1 Abakorinzo 1
1
Amashiesio
1Eyirula khuPaulo, owalangwa okhuba omurume waYesu Kristo khulwa okhwenya khwaNyasaye; halala nende Sosetsene omwana weefwe; 2yule khukanisa yaNyasaye eyili ebuKorinzo, mbu abeenabo abaahulwa muKristo Yesu, abalangwa mbu babe abatakatifu, halala nende bosi mubuli handu abahaabila eliira liOmwami weefwe Yesu Kristo, Omwami wabwe khandi oweefwe.
3Obukoosia bube khwinywe, nende omulembe, ebirula khuNyasaye Seefwe nende khuMwami Yesu Kristo.
Okhuupa orio khulwa ebihaanwa bieshiroho
4Emuupilanga Nyasaye wanje orio tsindaalo tsiosi khulweenywe, khulwa obukoosia bwaNyasaye obwa mwaheebwa muKristo Yesu; 5shinga olwa mwayindihasibwa muye mumakhuwa kosi, mumasungo kosi nende mubumanyi bwosi; 6amakhuwa akarumbulwa khuKristo shinga olwa katinyisibwa mwinywe; 7kho shimulikhwo nobuleemu mushihaanwa shiosi ta; nimulindiilila obufwimbulwi bwOmwami weefwe Yesu Kristo. 8Naye alamutinyisia okhuula khubumaliilishi, oburabakhwo nende eshia musitaachilwa khunduukho yOmwami weefwe Yesu Kristo tawe. 9Nyasaye nomwisiikwa, owamulanga okhwinjila mubusanjilani bwomwanawe Yesu Kristo Omwami weefwe.
Obukabukhani mukanisa
10Ne bulaano emusaaya, baana beefwe, khulwa eliira liOmwami weefwe Yesu Kristo, mbu muboolenje mwesi amakhuwa malala, khandi mbu obukabukhani bwosi buleshe okhubaho mwinywe; habula mbu muliimaasilibwe elala mubulala bwobuchoomi nende obwamapaaro. 11Okhuba, baana beefwe, ndabooleelwe nende abomwitaala liaKuloe, mbu obusoolo bubeetsangaho hakari weenywe; 12eshisina mbu buli mundu aboolanga ari Isie endi owaPaulo; Isie endi owaApolo; Isie endi owaKefa, kata mbu Isie endi owaKristo. 13Kristo wakabukhana noho? Paulo yamubambilwa khumusalaba? Nohomba mwabatisibwa nimwinjisibwa muliira liaPaulo? 14Ekhupila Nyasaye orio okhuba shindabatisia oundi yesi khwinywe ta, habula Kirisipo naGayo; 15omundu yesi aleshe okhusunga mbu mwabatisibwa nimwinjisibwa muliira lianje. 16Khandi ndabatisia abomunzu yaSitefano bosi; ne nibarali abo, shinyala okhwitsulila nimba nindabatisia oundi yesi ta. 17Okhuba Kristo shiyayaruma okhubatisia ta, habula okhwilwatsa akeinjiili; ne obureelwatsa namachesi kamasungo ta, omusalaba kwaKristo kuleshe okhukholwa omukhaya.
Kristo, obunyali bwaNyasaye, nobuchesibwe
18Okhuba likhuwa elo liomusalaba neliobusilu khubeenabo abatibanga; ne khwifwe abahonibungwa, nilio obunyali bwaNyasaye. 19Shichila kahandiikwa mbu
Ndalatibia obuchesi bwabachesi,
nifukula oburechelefu bwabarechelefu.
20Omuchesi ali heena? Omuhandiichi ali heena? Omuyingani oweshibala shino ali heena? Nyasaye shiyasiluhasia obuchesi bweshibala? 21Shichila khulwa obuchesi bwaNyasaye, eshialo shiakhaywa okhumumanya Nyasaye khulwa obuchesi bwashio; kho Nyasaye yachama okhuhonia abo abasuubila, khulwa obusilu bwobwilwatsi. 22Okhuba abaYahudi basabanga ebilolelo, nabo abaYunani bakhaabanga amachesi, 23nebutswa ifwe khwilwatsanga Kristo owabambwa khumusalaba; khubaYahudi neshiisichiralo, ne khubaYunani nobusilu; 24nebutswa khubalanje abaYahudi nabaYunani bosi, niKristo ouli obunyali bwaNyasaye khandi obuchesi bwaNyasaye. 25Shichila obusilu bwa Nyasaye bushila abandu obuchesi; khandi okhubulaamaani khwaNyasaye khushila abandu amaani.
26Okhuba, baana beefwe, muyililisie khubulangwi bweenywe, shinga olwa barali abanji abobuchesi bwomubili abalangwa ta, kata abobunyali abanji, kata abeshiami abanji tawe; 27nebutswa Nyasaye yalobola ebisilu ebiomushialo okhuhambia abachesi tsisoni; khandi Nyasaye yalobola ebibula-amaani ebiomushialo okhuhambia tsisoni ebio ebili biamaani. 28Khandi ebindu ebibula ifuma, kata ebindu ebilekwa, nibio ebia Nyasaye yalobola, kata nende ebienebio ebiraliho ta, mbu ebio ebiliho, abifubie; 29mbu omundu namundu aleshe okhwiyitsiala imbeli waNyasaye. 30Ne niye ouchila nimuli muKristo Yesu, owakholwa obuchesi bwaNyasaye khwifwe, khandi nende obulunjishi, nobwahuli, nobununuli. 31Kho, shinga olwa kahandiikwa, Owiyitsoomia, yeeyitsomilie muMwami.
Currently Selected:
1 Abakorinzo 1: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975