Hagai 1
1
Abandu banichilisibwa okhuumbakha ihekalu
1Mumuyika kwakhabili kwaDario omuruchi, mumwesi kwakhasasaba, nikuli lulala, likhuwa liOMWAMI lieetsela mumunwa kwaHagai omunabii khuZerubabeli waShealitieli, omukafuna waYuda, nokhuYoswa waYehozadaki omukuhani omukhulundu, liri 2Kano niko aka OMWAMI, omwene mahe, aboola; mbu Abandu bano basunga bari Eshise shishili okhuula eshiokhuumbakha inzu yaNyasaye. 3Mana likhuwa liOMWAMI niliitsila mumunwa kwaHagai omunabii, liri 4Shino neshise eshimukhoyeele inywe okhumenya munzu tsieenywe etsiafuumwakhwo tsimbaho, olwa inzu yino yisikaale yirio likunda? 5Kho bulaano OMWAMI omwene mahe aboola mbu Yililisie khukamukwilanga; mbu 6Mwaraaka ebinji, nimuchesa ebituutu; muliitsanga, nimureekura ta; munyweetsanga, nimuranyalikha ta; mwifwalanga, ne abulaho outunduma omubili. Ouliitsanga omushaara akulia okhukura muloloti eyafutukha emiluhu.
7Kano niko aka OMWAMI omwene mahe aboola, mbu Yililisie khukamukwilanga. 8Niine mushikulu, murikande emisaala, muumbashe inzu; nasi ndalachisangaalila, nindolosiamwo oluyali lwanje; nilwo olwa OMWAMI aboola. 9Mwakhaaba ebinji; ne lole, biali butswa ebituutu; kata olwa mwabileera hango, ndabifuura bufuura. Ne mbushiina? Nolwa OMWAMI omwene mahe areeba. Mbula, khulwa inzu yanje eyili butswa likunda, olwa mutetekhanilanga buli mundu khukeinzuye. 10Niko akachila likulu niliikalwa, oburaamia eliime ta, kata liloba okhwama ebiamo. 11Ndalanjile eshimiyu shiitse khushialo, nokhubikulu, nokhumele, nokhudivai, nokhumafura, nokhubiosi ebirula mwiloba, nokhubandu, nokhumiruko, nokhubunyakhani bwabwe bwosi.
12Mana Zerubabeli waShealitieli, naYoswa waYehozadaki omukuhani omukhulundu, halala nende abandu bosi abasikala, nibahulila omwoyo kwOMWAMI Nyasaye wabwe, nende amakhuwa kaHagai omunabii, shinga OMWAMI Nyasaye wabwe olwa yali namurumile; abandu nabo nibaria imbeli wOMWAMI. 13Mana Hagai omurume wOMWAMI yaboolela abandu amakhuwa kOMWAMI; ari OMWAMI aboola mbu Endi halala nineenyu. 14OMWAMI nabuusia roho yaZerubabeli waShealitieli, omukafuna waYuda, naroho yaYoswa waYehozadaki, omukuhani omukhulundu, naroho tsiabandu abo bosi abasikala; nabo nibeetsa nibakhola emilimo munzu yOMWAMI, omwene mahe Nyasaye wabwe, 15mumwesi kwakhasasaba nikuli amakhumi kabili nakhane.
Currently Selected:
Hagai 1: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975