2 Abakorinzo 1
1
Amashiesio
1Eyirula khuPaulo, omurume waKristo Yesu khulwa okhwenya khwaNyasaye, halala nende omwana weefwe Timotseo; yule khukanisa yaNyasaye eyili eKorinzo, halala nende abatakatifu bosi abali mwAkhaya mwosi:
2Obukoosia bube khwinywe, nende omulembe, ebirula khuNyasaye Seefwe nende khuMwami Yesu Kristo.
Paulo yakhupa orio, olunyuma lwamatinyu
3Oyo ouli Nyasaye wOmwami weefwe Yesu Kristo khandi Samwana, yeetsoomibwe; neniye Seefwe owetsimbabasi tsiosi, khandi Nyasaye wobutinyisii bwosi; 4oukhutinyisinjia mumasila keefwe kosi, mbu neefu khunyalilwe okhubatinyisia abali mumatinyu kosi kosi, khulwa obutinyisii obwa ifwe khwatinyisibwa nende Nyasaye. 5Shichila shinga obusaalili bwaKristo olwa bushilaana nibuula khwifwe, nolwa obutinyisibwi bweefwe nabwo bushilaana khulwa Kristo. 6Ne kata nikhusandibwa, khuli khulwa obutinyisibwi bweenywe nobuhonibwi bweenywe; kata nikhutinyisibwa, khuli khulwa obutinyisibwi bweenywe, obwitsanga olwa mwifwila obusaalili bwene obwa khusaalisibwa ifwe; 7ne khuli nobunaayi oburalilu khulweenywe; nikhumanyile mbu shinga olwa musanjilana khubusaalili, nolwa musanjilana murio khubutinyisibwi.
8Shichila, baana beefwe, shikhwenya mbu mukorwe akobusandibwi bweefwe obwakhukwila mwAsia ta; shinga olwa khwasitohelwa muno okhushila aka khwanyala, okhuula olwa khwarusiakhwo omwoyo khumapaaro kobulamu; 9toto, kata ifwe abeene khwapaara mbu khumalile okhukhalachilwa eshiina shiokhufwa; mbu khuleshe okhwisiika abeene ta, habula okhumwisiika Nyasaye oulamusinjia abafu. 10Ye yakhuhonia mukhufwa okhubii okhwo, khandi alakhuhoninjia. Ne obunaayi bweefwe khubureele khuye, mbu alatsiililila okhukhuhoninjia, 11inywe nimuba nimukhoonyana halala khulweefwe mukhusaaya khweenywe; mbu mana abanji bakhupe mbu orio khulweefwe, khulwa eshihaanwa eshia khwaheebwa eshiarula khubandu abanji.
Obucheni bwaPaulo bwakalusibwa inyuma
12Ne elia khwiyitsialila ndielino, mbu oburumbusi bwemioyo chieefwe, shinga olwa khweeyila mushialo nokhushila muno khwinywe; okhuba khwali mubutakatifu nende eshiilongoole shiaNyasaye; shikhwali mubuchesi bweshinamubili ta, habula mubukoosia bwaNyasaye. 13Shikhumuhandiichila akandi khandi ta, habula akeenako aka musoomanga kata aka mumanyile; khandi esuubila mbu mulikamanya okhuula khubumaliilishi; 14shinga olwa mwakhumanyakhwo hati mbu nifwe abachilanga nimwiyitsiala, shinga inywe olwo muchilanga nikhwiyitsiala if we, khunduukho yOmwami weefwe Yesu.
15Nisuubilanga endio, ndali ninzenyile okhumwitsila olwambeli, mbu munyoole obukoosibwi obwokhubili; 16mana mbu embirile khwinywe okhuula eMakedonia; nokhurula eMakedonia, mbu engalushe eweenywe, ninyungulwa nineenywe khuluchendo lwanje IwebuYahudi. 17Kho olwa ndali ninzenyanga endio ndali omushiukhashiukhani noho? Kata olwa erakhwo omwoyo khwikhuwa, engureetsangakhwo eshinamubili, mbu omwene emboole mbu Ee, ee, nende Tawe, tawe? 18Ne shinga Nyasaye olwa ali omwisiikwa, likhuwa lieefwe khwinywe shiliali mbu Ee nende Tawe, ta. 19Okhuba Omwana waNyasaye, Yesu Kristo, owa khwamwilwatsila, isie naSiliwano naTimotseo, ye shiyali Ee nende Tawe, ta; ne akali muye ni Ee. 20Khubusuubisie bwaNyasaye bwosi bwosi, aka Ee kali muye; niko akachila nikhusunga mbu Amina khululwe, khuluyali lwaNyasaye. 21Oukhutinyisia muKristo, halala nineenywe, nakhutsukhakhwo amafura, niNyasaye; 22omwenoyo owakhurakhwo iseyi, nakhuheelesia Roho mumioyo chieefwe, abe khwifwe omusingo.
23Emulanga Nyasaye abe omuloli wanje mbu okhumuhonokosia inywe nikhwo okhwachila ndaloba okhwitsa eKorinzo. 24Shikali mbu khwamihanga khubusuubili bweenywe ta; habula khukhoonyananga nineenywe khulwa okhwikhoya khweenywe; okhuba muralilanga.
Currently Selected:
2 Abakorinzo 1: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975