Luka 2
2
Okhwibulwa khwaYesu
(Mat. 1.18-25)
1Haho mundaalo etsio lilako liarula khuKaisari Augusito, mbu abomushialo shiosi bahandiikwe ameera kabwe khulwanzilo. 2Luno nilwo olwanzilo olwambeli olwakholwa olwa Kirenio yali Kafuna waSiria. 3Mana bosi nibatsia okhuhandiikwa, buli mundu mwitaala liewabwe. 4Naye Yusufu yesi natikulukha narula eGalilaya, okhurula mwitaala liaNazareti, natsia ebuYahudi, mwitookho liaDaudi, elilangwa mbu Betselehemu, okhuba yali owolwibulo lwaDaudi mushilibwashie; 5okhuhandiikwa halala nende Mariamu omukhasiwe owa yali nakhweetsanga, ne yali nali inda. 6Ne olwa bali nibali ebweneyo, inzibula niyimunyoola. 7Niyeebula omwanawe omusiani omwikulanda; namukanyila mungubo tsiomwana omutoro, namwalisia mulwelo; okhuba obwiyangu bwabulaho munzu yabacheni.
Abaayi nende abamalaika
8Ne mushibala shieneshio bali nibaliyo abaayi bandi, abali nibamenyanga mubwayilo, nibasimikhana okhulinda ebiayo biabwe mushilo. 9Malaika wOmwami nafutukha aha bali, oluyali IwOmwami nilubaashila tsimbeka tsiosi; nabo nibaria muno. 10Malaika oyo nabasunjila ari Muraria ta; shichila lole, emuleerela amakhuwa amalayi akokhwikhoya okhukali okhulaba khubandu bosi; 11shichila leelo luno, mwitookho liaDaudi, Omuhonia amwibuliilwe, niye Kristo Omwami. 12Ne shino shilamubeela eshilolelo; mbu mulanyoola akhaana nikhakanyilwe mungubo tsiomwana omutoro, nikhakonile mulwelo. 13Habwenaho nibeetsukhana omukanda omukhongo kwelihe liabomwikulu nikuli halala nende malaika oyo, nikwitsoomia Nyasaye, nikuboola kuri
14Oluyali lube khuNyasaye ikulu mwikulu,
nomushialo omulembe khubandu aba achama.
15Mana olwa abamalaika bali nibeenyooshe nibatsiile mwikulu, abaayi nibasungana, bari Bire khutsie eBetselehemu, khulole likhuwa lino eliikholile, elia Omwami akhutnanyiye. 16Nibaanguha nibatsia, nibanyoola Mariamu nende Yusufu yesi, nende akhaana nikhakonile mulwelo. 17Ne olwa bali nibaluutsi, barumbula amakhuwa aka basunjiilwe khumwana oyo. 18Bosi abakahulila nibachenya khumakhuwa aka baboolelwa nende abaayi abo. 19Nebutswa Mariamu nabiikha amakhuwa ako kosi, nakayililisinjia mumwoyo. 20Abaayi nabo nibakalukha, nibafuminjia Nyasaye nibamwitsoomia khulwako kosi aka bali nibahuliile nende okhulola, shinga olwa bali nibabooleelwe.
Okhushebwa khwa Yesu
21Mana tsindaalo olwa tsiahwa munaane mbu bamushebe, bamukulikha eliira mbu YESU, shinga malaika olwa yamukulikha narashiabelekhwa ta.
Okhuyilwa khwaYesu muHekalu, nakalukha eGalilaya
22Ne tsindaalo etsiokhusiywa khwabwe olwa tsiahwa, amalako kaMusa shinga olwa yali, batikulukha ninaye nibamuyila eYerusalemu, okhumusinjisia imbeli wOmwami; 23shinga olwa kahandiikwa mumalako kOmwami, mbu Buli shisaatsa eshiikula inda shilangwe mbu eshitakatifu shiOmwami, 24nende okhumala omusango shinga olwa kaboolwa mumalako kOmwami, mbu amahuusi kabili, kata emisosole chibili chiamakuuku. 25Ne lola, muYerusalemu ebweneyo yaliyo omusaatsa undi, oweliiralie mbu Simeoni; omundu oyo yali omulunjishi owariitsanga Nyasaye, nalindiililanga obulemibwi bwaIsiraeli; ne Roho Omutakatifu yali muye. 26Ne yali niyafwimbulilwa nende Roho Omutakatifu mbu shialalola okhufwa narashialola Kristo wOmwami tawe. 27Naye niyeenjila muhekalu niyeebaalilwa nende Roho; nolwa abeebuli bomwana oyo Yesu bamuleera mbu bamukholele akeshiima shiomumalako shinga olwa shili, 28kho yamubukula mumakhono, namwitsoomia Nyasaye, naboola mbu
29E Omwami, bulaano oseebule omusumbawo nende omulembe,
shinga olwa wa'sunjila;
30okhuba tsimoni tsianje tsiluutsi obuhoniabwo,
31obwa wakasiye mumoni mwabamahanga kosi;
32mbu obulafu bwobufwimbulilwi khuBanamahanga,
noluyali lwabandubo Isiraeli.
33Ne samwana nende nyina bali nibachenyanga khumakhuwa ako akasungwa khuye; 34mana Simeoni nabasabila ikhabi, nasunjila Mariamu nyinamwana ari Lola, uno areelweho khulwa okhukwa nokhubuukha khwabanji abokhubaIsiraeli; khandi khulwa eshilolelo eshiambakhanwa; 35toto, nawe omwene, olukanga lulafumira omwoyokwo; mbu mana amayililisio akomumioyo eminji kabisushe.
36Ne yaliho oundi mbu Ana, omukhasi omunabii, omukhaana waFanueli, owomuluyia lwaAsheri; ne yali omushiele omuyindifu muno, owali niyamenya nomusaatsawe emiyika musaafu okhurula khubushisilabwe, 37naba omulekhwa emiyika amakhumi munaane nachine. Shiyali narulanga muhekalu ta; ne yeenamilanga Omwami nahonganga inzala khandi akhanji, nende okhusaaya eshilo nende eshiteere. 38Naye niyoolaho khushise shieneshio, namwishiela Nyasaye, nababoolela amakhuwa khuye bosi abalindiililanga obununulwi bwaYerusalemu. 39Nolwa bali nibamalilisiye amakhuwa kosi akalakwa mumalako kOmwami, bakalukha eGalilaya, nibatsia mwitaala liabwe eNazareti.
40Ne Omwana yakhula, naba owamaani, niyeetsulamwo obuchesi, obukoosie bwaNyasaye nibuba khuye.
Omusiani Yesu nali muHekalu
41Ne buli muyika abeebulibe batsiitsanga eYerusalemu khwisabo liaPasaka. 42Naye olwa yali owemiyika ekhumi nachibili, batikulukha nibatsia, shinga eshiima shielisabo olwa shialinji; 43ne olwa bali nibamalile tsindaalo, nibachelelanga, omuyia Yesu yatong'a inyuma eYerusalemu; abeebulibe nibaramanya ta; 44ne olwa bakaala mbu ali mubachendi bashie, batsiililila oluchendo Iweshiteere eshilamba; mana nibamukhaaba mubeekho babwe nende mubashiabwe; 45ne olwa baramunyoola ta, bakalukha eYerusalemu nibamukhaabanga. 46Mana olunyuma lwetsindaalo tsitaru bamunyoola nali muhekalu, niyeekhaale hakari wabeechesia, nahulilanga akabwe, nabareebanga amareebo; 47bosi abamuhulila nibahumanila oburechelefubwe nende amakalusioke. 48Ne olwa bamulola, bahuka; nyina namureeba ari Mwana wanje, wakhukholeele orie? Lola, so ninasi khukhukhaabilenje nikhuhenda muno. 49Naye nabasunjila ari Mukhaabilenje murie? Shimumanyile mbu ekhoyile okhubeetsanga munzu yaPapa? 50Nabo nibaramanya eshisina shielikhuwa elia yababoolela ta. 51Mana yakholomokha ninabo, niboola eNazareti; naye yali nabahulilanga; ne nyinamwana yabiikha amakhuwa ako kosi mumwoyokwe.
52Yesu niyeemeeta obuchesi nende eshiimoshie, naba omukoosi imbeli waNyasaye nabandu. Obwilwatsi bwa.
Currently Selected:
Luka 2: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
