Matayo 5

Yesʉ ʉkʉmanyisa antʉ mʉlʉgʉlʉ

1Itɨ gwa itungo Yesʉ naɨ waona iumbɨ la antʉ ɨdʉ, wɨkanankɨla mʉlʉgʉlʉ, akikiɨ. Nɨ amanyisigwa akwe ɨkamʉhanga, 2Yesʉ nʉyo wɨkandya kʉamanyisa,

Ʉkembetwa wang'wi Itunda

Lʉka 6:20-23

3“Akembetilwe antʉ awa nɨ alɨnga kina amʉtakile Itunda,

kʉnsoko ʉtemi wang'wi Itunda ingɨ wao!

4Akembetilwe antʉ awa nɨ akɨa mʉnkolo,

kʉnsoko Itunda ʉkʉsʉkɨɨlya ʉlowa!

5Akembetilwe awa nɨ ininompya,

kʉnsoko nɨanso akʉpegwa ihɨɨ ɨtule ao.

6Akembetilwe awa nɨakete nsʉla akitʉma aya namʉloeeye Itunda,

kʉnsoko Itunda ʉkʉapa ngulu niya kitʉma nanso.

7Akembetilwe awa nɨakete kɨaisa kʉaʉya,

kʉnsoko nɨenso akʉasɨɨligwa ni Itunda.

8Akembetilwe awa nɨagila anga magazo mʉnkolo yao,

kʉnsoko nɨanso akʉmʉona Itunda!

9Akembetilwe nɨaloilwe antʉ ikiɨ nɨ matiliga,

kʉnsoko nɨanso akitangwa ana ang'wi Itunda!

10Akembetilwe awa nɨakagigwa kʉnsoko akitʉma aya Itunda nʉmaloilwe,

kʉnsoko ʉtemi wang'wi Itunda ingɨ wao.

11“Mʉkembetilwe ʉnyenye nɨmʉkʉtʉkilwa nɨantʉ nʉkagigwa nʉ kʉtambʉlwa ʉbɨɨ, kʉnsoko mʉkitʉma aya Itunda nʉmaloilwe. 12Iloi, nʉkʉkʉa ngiligili kʉnsoko kɨpegwa kanyʉ kɨkʉlʉ kɨmʉlindɨɨe kigʉlʉ. Ingɨ itɨ ʉʉ aɨatendile ɨamanga ang'wi Itunda naɨ amʉtongee ʉnyenye.

Mʉnyʉ nɨ nzelya

Maliko 9:50; Lʉka 14:34-35

13“Ʉnyenye mimpyani nʉ mʉnyʉ kʉanonɨa antʉ nɨalɨkalo lʉbii, atʉle nʉ lɨkalo nʉlʉza mihɨɨ. Ingɨ mʉnyʉ anga ʉlimɨlye ʉʉza wakwe ʉkʉtendwa ʉlɨ ʉnone? Mʉnyʉ nʉwanso wɨhunʉlwa kʉnzi nʉkʉpambatwa nɨ antʉ. 14Ʉnyenye ingɨ mɨantʉ akʉamanyisa antʉ itʉme aya ni Itunda ʉmaloilwe. Mɨmpyani nɨ nyʉmba nɨzengilwe mʉlʉgʉlʉ shanga mʉhumile kipiha. 15Hangɨ antʉ shanga akɨlya lʉmʉlɨ alʉkunɨkɨle mʉnyʉngʉ, ingɨ lʉmʉlɨ lɨɨkwa paʉpagɨko migʉlya alɨkɨlwe antʉ ɨhi nɨamolɨ mʉnyʉmba 16Ʉʉgwa lʉkʉlʉ lʉmʉlɨ lanyʉ isingilye kʉalɨkɨla antʉ kʉntongeela, ahʉme kihenga ntendo yanyʉ ninziza, anga aone intendo yanyu ninza amʉkʉlye ʉ Tata wanyʉ nʉa kigʉlʉ.

Yesʉ ʉkʉmanyisa malagɨɨlyo

17Yesʉ wɨkalʉnga, “Mʉleke kʉsɨga kɨna ʉnene nzee heja malagɨɨlyo Itunda naɨ ʉmʉpee Musa, nʉ ʉmanyisi nʉwa amanga naɨ atʉmilwe ni Itunda, ingɨ shanga nzee heja, nzile kamɨnkɨɨlya. 18Kʉmʉɨla ɨtai, ihɨɨ nigʉlʉ yʉkʉkila, shanga nzeheja kɨntʉ kɨhi mʉ malagɨɨlyo ang'wa Musa, ingɨ ɨhi akʉkondanɨɨla. 19Kʉlʉlo mʉntʉ wɨhi nɨshanga ʉkʉkela malagɨɨlyo ang'wa Musa nɨlɨ ga niniino kʉkɨla ɨhi, hangɨ mʉntʉ nʉanso waamanyise nɨaʉya kitʉma anga nʉanso, mntʉ nʉanso ʉkʉtula mʉniino lʉkʉlʉ mʉ Ʉtemi wang'wi Itunda. Ingɨ mʉntʉ nʉkʉtenda mʉitakɨwe nʉ kʉamanyisa aʉya, mʉntʉ nʉanso ʉkʉpegwa ihɨɨ ɨtule akwe. 20Kʉlʉlo kʉmʉila kʉlʉ kʉʉlʉ, anga mʉleke kitʉma niiza anga niitakɨwe ni Itunda, kʉkɨla Apalisayo nɨamanyisi amalagɨɨlyo ang'wa Musa nɨɨtenda, kwee shanga mʉkingɨla kigʉlʉ.

Ʉmanyisi nʉ wikuo

Lʉka 12:57-59

21Yesʉ wɨkaaɨla, matongee kija kʉpuma kʉantʉ akali naɨ atambʉɨwe kɨna, “Leka kʉbʉlaga! Ʉyʉ nʉkʉbʉlaga isingilye wapɨsɨɨligwe. 22Ingɨ ʉnene kʉmʉɨla itɨɨ, wɨhi nʉkʉmʉtakɨɨla ʉmʉluna wakwe, itakɨwe wapɨsɨɨligwe. Nʉ mʉntʉ nʉkʉmʉdalaha mʉluna wakwe kɨna shanga kɨntʉ ʉkʉtalwa kɨanza lakʉlamʉla, nʉyʉ nʉkʉmʉdalaha ʉmʉluna akwe, Itunda ʉkʉmʉpɨsɨɨlya nʉkʉmʉtala kʉʉlʉngʉ milambo la moto nɨɨtalwa anyamɨlandʉ nɨakule. 23Kʉlʉlo gwa, nʉkitʉma ipolyo nɨla kʉtegenteelya pitekeelo, ʉkɨmbʉkɨɨlye kɨna mileile nʉ mʉluna wako, 24leka ipolyo lako pitekeelo, ʉlongole hanza milɨnge nʉ mʉluna wako, papogwa ʉze witʉme ipolyo lako.

25Kaya kilɨnga nʉ milei wako nʉkɨlɨ ʉkete lyoma nakɨlɨ kʉʉpisha kɨanza. Angwɨ shanga ʉʉ, ʉyʉ nʉkʉsemee ʉkʉʉtwala kianza nɨlaanyampala, nɨanyampala akʉʉtwala kʉmʉlamʉli nʉmʉkʉlʉ, nʉyo ukʉitangɨlya amboi, nao ʉkʉʉlugaila mʉkadʉlʉmʉ. 26Kʉʉɨla ɨtaɨ, shanga ʉkʉpʉma mʉkadʉlumu kʉpikɨɨla nʉkʉmaɨla kʉlipa matʉndʉ ɨhi nʉaɨwe.

Makani aʉgoolya

27Yesʉ akalongoleka kʉtambʉla, “Migulyee kɨna antʉ aɨatambʉɨwe, ‘Leka kʉgoolya!’ 28Ʉnene ingɨ kʉmʉɨla, mʉntʉ wɨhi nʉ ʉkʉmʉawa mʉsʉngʉ nɨshanga ʉmʉtɨnile kɨnkolo ʉkʉtula wagoolya. 29Itɨ gwa, angaitule liho lako lɨkʉʉsasha lɨkompole ʉligʉme kʉlɨ. Bahʉ wingɨle kigʉlʉ ize wihongo, kʉkɨla ʉmʉɨlɨ wako wɨhi ʉgʉmɨlwe kʉʉlʉngʉ. 30Ang'wɨ mʉkono ako nʉakigoha ʉkʉʉsasha, ʉteme ʉgʉme kʉli. Bahʉ kʉlimɨlya mʉkono ako ʉng'wɨ, kʉkila mʉili ako wɨhi kʉʉlʉngʉ kihɨɨ aashi.

Makani a wileki

Matayo 19:9; Maliko 10:11-12; Lʉka 16:18

31Yakondigwe kʉandɨkwa kɨna, mʉntʉ wɨhi nʉkʉmʉleka mʉkɨma wakwe, wamʉtamʉɨle talaka’. 32Ingɨ ʉnene kʉmʉtambʉɨla itɨ, mʉntʉ wɨhi nʉkʉʉkʉmʉtamʉila mʉkɨma wakwe talaka, shanga kʉnsoko aʉgoolyi, ʉkʉmʉsasha mʉkɨma watule mʉgoolya, nʉ mitʉnja, nʉkʉmʉtina mʉsʉngʉ nʉanso nʉlekilwe ʉkʉgoolya.

Makani amalapo

33Yesʉ akalongoleka kʉaɨla, “Hangɨ migʉle anyakalɨ aɨɨwe kɨna, ‘Leka kitʉma makani nagiigwe mʉmalagɨɨlyo ang'wi Itunda, ingɨ mʉtakɨwe kitʉma anga niilagɨigwe mʉmalagɨɨyo ang'wi Itunda.’ 34Ingɨ ʉnene kʉmʉɨla, itʉnʉ leki kʉlapi, mʉkɨntʉ kɨhi nɨka kigʉlʉ, kʉnsoko lɨlo ituntu nɨla ʉtemi nɨ lang'wi Itunda, 35ang'wɨ leki kulapi mʉkɨntʉ kɨhi nɨka mihɨɨ, kʉnsoko mʉmo ʉpandilyo wamigʉlʉ ang'wi Itunda, ang'wɨ leki kilapɨɨla Yelʉsalemu kʉnsoko kɨko kɨsalɨ kamʉtemi nʉmʉkʉlʉ. 36Hangɨ mʉleke kilapɨɨla mʉmatwe anyʉ, kʉnsoko shanga mʉhʉmile kʉpɨʉla ga nʉlʉsingi nʉ lʉng'wɨ lʉtʉle lwelʉ ang'wɨ lilwaalʉ. 37Anga ‘Itule wagomba’ ‘lunga nagomba’ anga ‘Itule wahita’ ‘lunga nahita’ nkani yɨhi niikʉkɨla nkani izi ɨpʉma kʉng'wa shetani.

Makani aʉmalyi

Lʉka 6:29-30

38Yesʉ wɨkalongeleka kʉlʉnga, “Mimigʉlye yatambʉwe kɨna, ‘Liho kʉ liho, lino nɨ lino.’ 39Ingɨ ʉnene nʉmʉɨɨe, mʉleke kikʉngʉma nʉ mʉntʉ nʉmʉbɨ. Anga mʉntʉ wakʉkʉe ikʉnda lɨng'wi, mʉpɨʉɨle nikʉnda lʉlya. 40Mʉntʉ anga wakʉsemele mianza azehiya kʉʉhegelya mʉjʉlʉngʉ wako, mʉlekele nɨ shati ga. 41Mʉntʉ nʉkʉʉmɨɨlya ʉmʉkenkelye mʉligo wakwe kilomita ɨng'wɨ, mʉkenkelye kilomita ibɨɨlɨɨ. 42Mʉntʉ ʉyʉ nʉkʉʉlompa mʉpee leka kʉmʉima, nʉkʉhiya kʉʉkopa kɨntʉ mʉkopise, leka kʉmʉhitɨlya.

Kʉalowa alʉgʉ

Lʉka 6:27-28-32-36

43“Migʉlye kɨna itambʉwe. Ʉmʉnyakɨsalɨ ako ʉmʉlowe, nʉ mʉlʉgʉ wako ʉmʉhʉkɨlwe.’ 44Ingɨ ʉnene kʉmʉɨla, mʉalowe alʉgʉ anyʉ nʉ kʉalompeela awa nɨakʉmaja, 45mʉhʉme kʉtʉla mɨana ang'wa Tata wanyʉ nʉa kigʉlʉ. Kʉnsoko nʉanso wɨalɨkɨla lyoa lakwe anyamɨlandʉ nawa nɨa mʉhʉɨɨe, hangɨ wɨkʉisa mbʉla kʉ ahʉɨɨli nʉ kʉ anyamɨlandʉ. 46Kʉtilɨ kɨpegwa kɨhi nɨ mʉkʉkɨlija anga mʉalowe wawadʉ nɨ amʉloilwe, kʉnsoko ga nɨahangʉlya mpia ʉʉ ɨtenda! 47Hangɨ anga mʉalamʉshe ɨanyandʉgʉ anyʉ dʉ, ikʉtula mʉakɨiye ntʉni ɨantʉ nɨangɨza? Kʉnsoko nɨ antʉ nɨ shanga amʉmanyile Itunda nao ga ʉʉ ɨtenda. 48Kʉlʉlo gwa, mʉleke kʉtula nɨ magazo anga Ʉtata wanyʉ nʉa kigʉlʉ nɨmʉgila anga magazo!

Currently Selected:

Matayo 5: IBV

Highlight

Copy