1 Abakorinzo 15
15
Obulangushi bwaKristo
1Kho bulaano, baana beefwe, emumanyia amakhuwa keene amalayi aka ndamwilwatsila. Mwakanyoola, muraliile muko, 2khandi muhonibungwa khulwako, nimuba nimuhanda khumakhuwa keene aka ndamwilwatsila--habula obusuubili bweenywe nibwali obukhaya. 3Okhuba olwambeli ndamukaamila akeenako aka ndaheebwa, aka Kristo shinga olwa yafwa khulwa ebionoono bieefwe, shinga amahandiiko olwa kaboola; 4khandi shinga olwa yayabilwa; khandi shinga olwa yalamusibwa mukhufwa khunyanga yakhataru, shinga amahandiiko olwa kaboola; 5khandi shinga olwa yaloleshela Kefa; mana nende abeenabo Ekhumi-nababili; 6mana naloleshela abaana beefwe abashila ebikhumi biraano, bosi halala; ne khubo obunji bwabwe bashiliho okhuula bulaano, ne abandi bamalile okhukona; 7mana naloleshela Yakobo, mana nende abarume bosi; 8nolunyuma lwabosi yandoleshela isie, omukhokosi omwitsukhanwa uno. 9Shichila endi omutuutu khubarume bosi, nindakwanile okhulangwa mbu omurume ta, shichila ndasandinjia ikanisa yaNyasaye. 10Ne khulwa obukoosia bwaNyasaye endi endio shinga olwa endi; kata obukoosiabwe obwa ndaheebwa shibwali obukhaya ta; ne ndanyakhana muno muno, okhubashila bosi; ne shindi nisie ta, habula obukoosia bwaNyasaye obwa ndali ninabwo. 11Kho kata nindi isie, kata nibali bo, nilwo olwa khwilwatsanga, khandi nilwo olwa mwasuubila.
Obulamushi bwabafu
12Ne aka Kristo olwa keelwatsungwa mbu yalamusibwa okhurula mukhufwa, abandi khwinywe basunganga barie mbu bubulaho obulamushi bwabafu? 13Ne nibuba nibubulaho obuIamushi bwabafu, kho kata Kristo shiyalamusibwa ta; 14ne Kristo naba naralamusibwa ta, khane obwilwatsi bweefwe nibutswa, khandi obusuubili bweenywe nibutswa. 15Toto, neefu khunyoolekha nikhurumbulanga akobubeeyi khuNyasaye shichila khwarumbula akobuloli khuNyasaye mbu yamulamusia Kristo; ne khane shiyamulamusia tawe, abafu nibaba nibaralamusibungwa ta. 16Shichila abafu nibaba nibaralamusibungwa ta, kata Kristo shiyalamusibwa ta; 17ne Kristo naba naralamusibwa ta, khane obusuubili bweenywe nibutswa; mushilinji mubionoono bieenywe. 18Khandi abeenabo abakona muKristo bamalile okhutiba. 19Nikhuba nikhunaayilanga muKristo mubulamu buno bwonyene, khuli abamasila mubandu bosi.
20Nebutswa Kristo yalamusibwa okhurula mukhufwa, naba omurongole wabeenabo abakona tsindoolo. 21Okhuba shinga okhufwa olwa khweetsa khulwa omundu, obulamushi bwabafu nabwo bweetsa khulwa omundu burio. 22Okhuba shinga bosi olwa bafwila muAdamu nolwa bosi balalamusibwa muKristo bario. 23Ne buli mundu mutsisinjitsie; mbu Kristo ouli omurongole; mana khukhwitsakhwe, abo abali baKristo. 24Mana obumaliilishi bwitsa olwa alakaamila Nyasaye Samwana obwami; olwa alaba niyaakamiye oburuchi bwosi, nende obukhulundu nende obunyali. 25Okhuba khatimba aruche, okhuula olwa alaba nareele abasukube bosi hasi wamakuluke. 26Ne omusuku oulahelelesia okhutibibwa nokhufwa. 27Shichila mbu Yara biosi muburukwi hasi wamakuluke. Ne olwa yasunga mbu Ebindu biosi biareebwa muburukwi, limanyikha mbu oyo owabira muburukwibwe shialimwo mubindu tsana ta. 28Ne olwa ebindu biosi bilaba nibireelwe muburukwibwe, mana Omwana mwene yesi alareebwa muburukwi bwomwenoyo owara biosi muburukwi bubwe, mbu Nyasaye abe biosi khubosi.
29Ne nikarali kario ta, balakhola barie ababatisibwa khulwa abafu? Abafu nibaba nibaralamusibwakhwo ta, mbushiina nibababatisilibwa? 30Neefu fwesi, khubeetsanga khurio mumatinyu isaa buli saa, mbushiina? 31Baana beefwe, nditsuba khukhwiyitsoomia okhwa endi ninakhwo khwinywe muKristo Yesu Omwami weefwe, mbu efwitsanga buli nyanga. 32Nimba nindalwana nende tsisolo eEfeso, isie omundu namundu, khwakhangaasila shiina, abafu nibaba nibaralamusibwa ta? Leshe khulie nikhunywa, shichila mukamba nakhufwe. 33Muleshe okhukosibungwa; okhuchenda nababii khubiiyinjia ebiima ebilayi. 34Labe tsimoni, nimuroonoona ta; okhuba abandi shibamumanyakhwo Nyasaye ta; emboola endio okhumufwimbia emirwe.
Omubili kwobulamushi
35Fwana oundi alareeba mbu Abafu balamusibwa barie? Khandi nemibili echiambia shiina echia beetsa okhwitsa ninachio? 36Omusilu iwe, eshia oraakanga iwe omwene shishilamusibwa nishirafwile ta; 37kata eshio eshia oraaka, shioraaka omubili okulibaho ta, habula imwo ikhaya, haundi eyeingano, haundi eyeimbia yindi; 38ne Nyasaye achiheelesinjia omubili shinga olwa achama, buli imwo nomubili kwayo. 39Inyama yemibili chiosi shiyili inyama ndala ta; ne yiliho eyabandu, neinyama yindi yetsisolo, neinyama yindi yamanyonyi, neyindi eyetsinyeeni. 40Khandi chiliho emibili echieshineekulu, nende emibili echieshinashialo; ne oluyali lwa echio echieshineekulu chili khubwalwo, nende olwa echio echieshinashialo chili khubwalwo. 41Luliho oluyali lulala Iweliuba, noluyali lundi olwomwesi, noluyali lundi Iwetsinyininyini; okhuba kata inyininyini ndala yinyala okhwahukhana nende eyindi oluyali. 42Ne nindio obulamushi bwabafu buli burio. Kuraakwa mumela yobuboli, kulamusibwa mumela eyirabola ta; 43kuraakwa mubufwolwi, kulamusibwa muluyali; kuraakwa mubuteshele, kulamusibwa mubunyali; 44kuraakwa omubili kwoburulanda; kulamusibwa omubili kweshiroho.
Nikuba nikuliho omubili kwoburulanda, kuliho khandi omubili kweshiroho. 45Kario kahandiikwa mbu Omundu owambeli, Adamu, niyeekhola omwoyo okuli nobulamu. Naye Adamu owobumaliilishi naba roho ouhaana obulamu. 46Nebutswa shishili eshieshiroho eshiranjilila okhubaho ta, habula eshili eshioburulanda; mana eshili eshieshiroho nishirakhwo. 47Omundu wambeli nowokhulufu Iweshialo; omundu wakhabili nowomwikulu. 48Ne shinga omundu oyo wolufu olwa ali, nolwa bosi abali bolufu bafwana bario; ne shinga oyo owomwikulu olwa ali, nolwa bosi abali bomwikulu bafwana bario. 49Ne shinga olwa khwafwanana khwikondo liowolufu, nindio khulifwanana khwikondo liowomwikulu khurio.
50Ne bulaano, baana beefwe, esunga mbu omubili kweinyama namabanga shikunyala okhulaamilwa obwami bwaNyasaye ta; kata eshieimela yobuboli okhulaamilwa eshieimela yoburabola ta. 51Lole, emuboolela akelibiso: mbu Shikhulakona tsindoolo fwesi ta, ne fwesi khulakalulwa, 52shialwangu, mushise shiokhutemiliamwo butswa imoni, olwika olumaliilikha olwa lulikhupa; okhuba olwika lulilanga, mana abafu balilamusibwa mumela yoburabola ta, fwesi nikhukalulwa. 53Okhuba obuboli buno bukhoyile okhwifwala oburabola ta; khandi obufwitsanga buno bukhoyile okhwifwala oburafwitsanga ta. 54Ne obuboli buno olwa buliba nibwifwalile oburabola ta, khandi obufwitsanga buno olwa buliba nibwifwalile oburafwitsanga ta, habwenaho likhuwa liliusibwa eliahandiikwa, mbu Okhufwa khumilishiile mukhuhula. 55Iwe okhufwa, okhuhulakhwo khuli heena? Iwe okhufwa, olubalalwol luli heena? 56Olubala Iwokhufwa nobwonooni; nobunyali bwobwonooni burula mumalako; 57ne khumuupile Nyasaye orio, oukhunyalilanga okhuhula khulwa Omwami weefwe Yesu Kristo. 58Khulwako, baana beefwe abaheelwa, simbiilenje nimuralila, nimushilaana mumilimo chiOmwami tsindaalo tsiosi, okhuba mumanyile mbu muMwami, emilimo chieenywe shichili emikhaya ta.
Currently Selected:
1 Abakorinzo 15: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975