1 Abakorinzo 12
12
Ebihaanwa bieshiRoho
1Ne khumakhuwa kebihaanwa bieshiroho, baana beefwe, shinzenya mbu mukorwe ta. 2Mumanyile mbu olwa mwali nimushili Abamahanga butswa, mwayilwa khubifwanani bilia ebiranyala okhusunga ta, shinga olwa mwakhwesungwa. 3Niko akachila nimumanyia mbu omundu yesi ouboola ari Yesu ali mushilaamo shiobubii, shiaboola mubunyali bwaRoho waNyasaye ta; khandi abulaho ounyala okhuboola ari Yesu niye Omwami, habula mubunyali bwaRoho Omutakatifu.
4Ne biliho ebihaanwa lukano lukano, habula Roho nimulala mwenoyo. 5Buliho obukhalabani lukano lukano, ne Omwami nimulala mwenoyo. 6Buliho obukholi lukano lukano, ne Nyasaye nimulala oukholanga kosi mubosi. 7Buli shia mundu aheebwa obufwimbuli bwaRoho khulwa obukhoonyani. 8Shichila mulala aheebwa khulwa Roho likhuwa liobuchesi; oundi likhuwa liobumanyi, khulwa obunyali bwaRoho tsana; 9oundi obusuubili, khulwa Roho tsana; noundi khandi ebihaanwa biokhuhonia abalwale, khulwa Roho mulala mwenoyo, 10noundi obukholi bwakamakana; noundi obulakusi; noundi obunyali okhwahukhasia abaroho; oundi tsinimi lukano lukano; noundi obukaluli bwetsinimi. 11Ne ako kosi nobukholi bwaRoho mulala mwenoyo, oubakabila buli shia mundu shinga olwa yeenya.
Ebiungo biomubili mulala.
12Shichila shinga omubili olwa kuli mulala, ne kulimwo ebiungo ebinji; khandi ebiungo biomubili olwa bili ebinji, ne nomubili mulala; nolwa Kristo ali ario. 13Okhuba muRoho mulala khweenjisibwa fwesi mumubili mulala munjila yobubatisibwi; kata abaYahudi kata abaYunani, kata abasumba kata abalekhuule; ne khwanyweesibwa fwesi khuRoho mulala mwenoyo. 14Okhuba omubili shikuli eshiungo shilala ta, habula nebinji. 15Eshilenje nishiba nishisunga shiri Isie shindi eshiokhumubili, shichila shindi omukhono ta; ne ako shikachila nishiraba eshiokhumubili tawe. 16Kata eshirwi nishiba nishisunga shiri Isie shindi eshiokhumubili, shichila shindi imoni ta; ne ako shikachila nishiraba eshiokhumubili tawe. 17Mbula, omubili kwosi nikwakhabeele imoni, khane obuhulili bwakhabeele heena? Kwosi nikwakhabeele eshirwi, khane obuhunyilisi bwakhabeele heena? 18Ne bulaano, Nyasaye yaraho buli shiungo mumubili shinga omwene olwa yachama. 19Ne nibiba nibiakhabeele biosi eshiungo shilala, omubili kwene kwakhabeele heena? 20Ne bulaano biliho ebiungo ebinji, ne omubili nimulala. 21Kho imoni shiyinyala okhusunjila omukhono yiri Shikhwenya iwe ta; kata omurwe okhusunjila ebilenje kuri Shimwenya inywe ta. 22Tawe; nebutswa ebiungo ebio ebiokhumubili ebikhuloleshela shinga olwa bili ebitofu, biosi bikhoyeele; 23khandi ebitonye ebio ebiokhumubili ebia khupaarangakhwo mbu bibula oluyali, ebienebio khubifwalanga oluyali olunji; khandi ebitonye ebirakaasa ta bimeetelwa obukaasu; 24nebutswa ebitonye ebikaasu nabio shibili nobutambi ta. Ne Nyasaye yahambania omubili kwosi halala, nashimeetela oluyali shieneshio eshialeema; 25mbu obwahukhani buleshe okhubaho mumubili; habula mbu ebiungo biosi biitsulilanenje birio. 26Ne olwa eshiungo shilala shisaalila, ebiungo biosi bisaalilila halala ninashio; kata eshiungo shilala nishiheebwa oluyali, ebiungo biosi biikhoyela halala ninashio. 27Ne inywe muli omubili kwaKristo, khandi buli mundu neshiungo shiakwo.
28Ne Nyasaye yaraho bano mukanisa; mbu olwambeli abarume, olwakhabili abanabii, olwakhataru abeechesia, mana obukholi bwakamakana, mana ebihaanwa biokhuhonia, obukhoonyi, obwinulisi, tsinimi lukano lukano. 29Bosi nabarume noho? Bosi nabanabii? Bosi nabeechesia? Bosi nabakholi bakamakana? 30Bosi bali nebihaanwa biobuhonii? Bosi baboolelanga mutsinimi? Bosi bakalulanga? Nohomba. 31Ne rekhwo emioyo khubihaanwa ebishila obulayi.
Currently Selected:
1 Abakorinzo 12: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975