Ebikhole 10
10
Petero nende Korinelio
1Haho eKaisalia yaliyo omundu undi oweliira mbu Korinelio, omuseesia, oweing'anda eyilangwa mbu ing'anda yeshiItalia; 2nomundu omwikayakayi owariitsanga Nyasaye, halala nende bosi abomunzuye; yaheelesinjia abandu ebihaanwa bietsimbabasi, nasaayanga Nyasaye tsindaalo tsiosi. 3Yalola habulafu mwibisulo, shinga khusaa yashienda eyomushitsiambo, malaika waNyasaye namwitsila, namusunjila ari Korinelio. 4Ikholo niyimurimukha, mana niyoomisia tsimoni okhumuhenga, nasunga mbu Karie, Omwami? Naye namusunjila ari Okhusaayakhwo nende ebihaanwabio bietsimbabasi bikuluushe mbu bibe eshiitsusio imbeli waNyasaye. 5Kho bulaano orume abandu eYafa, okhwenda oundi mbu Simoni, owelilaha mbu Petero; 6acheniihe ewoundi mbu Simoni, omunyushi wamaseelo, owa inzuye yili halukuku Iweinyanza. 7Ne olwa malaika owasungana ninaye yali narulileho, yalanga babili abokhubakholi bomunzuye, nende omusikari omwikayakayi owokhubeenabo abamukhalabanilanga tsindaalo tsiosi; 8ne namalile okhubatoonyela amakhuwa kosi, yabaruma eYafa.
9Haho mukamba kwakhabili, olwa bali nibashili khuluchendo lwabwe, nibali ahambi okhuula khwitaala, Petero yaniina khushilama shieinzu okhusaaya, khusaa shinga eyakhasasaba. 10Inzala niyimuluma, niyeekomba okhulia; ne olwa bali nibashikasinjia, yayenzeela, 11nalola likulu niliikuushe, eshichinjilo shindi nishiikha, shingana ishuka ingali, niyiisibwa khushialo niyitiililwe emikhanda chine chiosi. 12Ne mubwenomwo mwalimwo tsimbia tsiosi tsiebilonje biamakulu kane, nende etsiebimoolanga khwiloba, nende etsiamanyonyi akomwikulu. 13Mana omwoyo nikumwitsila, kuri Buukha, Petero; wire olie. 14Naye Petero nasunga mbu 'A, tawe, Omwami; okhuba eshili okhuliakhwo eshindu shiosi shiomusilo kata eshieshifwabwi ta. 15Omwoyo okwo nikumwitsila khandi olwakhabili, kuri Eshia Nyasaye asiiyile, orashilanga mbu neshieshifwabwi ta. 16Kano kakholekha khataru; habwenaho eshichinjilo eshio nishikalusibwa mwikulu.
17Haho olwa Petero yali nakanakania muno mumoyokwe, mbu eshisina shielibisulo elia aluutsi shiakhaba shirie? Ida, abasaatsa abo aba Korinelio yaruma, nibamalile okhukhaaba inzu yaSimoni, basinjila hashilibwa, 18nibalanjilisia, nibareeba mbu Simoni owelilaha mbu Petero niyakhaba nacheniiheho. 19Ne olwa Petero yali nashiyililisia khwibisulo elo, Roho yamuboolela ari Lola, abasaatsa bataru bakhukhaabanga. 20Ne buukha, wishe, otsie ninabo, oburakanakaniakhwo ta, okhuba nisie oubarumile. 21Kho Petero niyeekha natsia ewa abasaatsa abo bali, nasunga mbu Lole, nisie uno owa mukhaaba; nishiina eshichilile nimwitsa? 22Nabo nibasunga bari Korinelio, omuseesia undi, omundu omulunjishi khandi ouriitsanga Nyasaye, oweifuma indayi mubelihanga liabaYahudi, yeebaaliilwe nende malaika omutakatifu okhuruma abandu bakhwende, mbu otsie munzuye, ahulile amakhuwa aka oli ninako. 23Kho yabeenjisia babe abachenibe.
Mana mukamba yarula natsia ninabo, abandi abokhubaana beefwe baYafa nibatsia ninaye. 24Mana mukamba kwokhubili nibeenjila muKaisalia. Naye Korinelio yali nabalindanga, nakhung'aasiye abaluyiabe nende abeetsabe. 25Ne olwa Petero yeenjila, Korinelio yamwakaanila, nakwa hasi mumakuluke, namwinamila. 26Nebutswa Petero yamubuusia, nasunga ari Sinjila; nasi siesi endi omundu namundu. 27Ne nashisungana ninaye, yeenjilamwo, nanyoola abanji nibakhung'aaniile halala; 28nabasunjila ari Inywe mumanyile abeene shinga olwa kuli omusilo omundu omuYahudi okhwiyungakhwo khumundu welihanga lindi, kata okhumutsiila; nebutswa nisie owa Nyasaye yamanyiye mbu shikhoyile okhulanga omundu yesi mbu nowomusilo kata oweshifwabwi ta; 29niko akachilile ninzitsa oburakhaya ta, olwa enanjilwe. Kho ereeba, mbu neshifune shiina eshichilile nimunanga?
30Naye Korinelio nasunga mbu Eshiteere shino shikhola khane, shinga khusaa yino, okhurula olwa ndabeele nindi mukhusaaya khwokhusaa yashienda munzu yanje; ne ngwoyo, omundu nasinjiile imbeli wanje, niyeefwalile tsingubo tsing'inang'inu, 31nasunga mbu Korinelio, okhusaayakhwo khuhuliilwe, khandi ebihaanwabio bietsimbabasi biitsulilwa imbeli waNyasaye. 32Kho orume abandu eYafa, olanje Simoni owelilaha mbu Petero; acheniihe munzu yaSimoni, omunyushi wamaseelo, khulukuku Iweinyanza. 33Kho nonoho niruma abandu khwiwe; nawe okholile bulayi niwitsa. Kho bulaano khuli hano fwesi imbeli waNyasaye, okhuhulila amakhuwa ako kosi aka walachilisbwa nende Omwami.
Petero yeekuatsila munzu yaKorinelio
34Mana Petero narumbukha, nasunga mbu Toto mwene endola mbu Nyasaye shiyaahulanga mubandu ta; 35nebutswa mubuli lihanga oyo oumuriitsanga nakhola akobulunjishi afuchiililwa ninaye. 36Likhuwa elo elia yarumila abaana baIsiraeli, nayaala amakhuwa amalayi akomulembe muYesu Kristo, neniye Omwami wabosi, 37lisungo lienelo inywe mulimanyile abeene, eliatswanibwa mubuYahudi mwosi, okhuchaachila eGalilaya, inyuma wobubatisii obwa Yohana yeelwatsa; 38akaYesu weNazareti, shinga Nyasaye olwa yamutsushiilila Roho Omutakatifu khandi nende obunyali; naye nachendachenda nakholanga amalayi, nahoninjia bosi abamiinwa nende Setani; okhuba Nyasaye yali ninaye halala. 39Ne ifwe khuli abaloli bamakhuwa kosi aka yakhola, kata mushialo shiabaYahudi kata muYerusalemu; ne bamala nibamwira, nibamufunga' khumusaala. 40Nomwenoyo, Nyasaye yamulamusia mukhufwa khunyanga yakhataru, namunyalila okhulolosibwa ebulafu; 41ne khubandu bosi ta, habula khubaloli aba Nyasaye yalobola khale nifwe abalia ninaye olwa yali namalile okhuiamukha okhurula mukhufwa. 42Ne yakhulachilisia okhwilwatsila abandu nende okhurumbula akobuloli shinga uno olwa ali ye owareebwaho nende Nyasaye abe omukhalachi weshiina khubalamu khandi nende abafu. 43Abanabii bosi barumbula akobuloli khuye, mbu muliiralie buli mundu oumusuubilila alanyoola obuleshelwi bwebionoono.
Abamahanga baheebwa Roho Omutakatifu
44Olwa Petero yali nashisunga amakhuwa ako, Roho Omutakatifu yabeeshela bosi abahulila likhuwa elo. 45Nabo abeshishebo abasuubila nibang'ang'aala, abo bosi abali nibeetsile halala nende Petero, shichila Abamahanga nabo basundulilwa eshihaanwa shiaRoho Omutakatifu. 46Okhuba babahulila nibasunganga nende tsinimi, nibamuheelesia Nyasaye oluyali. Mana Petero nakalusia, 47mbu Niwina owakhanyala okhubeema amatsi, baleshe okhubatisibwa, bano abanyoolile Roho Omutakatifu bario shinga ifwe? 48Kho nalaka mbu babatisibwe muliira liaYesu Kristo. Mana nibamusaaya mbu amenyekhwo ninabo tsindaalo.
Currently Selected:
Ebikhole 10: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
