Ebikhole 8
8
1Ne olwa yali nasunjile ario, nakona. Naye Saulo yali nafuchiiliile okhwirwakhwe.
Saulo yasakania abeikanisa
Mana khunyanga eyo obusandibwi obukhongo nibubuukha khukanisa eyali eYerusalemu; nabo nibasalaasibwa hosi hosi mumbali tsiebuYahudi nende Samaria, habula abarume bonyene. 2Abandu bandi abaria Nyasaye nibamuyabila Sitefano, nibamwikhuula muno. 3Naye Saulo yoonoonia ikanisa, niyeenjilanga mubuli inzu, nakhwesa abandu abasaatsa nabakhasi, nabahaana okhubohwa mumbohe.
Injiili yeelwatsilwa muSamaria
4Kho abo abasalaasibwa hosi hosi bachenda bario nibeelwatsa likhuwa elo. 5Naye Filipo yakholomokha natsia khwitookho liaSamaria, nabarumbulila Kristo. 6Abemikanda nabo nibarechelesia nende omwoyo mulala amakhuwa aka Filipo yaboola, olwa bakahulila nibalola ebilolelo ebia yakhola. 7Okhuba abaroho beshifwabwi barula mubandu abanji abalinji ninabo, nibayiiba nende omwoyo omukhongo; abanji abalinji abamakara, kata abetsindieku, nibahonibwa. 8Okhwikhoya nikhubaho okhunji mwitookho omwo.
9Ne yaliho omundu undi oweliiralie Simoni, owalinji nakholanga obufumu mwitookho elo, nahuchisia abelihanga liabaSamaria, niyeefumia shinga olwa ali omundu omukhongo. 10Ne bosi bali nibamurechelesinjia, okhurula khubatuutu okhuula khubakhongo, nibasunga bari Omundu uno niye obunyali bwaNyasaye, oulangwa mbu Omukhulundu. 11Nibamurechelesinjia, okhuba okhurula khale yabahuchisinjia nende obufumubwe. 12Nebutswa olwa bamusuubila Filipo, niyeelwatsanga amakhuwa amalayi akobwami bwaNyasaye, nende eliira liaYesu Kristo, babatisibwa, abasaatsa nende abakhasi. 13Kata Simoni omwene yesi yasuubila, ne nabatisiibwe, yahanda khuFilipo; ne olwa yalola ebilolelo nende akamakana nibikholwa, yaliibwa ling'ang'a.
14Haho olwa abarume abali eYerusalemu bahulila shinga Samaria olwa yali niyifuchiiliile likhuwa liaNyasaye, babarumila Petero nende Yohana; 15nabo olwa bali nibakholomoosheyo, babasaayila mbu banyoole Roho Omutakatifu; 16okhuba yali nashili okhwishila omundu yesi khubo ta; habula mbu bali nibabatisibwa muliira liOmwami Yesu. 17Mana nibabarakhwo emikhono chiabwe, nabo nibanyoola Roho Omutakatifu.
18Ne olwa Simoni yalola shinga olwa Roho Omutakatifu yahaanwa khulwa okhureebwakhwo emikhono chiabarume, yeenya okhubaheelesia amapeesa, 19ari Mumbeelesie siesi obunyali buno, mbu omundu yesi owa erakhwo emikhono, anyoole Roho Omutakatifu. 20Mana Petero namusunjila ari Ifeetsayo yitibile halala ninawe, okhuba okaalile mbu wakheenyoolela omwene eshihaanwa shiaNyasaye khulwa amapeesa. 21Shiolikhwo nobusanji kata omukabo kwosi mwikhuwa lino, okhuba omwoyokwo shikuli habwene imbeli waNyasaye ta. 22Kho wikalukhasie orule mubumayaanubwo buno, nosaaya Omwami mbu haundi oleshelwe obuyililisii obwomumwoyokwo. 23Okhuba enduutsi shinga olwa oli omululu pia, khandi oli omubohe wobubii. 24Simoni nakalusia, nasunga ari Musaayile ewOmwami, mbu amakhuwa aka muboolile kaleshe okhungwakhwo, kata elala khuko ta.
25Kho mana olwa bali nibarumbuule akobuloli nende okhuboola likhuwa liaNyasaye, bakalukha eYerusalemu, nibayaala Injiili mumataala amanji kabaSamaria.
Filipo nende omusumba omulate oweEtsiopia
26Ne malaika wOmwami yamuboolela Filipo ari Rula otsie elubeka lwesautsi, khunjila yeshikholomokho okhurula eYerusalemu okhuula eGaza; nayo neyomushitsiimi. 27Kho narula natsia; ne lola, omundu weEtiopia, omulate, omundu wobunyali hasi waKandake omukhasi omuruchi waEtiopia, owalindanga amabiishiloke kosi; ne yali niyeetsile eYerusalemu khulwa okhwinamila Nyasaye. 28Yali nachelelanga, niyeekhaale mwikaarilie nasooma eshitabu shiomunabii Isaya. 29Roho namuboolela Filipo ari Sitakhwo ahambi, wiyunje khwikaari lino.
30Filipo natsia ewa yali tsimbilo, namuhulila nasooma eshitabu shiaIsaya omunabii, nareeba ari Omanyile aka osooma neshisina shiene? 31Naye nasunga ari Ndakhanyala okhumanya endie, naraliho ounzibaalila? Namusaaya Filipo mbu aniine yeekhale ninaye.
32Ne eshitonye eshiomumahandiiko eshia yali nasoomanga shieshino, mbu
Yayilwa shinga likondi khukhwirwa,
khandi shinga eshimeeme olwa shiholeelela abashiteta obwoya,
nolwa arachinga omunwa ta.
33Mubwituutuyibwe eshiinashie shiamuyinibwakhwo;
olwibulolwe, niwina oulalurumbula?
Okhuba obulamubwe buyinibwa mushialo.
34Omulate oyo namukalusia Filipo, nasunga ari Chama umboolele, niwina owa omunabii yaboolakhwo ako? Khumwene, nohomba khuwundi? 35Mana Filipo narumbukha, nachaachila khwihandiiko lienelo, namwilwatsila amakhuwa amalayi kaYesu. 36Ne nibashitsiililila bario khunjila, boola khumatsi; omulate nasunga mbu Lola, amatsi ngakano; nishiina eshingaya oburabatisibwa ta? 37[Filipo nasunga mbu Noba nosuubila nende omwoyokwo kwosi, onyala. Naye nakalusia, nasunga mbu Esuubila shinga Yesu Kristo olwa ali Omwana waNyasaye.] 38Mana nalaka mbu likaari lieme; nibeekha mumatsi bombi, Filipo nende omulate; namubatisia. 39Ne olwa bali nibatikuluushe okhurula mumatsi, Roho wOmwami yayiniaho Filipo; omulate oyo naramulola khandi ta, okhuba yatsiililila khunjila niyeekhoya. 40Habula Filipo yaloleshela eAzoto; ne nabirangamwo yeelwatsila amataala kosi Injiili, okhuula olwa yoola eKaisaria.
Currently Selected:
Ebikhole 8: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
