏᑕ ᐊᒡᔭᕆᐊᖃᕐᑕᖏᑦ.
16“ᐃᓕᓯᕆᐅᓪᓕ ᐂᕉᓂᐅᑉ ᑐᓂᕐᕈᓯᕐᑎᑦᓯᔨᐅᑉ ᐃᕐᓂᖓᑕ ᐱᔭᒃᓴᖓ ᖃᐅᒻᒪᖅᑯᑏᑦ ᐅᕐᓱᒃᓴᖓᓂᒃ ᑲᒪᔨᐅᓗᓂ, ᐳᔫᕐᑎᑕᒐᕐᒥᒡᓗ ᑎᐱᑦᓯᐊᕆᒃᑐᒥᒃ, ᓂᐊᖂᔭᒃᓴᒥᒡᓗ ᖃᐅᑕᒫᑦ ᑐᓂᕐᕈᑕᐅᔭᕆᐊᖃᕐᑐᒥᒃ, ᐅᕐᓱᒥᒡᓗ ᒥᖑᐊᕐᓯᑦᔪᑕᐅᕙᒃᑐᒥᒃ, ᑐᐱᕐᔪᐊᕐᓗ ᑲᑎᒪᕕᒃ ᑕᒪᕐᒥᒃ ᐃᓗᓕᖏᓪᓗ ᖃᐅᔨᓴᕐᓗᓂᒋᑦ.”
17ᑕᕝᕙ ᐊᑕᓂᖅ ᒨᓯᓯᒧᑦ ᐂᕉᓂᒧᓪᓗ ᐅᖃᕐᐳᖅ ᐃᒫᒃ ᐅᖃᕐᓗᓂ: 18“ᐅᑦᔨᕐᑐᕆᑦᓯ, ᑯᕼᐋᑎᐅᑉ ᐃᕐᓂᖏᑦ ᓕᕔᑎᓂᑦ ᐊᕕᑕᐅᖁᓇᒋᑦ; 19ᑍᒤᓕᐅᕆᑦᓯᓕ ᑖᒃᑯᐊ ᐱᓪᓗᒋᑦ, ᐃᓅᖁᓪᓗᒋᑦ ᑐᖁᖁᓇᒋᑦ ᐃᑦᔪᕐᓁᓐᓂᕐᐹᑦ ᓴᓂᐊᓅᕋᓗᐊᕈᑎᒃ: ᐂᕉᓂᐅᑉ ᐃᕐᓂᖏᑕᓗ ᐃᑎᕐᓗᑎᒃ ᑎᓕᔭᕆᐊᖃᕐᐰᑦ ᐱᔨᑦᓯᕈᑎᒋᔭᕆᐊᖃᕐᑕᖏᓐᓂᒃ, ᐱᔭᒃᓴᖏᓐᓂᒡᓗ. 20ᐃᑎᕐᓗᑎᒡᓕ ᑕᑯᓐᓇᕆᐊᕐᑐᕆᐊᖃᓐᖏᓚᑦ ᐃᑦᔪᕐᓁᓐᓂᕐᐹᑦ ᐅᓕᒃᑐᕐᑕᐅᑎᓪᓗᒋᑦ, ᑐᖁᖁᓇᒋᑦ.”
ᒋᕐᓲᓂᐅᑉ ᐃᕐᓂᖏᑕ ᐱᔭᒃᓴᖏᑦ
21ᑕᕝᕙ ᐊᑕᓂᖅ ᒨᓯᓯᒧᑦ ᐅᖃᕐᐳᖅ ᐃᒤᓕᓪᓗᓂ: 22“ᐊᒻᒪᑦᑕᐅᖅ ᒌᕐᓲᓂᐅᑉ ᐃᕐᓂᖏᑦ ᓈᓴᒃᑭᑦ, ᓯᕗᓕᕕᓂᖏᑕ ᐃᓚᒌᖕᓂᖏᑦ ᒪᓕᒡᓗᒋᑦ, ᐃᒡᓗᒥᐅᖃᑎᒌᑦ ᒪᓕᒡᓗᒋᑦ. 23ᐊᕐᕌᒍᖃᕐᑐᑦ 30ᓂᒃ ᐊᖓᔪᒃᓰᓪᓗ, 50ᓂᒃ ᐊᕐᕌᒍᖃᕐᑐᑦ ᑎᑭᓪᓗᒋᑦ, ᓈᓴᕐᑍᓐᓇᕆᓗᒋᑦ, ᐱᔨᑦᓯᖃᑕᐅᔪᓐᓇᕐᑐᓕᒫᑦ, ᑐᐱᕐᔪᐊᒥ ᑲᑎᒪᕕᖕᒥ ᐱᓇᓱᐊᕈᓐᓇᕐᑐᑦ. 24ᐅᑯᐊ ᑕᕝᕙ ᒌᕐᓲᓁᑎᑦ ᐱᔨᑦᓯᕐᓂᖏᑦ ᐊᒡᔭᕐᓯᔭᕆᐊᖃᕐᓂᖏᓪᓗ: 25ᑖᒃᑯᐊ ᐊᒡᔭᕐᓯᔭᕆᐊᖃᕐᐳᑦ ᑐᐱᕐᔪᐊᑉ ᑖᓗᑕᖏᓐᓂᒃ, ᑐᐱᕐᔪᐊᒥᒡᓗ ᐴᕐᓯᒪᓗᓂ, ᖄᖃᕐᓗᓂ ᐹᑦᔪᕆᑦ ᐊᒥᖏᓐᓂᒃ, ᑐᐱᕐᔪᐊᓪᓗ ᑲᑎᒪᕕᐅᑉ ᐃᑎᕐᑕᕐᕕᖓᑕ ᑖᓗᑕᖓᓂᒃ. 26ᑐᕐᓲᖓᑕᓗ ᐃᑎᕐᑕᕐᕕᐅᑉ ᐅᒃᑯᐊᖓᓂᒃ, ᑐᕐᓲᖓᓂᓗ ᓂᕕᖓᔪᓂᒃ ᐊᕙᓗᐊᓃᑦᑐᓕᒫᓂᒃ, ᑐᓂᕐᕈᓯᕐᕕᐅᓪᓗ ᐊᕙᓗᐊᓃᑦᑐᓂᒃ, ᐃᐱᐅᑕᖏᓐᓂᒡᓗ, ᐱᐅᓴᐅᑎᖏᓐᓂᒡᓗ ᑕᒪᒃᑯᓂᖓᓕᒫᖅ ᓴᓇᓯᒪᔪᓂᒃ: ᑍᒫᒃ ᐱᔨᑦᓯᕈᑎᖃᕆᐊᖃᕐᐳᑦ. 27ᐂᕉᓂ ᐃᕐᓂᖏᓪᓗ ᐱᔭᒃᓴᖏᓐᓂᒃ ᑎᓕᓯᔭᕆᐊᖃᕐᐳᑦ ᒌᕐᓲᓂᐅᑉ ᑭᖑᕚᖏᑕ ᐃᕐᓂᖏᑕ ᐱᔭᒃᓴᖏᓐᓂᒃ, ᐱᓇᓱᐊᕆᐊᖃᕐᑕᖏᓐᓂᒃ ᐱᔨᑦᓯᕈᑎᒋᔭᕆᐊᖃᕐᑕᖏᓐᓂᒡᓗ; ᐃᕝᕕᓪᓗ ᑎᓕᔭᕆᐊᖃᕐᐸᑎᑦ ᐱᓕᕆᐊᕆᔭᕆᐊᖃᕐᑕᓕᒫᖏᓐᓂᒃ. 28ᑕᕝᕙ ᒌᕐᓲᓂᐅᑉ ᑭᖑᕚᖏᑕ ᐃᕐᓂᖏᑕ ᐱᔭᒃᓴᖏᑦ ᑐᐱᕐᔪᐊᒥ ᑲᑎᒪᕕᖕᒥ ᐱᔨᑦᓯᓂᕆᔭᕆᐊᖃᕐᑕᖏᑦ. ᐱᔭᒃᓴᒥᖕᓄᑦ ᐊᖓᔪᖅᑳᖃᕆᐊᖃᕐᐳᑦ ᐃᑕᒫᕐᒥᒃ ᐂᕉᓂᐅᑉ ᑐᓂᕐᕈᓯᕐᑎᑦᓯᔨᐅᑉ ᐃᕐᓂᖓᓂᒃ.”
ᒧᕋᐅᕆᐅᑉ ᑭᖑᕚᖏᑕ ᐃᕐᓂᖏᑕ ᐱᔭᒃᓴᖏᑦ
29“ᒥᕋᕆᐅᓪᓕ ᐃᕐᓂᖏᑦ ᓈᓴᕆᐊᖃᕆᕙᑎᑦ ᐃᒡᓗᒥᐅᖃᑎᒌᑦ ᐃᓚᒌᖕᓂᖏᑦ ᒪᓕᒡᓗᒋᑦ ᓯᕗᓕᕕᓂᖏᑕᓗ ᐃᓚᒌᖕᓂᖏᑦ ᒪᓕᒡᓗᒋᑦ. 30ᐊᕐᕌᒍᖃᕐᑐᑦ 30ᓂᒃ ᐱᒋᐊᕐᓗᒋᑦ 50ᓂᒃ ᐊᕐᕌᒍᖃᕐᑐᓄᑦ ᑎᑭᓪᓗᒋᑦ, ᓈᓴᕐᑍᓐᓇᕆᓗᒋᑦ, ᐱᔨᑦᓯᖃᑕᐅᔪᓐᓇᕐᑐᓕᒫᑦ, ᑐᐱᕐᔪᐊᒥ ᑲᑎᒪᕕᖕᒥ ᐱᓇᓱᐊᕈᓐᓇᕐᑐᑦ. 31ᐃᒤᑦᑐᓂᒡᓕ ᐊᒡᔭᕐᓯᔭᕆᐊᖃᕐᐳᑦ ᑐᐱᕐᔪᐊᒥ ᑲᑎᒪᕕᖕᒥ ᐱᔨᑦᓯᕈᑎᒋᔭᒥᖕᓂᒃ: ᑐᐱᕐᔪᐊᑉ ᖃᓇᖏᓐᓂᒃ, ᓴᓐᓂᖓᔪᖏᓐᓂᒡᓗ, ᓇᑉᐸᖅᑯᑎᖏᓐᓂᒡᓗ, ᐃᓕᐅᕋᕐᕕᖏᓐᓂᒡᓗ, 32ᑐᕐᓲᖓᑕᓗ ᐊᕙᑖᓂ ᓇᑉᐸᒍᑎᖏᓐᓂᒃ ᐃᓕᕝᕕᖏᓐᓂᒡᓗ, ᐸᐅᒍᐊᖏᓐᓂᒡᓗ ᓄᖃᕈᑎᖏᓐᓂᒡᓗ ᐱᐅᓴᐅᑎᓕᒫᖏᓐᓂᒡᓗ ᐱᔭᕆᐊᖃᕐᑐᓕᒫᓂᒃ ᑖᒃᑯᓄᖓ; ᐊᖑᑎᓪᓗ ᐊᑐᓂᑦ ᑎᓕᔭᕆᐊᖃᕐᐸᑎᑦ ᐊᑎᖏᑦ ᒪᓕᒡᓗᒋᑦ ᓱᓇᒥᒃ ᐊᒡᔭᕐᓯᔭᕆᐊᖃᕐᒪᖔᑕ. 33ᑖᒃᑯᐊ ᑕᕝᕙ ᐃᓚᒌᑦ ᒥᕋᕆᐅᑉ ᑭᖑᕚᖏᑕ ᐃᕐᓂᖏᑕ ᐱᔨᑦᓯᕈᑎᒋᔭᕆᐊᖃᕐᑕᖏᑦ, ᐱᓇᓱᐊᕐᓗᑎᒃ ᑐᐱᕐᔪᐊᕐᒥ ᑲᑎᒪᕕᖕᒥ ᐱᔨᑦᓯᕐᓗᑎᒃ, ᐊᖓᔪᖅᑳᖃᕐᓗᑎᒃ ᐃᑕᒫᕐᒥᒃ ᐂᕉᓂᐅᑉ ᑐᓂᕐᕈᓯᕐᑎᑦᓯᔨᐅᑉ ᐃᕐᓂᖓᓂᒃ.”
ᓕᕔᑎᑦ ᓈᓴᕐᑕᐅᓂᖏᑦ
34ᒨᓯᓯᐅᑉ ᐂᕉᓂᐅᓪᓗ ᐃᓅᖃᑎᒌᒡᔪᐊᓪᓗ ᓯᕗᓕᕐᑎᖏᑕ ᑯᕼᐊᑍᑎᐅᑉ ᑭᖑᕚᖏᑦ ᓈᓴᕐᐰᑦ ᐃᓚᒌᑦ ᒪᓕᒡᓗᒋᑦ, ᓯᕗᓕᕕᓂᖏᑕ ᐃᓚᒌᖕᓂᖏᑎᒍᑦ, 35ᐊᕐᕌᒍᖃᕐᑐᓂᑦ 30ᓂᑦ ᐱᒋᐊᕐᓗᑎᒃ ᐊᖓᔪᒃᓰᓪᓗ 50ᓂᒃ ᐊᕐᕌᒍᖃᕐᑐᑦ ᑎᑭᓪᓗᒋᑦ ᐱᓇᓱᐊᖃᑕᐅᔪᑦ ᐱᔨᑦᓯᕐᓗᑎᒃ ᑐᐱᕐᔪᐊᒥ ᑲᑎᒪᕕᖕᒥ; 36ᓈᓴᕐᑕᐅᔪᓪᓗ ᑖᒃᑯᐊ ᐃᓚᒌᑦ ᒪᓕᒡᓗᒋᑦ 2,750ᓂᒃ ᐅᓄᕐᓂᖃᓚᐅᕐᐳᑦ. 37ᑖᒃᑯᐊ ᑕᕝᕙ ᓈᓴᕐᑕᐅᓚᐅᕐᑐᑦ ᑯᕼᐊᑍᑎᐅᑉ ᑭᖑᕚᖏᑦ ᐱᓇᓱᐊᕈᓐᓇᕐᑐᑦ ᑐᐱᕐᔪᐊᒥ ᑲᑎᒪᕕᖕᒥ, ᒨᓯᓯᐅ ᐂᕉᓂᐅᓪᓗ ᓈᓴᓚᐅᕐᑕᖏᑦ ᐊᑕᓂᐅᑉ ᐱᖁᔨᓂᖓ ᒨᓯᓯᒥᒃ ᒪᓕᒡᓗᒍ.
38ᓈᓴᕐᑕᐅᓚᐅᕐᑐᓪᓗ ᒌᕐᓲᓂᐅᑉ ᑭᖑᕚᖏᑕ ᐃᕐᓂᖏᓐᓂᑦ ᐃᒡᓗᒥᐅᖃᑎᒌᑦ ᓯᕗᓕᕕᓂᕐᒥᒍᑦ ᐃᓚᒌᑦ, 39ᐊᕐᕌᒍᖃᕐᑐᓂᑦ 30ᓂᒃ ᐱᒋᐊᕐᓗᒋᑦ ᐊᖓᔪᒃᓰᓪᓗ, 50ᓂᒃ ᐊᕐᕌᒍᖃᕐᑐᑦ ᑎᑭᓪᓗᒋᑦ, ᐱᓇᓱᐊᖃᑕᐅᔪᓐᓇᕐᑐᓕᒫᑦ ᑐᐱᕐᔪᐊᒥ ᑲᑎᒪᕕᖕᒥ, 40ᑖᒃᑯᓇᓐᖓᑦ ᓈᓴᕐᑕᐅᔪᑦ ᐃᓚᒌᑦ ᐃᒡᓗᒥᐅᖃᑎᒌᑦ ᓯᕗᓕᕕᓂᕐᒥᒍᑦ ᐃᓚᒌᑦ, 2,630ᓂᒃ ᐅᓄᕐᓂᖃᓚᐅᕐᐳᑦ. 41ᑖᒃᑯᐊ ᑕᕝᕙ ᐃᓚᒌᑦ ᒌᕐᓲᓂᐅᑉ ᐃᕐᓂᖏᑕ ᑭᖑᕚᖏᑦ, ᐱᔨᑦᓯᕈᓐᓇᕐᑐᑦ ᑐᐱᕐᔪᐊᒥ ᑲᑎᒪᕝᕕᖕᒥ, ᒨᓯᓯᐅᑉ ᐂᕉᓂᐅᓪᓗ ᓈᓴᓚᐅᕐᑕᖏᑦ ᐊᑕᓂᐅᑉ ᐱᖁᔨᓂᖓ ᒪᓕᒡᓗᒍ.
42ᐅᑯᐊᓗ ᑕᕝᕙ ᐃᓚᒌᑦ ᒥᕋᕆᐅᑉ ᐃᕐᓂᖏᑕ ᑭᖑᕚᖏᑦ ᓈᓴᕐᑕᐅᓚᐅᕐᑐᑦ ᐃᓚᒌᑦ ᐃᒡᓗᒥᐅᖃᑎᒌᑦ ᓯᕗᓕᕕᓂᕐᒥᒃᑎᒍᑦ ᐃᓚᒌᒃᑐᑦ, 43ᐊᕐᕌᒍᖃᕐᑐᓂᑦ 30ᓂᒃ ᐱᒋᐊᕐᓗᒋᑦ ᐊᖓᔪᒃᓰᓪᓗ, 50ᓂᒃ ᐊᕐᕌᒍᖃᕐᑐᑦ ᑎᑭᓪᓗᒋᑦ, ᐱᓇᓱᐊᖃᑕᐅᔪᓐᓇᕐᑐᓕᒫᑦ ᑐᐱᕐᔪᐊᒥ ᑲᑎᒪᕕᖕᒥ, 44ᓈᓴᕐᑕᐅᓚᐅᕐᑐᓕᒫᑦ ᐃᓚᒌᑦ ᒥᕋᕆᐅᑉ ᑭᖑᕚᖏᑦ 3,200ᓂᒃ ᐅᓄᕐᓂᖃᓚᐅᕐᐳᑦ. 45ᑕᒃᑯᐊ ᑕᕝᕙ ᓈᓴᕐᑕᐅᓚᐅᕐᑐᑦ ᐃᓚᒌᑦ ᒥᕋᕆᐅᑉ ᑭᖑᕚᖏᓐᓂ, ᒨᓯᓯᐅᑉ ᐂᕉᓂᐅᓪᓗ ᓈᓴᓚᐅᕐᑕᖏᑦ ᐊᑕᓂᐅᑉ ᐅᖃᐅᓯᖓ ᒪᓕᒡᓗᒍ ᒨᓯᓯᒃᑯᑦ.
46ᓈᓴᕐᑕᐅᓚᐅᕐᑐᓕᒫᑦ ᓕᕔᑎᓂ, ᒨᓯᓯᐅᑉ ᐂᕉᓂᐅᓪᓗ ᐃᓴᕆᐊᓕᒥᐅᓪᓗ ᓯᕗᓕᕐᑎᖏᑕ ᓈᓴᓚᐅᕐᑕᖏᑦ, ᐃᓚᒌᑦ ᐃᒡᓗᒥᐅᖃᑎᒌᑦ ᓯᕗᓕᕕᓂᕐᒥᒃᑎᒍᑦ ᐃᓚᒌᒃᑐᑦ, 47ᐊᕐᕌᒍᖃᕐᑐᓂᑦ 30ᓂᒃ ᐱᒋᐊᕐᓗᒋᑦ ᐊᖓᔪᒃᓰᓪᓗ, 50ᓂᒃ ᐊᕐᕌᒍᖃᕐᑐᑦ ᑎᑭᓪᓗᒋᑦ, ᐱᓇᓱᐊᖃᑕᐅᔪᓐᓇᕐᑐᓕᒫᑦ ᐊᒡᔭᕐᓯᖃᑕᐅᓪᓗᑎᒃ ᑐᐱᕐᔪᐊᕐᒥᒃ ᑲᑎᒪᕕᖕᒥᒃ, 48ᓈᓴᕐᑕᐅᓚᐅᕐᑐᓕᒫᑦ 8,580ᓂᒃ ᐅᓄᕐᓂᖃᓚᐅᕐᐳᑦ.
49ᐊᑕᓂᐅᑉ ᐱᖁᔨᓂᖓ ᒪᓕᒡᓗᒍ ᓈᓴᕐᑕᐅᓚᐅᕐᐳᑦ ᒨᓯᓯᒃᑯᑦ, ᐱᔨᑦᓯᕈᓐᓇᕐᓂᖏᑦ ᐱᔭᒃᓴᖏᓪᓗ ᐊᑐᓂᑦ ᒪᓕᒡᓗᒋᑦ; ᑍᒫᒃ ᓈᓴᕐᑕᐅᓚᐅᕐᐳᑦ, ᐊᑕᓂᐅᑉ ᒨᓯᓯ ᐱᖁᓚᐅᕐᒪᒍ.
Currently Selected:
ᒨᓯᓯ ᓯᑕᒪᖏᑦ 4: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.