Ebikhole 9
9
Okhwikalukhasia khwaSaulo
(Ebikh. 22.6-16; 26.12-18)
1Naye Saulo, nashiikhana nasiomal akobwiri khubeechi bOmwami, yatsia ewOmukuhani Omukhulundu, 2namusaba tsibarwa etsia natsie ninatsio eDamasiko, khutsisinagogi, mbu naba nanyoola abandi abali beInjila eyo, kata abasaatsa kata abakhasi, abaleere eYerusalemu nibaboyilwe. 3Ne olwa yali nashichenda, yoola ahambi nende Damasiko; nonoho obulafu oburula mwikulu nibumwashila tsimbeka tsiosi; 4nakwa hasi, nahulila omwoyo nikumusunjila mbu Saulo, Saulo, usandinjia mbushiina? 5Nakalusia mbu Niwe wina, Omwami? Naye ari Nisie Yesu, owa osandinjia; 6ne buukha, winjile mwitookho, mana noboolelwe aka okhoyile okhukhola. 7Nabo abandu aba yachenda ninabo beema, nibang'ang'aala, shichila bahulila omwoyo, nibaralola omundu yesi ta. 8Mana Saulo yabuukha hasi; ne olwa tsimonitsie tsiatimbukha, shiyalola eshindu ta; nibamutiila omukhono, nibamwinjisia eDamasiko. 9Namala tsindaalo tsitaru naralolanga eshindu ta; kata shiyalia kata okhunywa eshindu shiosi ta.
10Ne yaliho eDamasiko omwechi undi owalangwa mbu Anania; Omwami nasungana ninaye mwibisulo, ari Anania. Nakalusia ari Endiho, Omwami. 11Omwami namusunjila ari Rula otsie khunjila eyilangwa mbu Inunji, okhaabe munzu yaYuda omundu oulangwa mbu Saulo, omundu weTaruso, okhuba lola, ali mukhusaaya; 12khandi aluutsi omundu oulangwa mbu Anania niyeenjila namurakhwo amakhono mbu anyalilwe okhulola. 13Ne Anania nakalusia mbu Omwami, ndahuliile khubandu abanji akomusaatsa oyo, obunji bwamabii aka yakholeele abatakatifubo abali eYerusalemu; 14ne kata hano ali nobunyali obwa yaheebwa nende abakhulundu babakuhani okhuboha bosi abahaabilila eliiralio. 15Ne Omwami namusunjila mbu Tsia butsia; shichila neshikholelo shianje eshilobole, okhuchinga eliira lianje imbeli wAbamahanga, nende abaruchi, nende abaana baIsiraeli; 16okhuba ndalamumanyia amakhuwa shinga olwa kali amanji aka akhoyile okhwifwila khulwa eliira lianje.
17Mana Anania natsia niyeenjila munzu eyo; namurakhwo amakhono, namusunjila ari Omwana weefwe Saulo, Omwami yarumile, niye Yesu, owakhulolesheele noli khunjila eya wayeetseelekhwo, mbu onyalilwe okhulola khandi, niwitsusibwa Roho Omutakatifu. 18Habwene nahabwene ebindu nibirula khumonitsie nibikwa, ebifwana shinga tsinzubu, naye nanyalilwa okhulolanabuukha, nabatisibwa; 19mana nalia, nanyoola amaam.
Saulo yeelwatsila eDamasiko
Ne yabayo tsindaalokhwo nende abeechi abali eDamasiko. 20Ne habwene nahabwene yeelwatsa akaYesu mutsisinagogi, shinga olwa ali Omwana waNyasaye. 21Bosi abamuhulila nibachenya, nibasunga bari Uno shiali niye owasishia abeenabo abahaabila eliira lino ebweneyo eYerusalemu? Kata abeele niyeetsile yino khulwa likhuwa lienelo, mbu abayile imbeli wabakhulundu babakuhani nibaboyilwe. 22Naye Saulo yameetekha amaani, nabakoyaasia abaYahudi abamenya eDamasiko, nabamanyia habwene mbu uno niye Kristo watsana.
Saulo yahonibwa mumakhono kaba Yahudi
23Ne olwa tsindaalo tsiali nitsihweele tsinyinji, abaYahudi basanjilana halala okhumwira; 24habula obukhobi bwabwe bwamanyishila Saulo. Khandi bali nibahenganga ebilibwa eshiteere nende eshilo, mbu bamwire. 25Ne abeechibe bamubukula mushilo, nibamukholomosia mulukoba, nibamwisilia mushimwelo.
Saulo nali Yerusalemu
26Ne olwa yali niyoolile eYerusalemu, yateema okhwiyunga khubeechi; nabo bosi nibamuria, nibarasuubila shinga olwa ali omwechi ta. 27Habula Baranaba yamubukula, namuleera ewa abarume bali, nabatoonyela shinga olwa yalola Omwami khunjila, nasungana ninaye, khandi shinga olwa yeelwatsa katong'ane muliira liaYesu eDamasiko. 28Mana naba ninabo halala eYerusalemu, nasamulanga nende okhuchelela, 29niyeelwatsanga katong'ane muliira liOmwami; khandi yasunganga nayingania abaYahudi beshiYunani, nabo nibateema mbu bamwire. 30Ne olwa abaana beefwe bamanya shinga olwa kali, bamukholomosia nibamuleera eKaisalia, nibamuruma eTaruso.
31Kho ikanisa eyomubuYahudi naGalilaya naSamaria yosi niyiba nomulembe, niyumbakhwa; nolwa yali niyichendelanga mukhuria Omwami, khandi mubulemia bwaRoho Omutakatifu, niyinjiha.
Ainea yahonibwa
32Olwa Petero yali nalambuulanga mumbali tsiosi, yakholomokha niyoola khubatakatifu abamenya eLida bosi. 33Ne ebweneyo yanyoola omundu undi owalangwa mbu Ainea, owali niyakona khwiseelo emiyika munaane; okhuba yali niyakwa likara. 34Petero namusunjila ari Ainea, Yesu Kristo akhuhonia; buukha, wiyalile eshitalishio. Habwene nahabwene nabuukha. 35Nabo bosi abamenya eLida nende Sharoni nibamulola, nibamushiukhanila Omwami.
Dorika yalamusibwa
36Haho ebweneyo eYafa yaliho omwechi undi owalangwa mbu Tabisa, elikalulwa mbu Dorika, eshisina mbu Eshitsusu; omukhasi oyo yali niyashilaana nebikhole ebilayi ebietsimbabasi ebia yakholanga. 37Ne mundaalo etsio obulwale bwamutiila, nafwa; ne olwa bali nibamalile okhumusinga, bamwalisia mushisika shiahekulu. 38Ne okhuba Lida yali ahambi nende Yafa, abeechi, nibahuliile shinga olwa Petero yali naliyo, baruma abandu babili ewa yali, nibamusaaya bari Chama witse eweefwe, oburashinda ta. 39Kho Petero narula natsia ninabo. Ne olwa yali niyoolileyo, bamuyila mushisika eshio eshiahekulu; abakhasi abalekhwa bosi nibasita ahambi, nibalila, nibamumanyia amashati nende tsingubo ebia Dorika yali niyanaba olwa yali nashiliho ninabo. 40Ne Petero nabarusia bosi, nasikama hasi, nasaaya; mana nashiukhanila omulambo, nasunga mbu Tabisa, buukha. Naye natimbula tsimoni ne olwa yalola Petero, yachinguukha, niyeekhala. 41Petero nayila omukhono namusinjisia; naIanga abatakatifu nende abakhasi abalekhwa abo, namura imbeli wabwe nali omulamu. 42Ako nikamanyikhana muYafa yosi; abanji nibamusuubilila Omwami. 43Kho niyeekhalayo tsindaalo tsinyinji eYafa, ewomundu undi mbu Simoni, omunyushi wamaseelo.
Currently Selected:
Ebikhole 9: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
