Ebikhole 24
24
Okhusitaakwa khwaPaulo
1Ne olunyuma lwetsindaalo tsiraano Omukuhani Omukhulundu Anania yakholomokha halala nende abakofu bandi, khandi nende omutereli undi, mbu Terutulo; nibamuboolela kafuna amakhuwa akokhumufukula Paulo.
2Ne olwa yalangwa, Terutulo yachaaka okhumwinjilila, ari Olwa kali mbu niwe ouchila nikhumenya eshisiche mulembe, khandi mbu akali nikabiiyile mwihanga lino kakasibungwa khulwa obulindibwo, 3khukabukula buli lwosi kata buli hosi nende okhwishia muno, owoluyali Feliki. 4Ne mbu endeshe okhukhuchoonyia, ekhusaaya mbu khulwa obukoosiabwo okhuhulile mumakhuwa amatuutu. 5Okhuba khunyoolile omundu uno nali eshinoko shiokhunyasia, khandi noubuusinjia induli mubaYahudi abomubialo biosi, khandi nomwimilisi womwahukho kwabaNazorayo. 6Khandi yateema okhwonoonia ihekalu yeefwe; neefu nikhumuhamba, [nikhwenya okhumuyaasia amalako keefwe shinga olwa kali. 7Ne omuseesia omukhulundu Lisia niyeetsa, namurimula mumakhono keefwe nende amahababa, 8nalaka abeenjililibe okhwitsa imbeliwo.] Ne iwe omwene, nomureebelesiye, witsa okhunyoola khuye omwene amakhuwa ako kosi shinga olwa kali aka khumwinjiliile ninako. 9AbaYahudi nabo niboongana ninaye mubwinjilili obwo, nibatinyisia mbu nolwa amakhuwa ako kali.
Paulo yeeteetsa imbeli waFeliki
10Ne olwa kafuna yali namusimile mbu aboole, Paulo yakalusia, mbu Okhuba emanyile shinga olwa wabeelenje omuyaasii weshiina khwihanga lino emiyika eminji, kho emboola akokhwiteetsa khwanje nobusangaali; 11okhuba onyala okhumanya mbu shitsili tsindaalo etsishila ekhumi natsibili okhurula olwa ndatikulukha ninzia eYerusalemu okhwinamilayo Nyasaye. 12Ne shibayanyoola muhekalu niyingananga nende omundu yesi, kata okhubuusia indiri mubandu, kata mutsisinagogi kata mwitookho ta. 13Kata amakhuwa aka banzinjiliile ninako bulaano, shibanyala okhulolosia mbu nakatoto imbeliwo ta. 14Ne kano ndiyama imbeliwo, mbu ekhalabanilanga Nyasaye wabakuuka beefwe khuNjila yeneyo eya balanga mbu omwahukho, nisuubilanga amakhuwa kosi akali akamalako, kata akahandiikwa mubitabu biabanabii; 15nindi nobunaayi khuNyasaye obwa kata bano abeene balindiililanga, mbu bulibaho obulamushi bwabalunjishi nende abarali abalunjishi ta, bosi. 16Ne khulwa likhuwa elo endeemanga shinga olwa enyala okhuba nomwoyo okubula eshiuku imbeli waNyasaye nende abandu tsindaalo tsiosi.
17Ne bulaano, inyuma wemiyika echihelile ndayeetsile okhuleerela lihanga lieefwe ebietsimbabasi nende ebihaanwa. 18Ne nikholanga endio, banyoola nisiiyilwe nindi muhekalu, omukanda nikubulaho kata indiri yosi ta; ne baliho abaYahudi bandi abarula ebuAsia, 19nabo babeele nibakhoyeele babe hano imbeliwo, mbu banzinjilile, nibaba nibali nende likhuwa liosi khwisie. 20Kata abandu bano abeene babuule, mbu neshionoono shiina eshia banyoola nindi ninashio, olwa ndasinjila imbeli weshiina, 21habula nilili lisungo lino elala lionyene elia ndalanjilisia nisinjiile mubo, mbu Eyaasibungwa imbeli weenywe inyanga yino khulwa amakhuwa kobulamushi bwabafu.
Paulo yalindwa mubuhambe
22Nebutswa Feliki, olwa yamanya habwene amakhuwa keInjila eyo, yabalaka mbu balinde, ari Olwa Lisi a omuseesia omukhulundu aliba niyeetsile, ndilikhalaka amakhuwa keenywe. 23Mana nalaka omuseesia mbu alindwe bulayi, ne mbu alekhuulungwekhwo; khandi mbu arakaania omundu yesi owomubeetsabe oburamukhalabanila ta.
24Nolunyuma Iwetsindaalokhwo, Feliki niyeetsa halala nende Durusila omukhasiwe, owali omuYahudi, narumana okhulanga Paulo, nahulila khuye amakhuwa kobusuubilili muKristo Yesu. 25Ne olwa yakhupa imbakha khumakhuwa kobulunjishi, nobwiruchi, nende eshiina eshiitsa okhubaho, indenga yamutiila Feliki, mana nasunga ari Onyala okhutsia bulaano; ninyoolile obwiyangu ndakhakhulanje. 26Khandi yali nanaayanga mbu yakhanyoola amapeesa khuPaulo; niko akachila narumananga okhumulanga khandi akhanji, nabuutsanga ninaye.
27Ne olwa emiyika chiali nichihweele chibili, Porukio Fesito yeenjisibwa muburuchi mushilenje shiaFeliki; naye Feliki yamulekha Paulo mumbohe, shichila yali niyeenya okhuchamwa nende abaYahudi.
Currently Selected:
Ebikhole 24: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
