2 Abakorinzo 5
5
1Lolekha ta nebiobumeli. Shichila khumanyile mbu inzu yelitili yeefwe eya khuli ninayo mushialo niyiba niyilikululwa, khuli nende inyumbashe eyirula ewaNyasaye, inzu eyiroombakhwa namakhono ta, eyobumeli, eyili mwikulu. 2Okhuba toto mwene, olwa khushili muyino khubindanga, nikhwikomba okhuchelekhwakhwo eshimenyo shieefwe eshirula mwikulu; 3mbu nikakhaba mbu khwafwalwa khurio khuleshe okhunyoolekha nikhuli eshihechenye. 4Okhuba nitoto, ifwe abali mwitili lino, okhubinda khubidanga, nikhusitohelwa; shikali mbu khwakheenya okhufwalulwa ta, habula mbu khwenya okhuchelekhwakhwo eshindi, mbu mana obufwitsanga bumilishile mubulamu. 5Ne owakhukasia khulwa likhuwa liene lino niNyasaye; ne yakhuheele Roho abe omusingo.
6Kho buli lwosi khubeetsanga abeikholo nyumu, nikhumanya mbu olwa khushili eweefwe yino, eshisina mbu mumubili, ewOmwami khubeetsanga nikhubulayo; 7okhuba khuchendanga nikhusuubila, ne okhulola ta; 8esunga mbu khubeetsanga abeikholo nyumu, ne khwakheenya okhuba nikhubulaho mumubili, nikhuba eweefwe, mbu halala nende Omwami. 9Niko akachila, kata nikhuli eweefwe, kata nikhubulaho khureetsangakhwo omwoyo khuchamwe imbeliwe. 10Okhuba fwesi khukhoyile okhumanyikha imbeli weshifumbi-shiobuyaasii shiaKristo mbu buli mundu akalusilibwe ako aka yakhola nali mumubili, aka yakhola shinga olwa kali, kata amalayi kata amabii.
Obukhalabani bwobusaasani
11Niko akachila, olwa khumanyile akokhuria Omwami shinga olwa khuli, khuhombelesinjia abandu; ne ifwe khumumanyishila Nyasaye; khandi esuubila mbu khumanyishila emioyo chieenywe chiosi. 12Shikhwipaaka imbeli weenywe khandi ta, nebutswa khumuheelesia inywe obwiyangu okhukhwiyitsialila, mbu mube nende elia mubakalusiamwo abo abeeyitsialila ako akaloleshela elwanyi, akarali akomumwoyo tawe.
13Okhuba kata nikhulaluushe, kali khulwa Nyasaye; nohomba kata nikhuli nobuchesi habwene, kali khulweenywe. 14Okhuba obuheeli bwaKristo bukhuhachilisinjia; shichila khuluutsi mbu olwa mulala yafwila bosi, kho bosi bafwa; 15ne yabafwila bosi, mbu abali mwoyo baleshe okhubeetsangaho mwoyo abeene bonyene ta, habula khu oyo owafwa khulwabwe nalamukha khandi. 16Ne niko akachila ifwe khuleshile okhupaaranga khumundu yesi mumela yomubili; ne kata nikhwamupaarakhwo Kristo mumela yomubili, bulaano shikhushimupaarangakhwo khurio khandi ta. 17Okhuba omundu yesi naba nali muKristo, aba omulonje omuyia; amakhuwa kakhale kaba nikamalile okhubira; lole, kosi keekaluule amayia. 18Ne kosi karulanga khuNyasaye, owakhusaasania ninaye omwene khulwa Kristo, nakhuheelesia ifwe obukhalabani bwobusaasanii; 19eshisina mbu Nyasaye yali muKristo nasaasania eshialo ninaye omwene, narababasilia obukhayi bwabwe ta; ne yakhulesheele ifwe likhuwa elo liobusaasanii.
20Iiho khuli abarumwa mushilenje shiaKristo; kali shinga olwa Nyasaye asaayilanga muminwa chieefwe; mbu mushilenje shiaKristo khumulaama, mbu musaasanibwe nende Nyasaye. 21Oyo ouramanya obwonooni bwosi ta, Nyasaye yamukhola abe obwonooni khulweefwe; mbu ifwe mana khube obulunjishi bwaNyasaye.
Currently Selected:
2 Abakorinzo 5: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975