Walumi 13
13
Kutegeleza vilongozi wa isi
1Chila munhu kolondeka kuwategeleza weli na ulongozi mui silikali, kwavija ulongozi wose wolawa kwa Mulungu, nawo wolongoza wekigwa na Mulungu. 2Kwaivo yogalema gaja galagizigwa na vilongozi kogalema malagizo ga Mulungu, nawo wotenda ivo woigalila kulamuligwa wenyego. 3Walongozi hawawatenda wanhu watenda goya wadumbe, ila kwa wanhu waja wehile. Ivo kolonda sekeumdumbe yeli na ulongozi? Sang'hana ganogile nayo kokwing'ha nhogolwa, 4kwavija iyo ni msang'hanaji wa Mulungu yosang'hana sang'hano kwambuli yako ubokele ganogile. Mbali wahasang'hana gehile, baho, kolondeka umdumbe, kwavija ni kweli kanao udaho wa kukulamula. Iyo komsang'hanila Mulungu kwa kuwalagusila ludoko lwake waja wosang'hana gehile. 5Kwaivo kolondeka kuwategeleza weli na ulongozi, sio tu kwavija kodumba ludoko lwa Mulungu, mbali kwavija movimanya kua ivo molondeka kusang'hana.
6Kwambuli iyo iyo mweye moliha kodi, kwavija vilongozi hao womsang'hanila Mulungu ihawa wosang'hana vija viilondeka. 7Mwing'heni chila munhu chija chiyalondeka kwing'higwa, munhu yolondeka kwing'higwa kodi, yeng'higwe, na munhu wa kodi, yalihe kodi, na yolondeka kutegelezigwa, yategelezigwe na yolondeka kudumbigwa yadumbigwe.
Kuing'ha wende wenyego kwa wenyego
8Sekemdaigwe na munhu yoyose, ila mdaigwe kwa kuing'ha wende. Yomwing'ha wende miage koitegeleza ndagizi. 9Kwavija ndagizi zino zolonga, “Seke utende ugoni, Seke ukome, Seke uwe na maya,” na zimwenga zose zaumo muindagizi imwe, “Mwing'he wende miago kama vuuing'ha gweye mwenyego.” 10Yomwing'ha wende miage hadaha kumtendela gehile. Kwaivo, wende wogangamiza kuitegeleza ndagizi.
11Mweye molondeka kusang'hana gago, kwavija movimanya mwamchipindi gani, sambi icho chipindi cha kulamuka muutulo, enaa, sambi ulohozi wetu wammabehi ng'hani kubita mwanza uja uchisongile kumtogola Kilisito. 12Chilo chomala na misi yammabehi. Ivo chizileke mbuli zose zihile za ziza, chivale migoha ya mdibung'hulo. 13Nachisang'hane wenyego gaja galondeka kusang'hanigwa ing'hali misi, hebu sio kwa lusona lwa kuja ndia ng'hani na kukoligwa, ugoni na luhadu, kugomba na migongo. 14Mtonge na kusang'hana kama Mndewa Yesu Kilisito, seke mtogole kulongozigwa na maya zenu zihile.
Currently Selected:
Walumi 13: KBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Kami @The Word for The World International and Kami Language translation. All rights reserved.