Matayo 4

Yesʉ ʉkʉgeng'wa

Maliko 1:12-13; Lʉka 4:1-13

1Sʉnga Yesʉ akatongeelwa nʉ Ng'wahʉ Ng'welʉ mʉwɨɨ wahume kʉgeng'wa nʉ shetani. 2Yesʉ wɨkagwalya kʉlya mahikʉ makʉmi annɨ ʉtikʉ nʉ ng'ʉng'wɨ, sʉnga wɨkahung'wa nzala. 3Itɨgwa shetani wɨkamʉhanga wɨkamʉɨla, “Ang'wɨ tai ʉewe wɨng'wana wang'wi Itunda, maɨle ɨmagwe aya apɨlʉke atule mɨkate.

4Yesʉ wɨkasʉkɨɨlya wɨkalʉnga, “Goza yandɨkilwe mʉʉandɨkwa nɨmaza kɨna ʉmʉntʉ shanga ʉkishiɨ wazelya indya du, ingɨ mʉlʉkani lɨhi Itunda nʉʉkʉtambʉla.

5Sʉnga shetani wɨkamʉtwala ʉ Yesʉ kʉ Yelʉsalemu kɨsalɨ nɨkɨɨkilwe kʉnsoko ang'wi Itunda, wɨkamɨmɨsha mʉkɨlɨngasɨɨlyo nɨka Nyʉmba ang'wi Itunda, 6wɨkamʉɨla “Ang'wɨ ʉewe tai wɨ Ng'wana wang'wi Itunda igʉme pɨhi, kʉnsoko yandɨkilwe kɨna,

‘Itunda ʉkʉalagɨɨlya a Itʉmi akigʉlʉ niang'wi Itunda akwe kʉnsoko ako akʉgunɨlye,

akʉkenke mʉ mikono ao,

ʉleke kilemalya mʉgʉlʉ wako migwe.”’

7Yesʉ wɨkamʉsʉkɨɨlya kɨna, “Hangɨ yandɨkilwe kɨna, ‘Leka kʉmʉgema Isekʉlʉ Itunda wako.’”

8Sʉnga ʉ shetani wɨkamʉhola Yesʉ hangɨ wɨkamʉtwala migʉlya alʉgʉlʉ nʉlʉlɨpʉ, wɨkamʉlagɨɨla utemi nʉwa mahɨɨ ɨhi nʉʉgolɨ wakwe, 9shetani wɨkamʉɨla ʉ Yesʉ, “Izi yɨhi kʉʉpeza anga ʉtugame nʉ kʉnkʉlya.”

10Papo gwa ʉ Yesʉ wɨkamʉɨla “Hega apa itɨ shetani! Yandɨkilwe mʉmbugulu ang'wi Itunda. ‘Ʉkʉmʉkʉlya Isekʉlʉ Itunda wako nʉ kʉmitʉmɨla ʉng'wenso wɨng'wene du.”’

11Ɨtɨgwa ʉ shetani wɨkamʉleka Yesu papo, nɨ a Itʉmi akigʉlʉ niang'wi Itunda ang'wi Itunda ɨkaza mitʉmɨla.

Yesʉ ʉkandya mʉlɨmo mʉ Galilaya

Maliko 1:14-15; Lʉka 4:14-15

12Ɨtɨgwa itungo Yesʉ naɨwija kɨna ʉ Yohana Mʉbadisi Mʉbadɨsi watungwa mʉkadulumu, wɨkatulya kʉ Galilaya. 13Yesʉ wɨkahega mʉkɨsalɨ ka Nazaleti, wɨkalongola kɨshiɨ mʉ kisalɨ nɨka Kapelanaʉmu nɨkolɨ mʉmpelo a lʉzɨ lʉkʉlʉ nʉla Galilaya, pakupɨ nɨ mahɨɨ akʉ Zabuloni nɨ Naputali. 14Itɨgwa aɨ utendile itɨ lʉpikɨɨle ʉlʉkani naɨ lʉtambʉwe nʉ Mʉmanga wang'wi Itunda ʉ Isaya.

15“Ihɨɨ a Zabʉloni ni ihɨɨ akʉ Napʉtali,

nzɨla nɨhongile kʉ lʉzɨ nʉlʉkʉlʉ, kitʉmbɨ nɨla mongo nʉwa Yolodani,

Galilaya nɨishiɨ antʉ nɨ shanga Ayahudi.

16Antʉ nɨishiɨ mʉ kiti,

alɨkɨlwa nzelya nkʉlʉ.

awa naɨ ɨshiɨ mihɨɨ na kiti nawa nia mihɨɨ aʉlʉgʉ,

alɨkɨlwa nzelya.

17Kʉpumɨɨla itʉngo lɨlo, Yesʉ wɨkandya kʉtanantya wazelʉnga, “Pɨlʉki mʉleke mɨlandʉ anyu mʉmʉsʉkɨle Itunda, kʉnsoko ʉtemi wang'wi Itunda wahugeela”

Yesʉ ʉkʉitanga abua nsamaki annɨ

Maliko 1:16-20; Lʉka 5:1-11

18Itungo nɨlanso Yesʉ naɨ ʉkʉgendagenda pakupɨ nʉ lʉzɨ nʉ lʉkʉlʉ nʉla Galilaya, wɨkaaona abʉa nsamaki abɨɨlɨ, Simioni nʉwitangwa Petelo nʉ Andelea mʉluna wakwe. 19Yesʉ wɨkaaɨla, “Nzii, mʉntyate, ʉnene kʉmʉmanyisa kʉaleta antu kʉng'wi Itunda, kimɨkɨɨli ka kubua insamaki,. 20Itʉngo lɨlo ɨkaleka nyabu yao, ɨkamʉtyata.

21Naɨ wagenda ɨniino, wɨkaaona nɨaʉya abɨɨlɨ Yakobo nʉ Yohana Mʉbadisi ana ang'wa Zebedayo, akaze anankɨe mibɨnɨ nʉ tata ao Zebedayo, akʉinoneelya nyabʉ yao, papo Yesʉ akaɨtanga kɨlanyi, 22itʉngo ʉdu ɨkalɨleka ibɨnɨ nʉ tata ao, ɨkamʉtyata ʉ Yesʉ.

Yesʉ ʉkʉmanyisa antʉ nʉkʉakomya alwae

Lʉka 6:17-19

23Yesʉ aɨ wɨgendeela nkɨka yɨhi niya kisalɨ ka Galilaya, akaze amanyisa mʉnyʉmba nɨya kʉtankanɨla Ayahudi, wɨkatanantya Nkani ni Nza niya ʉtemi wang'wi Itunda, nʉkʉakomya antʉ ndwala ʉyaga ʉyaga. 24Ʉlʉkumo lang'wa Yesu lʉkenela nkɨka yɨhi niya Silia, nɨ antʉ ɨkamʉtwaɨla alwae naɨ ilwala ndwala ʉyagaʉyaga, ahali nɨagwa nkolo nawa nɨapoiye, Yesʉ wɨkaakomya ɨhi. 25Papogwa maumbɨ a antʉ kʉpuma kʉ Galilaya nʉkʉ Dekapoli nʉkʉ Yelusalemu nʉkʉ Ʉyahʉdi nʉ kitʉmbɨ nɨla mongo nʉa Yolodani akatula mʉtyata Yesʉ.

Currently Selected:

Matayo 4: IBV

Highlight

Copy