Ebikhole 23
23
1Mana Paulo yoomisia tsimoni okhuhenga khubeshiina, naboola mbu Baana beefwe, ndayeechendelesiyenje imbeli waNyasaye nende omwoyo omulayi okhuula olwa leelo. 2Ne Omukuhani Omukhulundu Anania yabalaka abasinjiile ahambi ninaye mbu bamukhupe omunwa. 3Mana Paulo namusunjila ari Nyasaye alakhuupa nawe, iwe lisisi elibashilwe lilongo; wikhaale okhu'yaasia khunjila yamalako, ne khandi olaka mbu ekhupwe khunjila eyifukula amalako? 4Nabo abali nibasinjiile ahambi ninaye nibasunga bari Khane onyeka Omukuhani Omukhulundu waNyasaye? 5Paulo nasunga mbu Baana beefwe, shimbeele nimanyile shinga olwa ali Omukuhani Omukhulundu ta; okhuba kahandiikwa mbu Oraboola obubii khumwimilis iyesi wabandu beenywe tawe.
6Ne olwa Paulo yalola mbu khubaliho abandi khubo nabaSadukayo, nabandi nabaFarisayo, yachinga omwoyo mushuina, ari Baana beefwe, isie endi omuFarisayo, khandi omwana wabaFarisayo; eyaasibungwa khulwa amakhuwa kobunaayi bwobulamushi bwabafu. 7Ne olwa yali naboolile ario, obuyingani nibwikhola hakari wabaFarisayo nabaSadukayo; omukhung'aano nikukabukhana. 8Shichila abaSadukayo baboolanga mbu bubulaho obulamushi bwosi bwabafu, kata malaika kata roho; ne abaFarisayo bakafuchiilila kosi. 9Obuyoka nibwikhola obukhongo; abandi abokhubahandiichi abali halubeka lwabaFarisayo nibasinjila nibabayingania obutinyu, bari Shikhuluutsi libii liosi mumundu uno ta; ne kakhaba karie, roho naba nasungaane ninaye toto, kata malaika? 10Mana olwa obuyingani bweekhola obukhongo, omuseesia omukhulundu yaria mbu bakhamwabula Paulo ebitonye ebitonye; kho yalaka abasikari okhwikha bamurusie mubo nende amaani, bamuleere munzu yobulindi.
11Mana mushilo shieneshio Omwami yamufutushila, naboola mbu Lema omwoyo; okhuba shinga olwa warumbuule akobuloli khwisie eYerusalemu, nindio okhoyile okhurumbula akobuloli kata eRoma yosi.
Obukhobani okhwira Paulo.
12Ne olwa bwashia mutsuli, abaYahudi basanjilana nibeeboha mushiitsubo, mbu shibakhalia kata okhunywakhwo ta, okhuula olwa bakhaba nibamwirile Paulo. 13Ne abali khubukhobani obwo bali abandu abashila amakhumi kane. 14Nibeetsa ewabakhulundu babakuhani nende abakofu, nibasunga bari Ifwe khwiboyile mushiitsubo eshikhongo, mbu shikhulakoonyelela khushindu shiosi ta okhuula olwa khuba nikhumalile okhumwira Paulo. 15Khulwako, inywe halala nende abeshiina mumuboolele omuseesia omukhulundu mbu amukholomosie ewa muli, shinga abeenya okhunoonelesia amakhuwake mbu mana mukhalache eshiina; neefu khwikasiye okhumwira nashili kata okhuula ahambi ta.
16Ne omwihwa waPaulo omusiani yahulila akobukonesheli bwabwe; kho yatsia niyeenjila munzu yobulindi namuboolela Paulo. 17Mana Paulo yalanga oundi owokhubaseesia, nasunga mbu Yila omusooliili uno ewomuseesia omukhulundu; okhuba ali namakhuwa aka yeenya okhumuboolela. 18Kho yamubukula namuyila ewomuseesia omukhulundu, nasunga ari Paulo omubohe oyo yananjile nasaba mbu eleere omusiani uno khwiwe, okhuba ali nende amakhuwa aka yeenya okhukhusunjila. 19Omuseesia omukhulundu namutiila omukhono natsia elubeka, namureeba mabiswi ari Nelikhuwa shiina elia wenya okhumboolela? 20Naye nasunga ari AbaYahudi bafuchilisaniye okhukhusaba mbu omukholomosie Paulo mukamba okhumuyila mushiina, shinga owenya okhureebelesia bulayi khumakhuwake. 21Kho orahulila akabwe ta; okhuba abandu abashila amakhumi kane khubo bamukonesheele, nibeeboyile mushiitsubo oburalia kata okhunywakhwo ta okhuula olwa balaba nibamwirile; ne bulaano beerecheeshe, nibalindiilila obusuubisiebwo. 22Kho omuseesia omukhulundu yamuseebula omusooliili oyo, namukaania mbu Oraboolela omundu yesi shinga olwa umanyiye amakhuwa kano ta.
Paulo yayilwa ewaFeliki, omukafuna
23Nalanga babili abokhubaseesia, nasunga mbu Recheshe abasikari ebikhumi bibili okhutsia okhuula eKaisaria, nabachendela khufarasi amakhumi musaafu, nabamafumo ebikhumi bibili, khusaa yakhataru eyomushilo. 24Nabalaka okhukasia emiruko mbu Paulo aniinekhwo nayilwa shisale ewaFeliki omukafuna.
25Nahandiika ibarwa eyifwana yiri: 26mbu Okhurula khuKilaudio Lisia; yule khuwoluyali kafuna Feliki; amashiesii khwiwe. 27Omundu uno yahambilwe nende abaYahudi, nali ahambi okhwirwa ninabo, mana isie nende abasikari khwabanyoolelesia, nikhumuhonia, nikhuhuliile shinga olwa ali omuRoma. 28Ne olwa ndeenya okhumanya eshifune eshichilile nibamwinjilila, ndamukholomosia nimuleera mushiina shiabwe; 29ninyoola mbu yeenjiliilwe khulwa amakhuwa kamalako kabwe; ne shiyayeenjililwa khwikhuwa liosi elikwanile okhufwa kata okhubohwa ta. 30Mana olwa embooleelwe mbu bwakhabaho obukhobani khumundu uno, emurumile khwiwe nonoho, nimbalaka abeenjililibe bamufukulile imbeliwo.
31Kho abasikari babukula Paulo shinga olwa balachilwe, nibamuyila eAndipatiri mushilo. 32Ne mukamba balekha abo abachendela khuFarasi mbu batsie ninaye, nabo nibakalukha ebunanzu yobulindi. 33Nabo olwa boola eKaisaria baheelesia kafuna ibarwa, khandi nibaleera Paulo yesi imbeliwe. 34Ne olwa yali nachisoomile yareeba mbu nowomuburuchi shiina; ne olwa yahulila mbu noweKilikia, 35yasunga ari Ndalahulila amakhuwako olwa abeenjililibo nabo baba nibeetsile; nalaka mbu alindwe munzu yobulindi yaHerode.
Currently Selected:
Ebikhole 23: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
