Luka 1
1
Kano kahandiichilwa Tseofilo
1Olwa kali mbu abanji beebukuliile emilimo echiokhwanza amakhuwa khukeenako akoosibwa mwifwe, 2shinga olwa abeenabo bakhutoonyela abalinji abaloli bako nende abakhalabani belikhuwa okhurula khukhuchaaka; 3kho ninasi siesi enduutsi mbu nobulayi okhukhuhandiichila nikhwanzila amakhuwa shinga olwa kalondananga, omukhulundu Tseofilo; okhuba engarunilisiye kosi habwene okhurula khukhuchaaka; 4mbu mana omanyile elala obwatoto bwamakhuwa aka weechesibwa.
Akokhwibulwa khwaYohana Omubatini kaboolwa khale
5Mundaalo tsiaHerode, omuruchi webuYahudi, yali naliho omukuhani undi oweliiralie Zakaria, owali owobwayi bwAbia; ne yali nende omukhasiwe owokhubakhaana baHaruni, eliiralie mbu Elisabeti. 6Nabo bombi bali abalumjishi imbeli waNyasaye, nibeechendelesia mumalako kosi nende ameebaalo kosi kaNyasaye, nibabula eshikha shiosi. 7Ne bali nibabula omwana, shichila Elisabeti yali omukumba; nabo bombi bali nihakofula.
8Haho olwa yali nakholanga akobukuhani imbeli waNyasaye, nalondanga okhusimikhana khwobwayi bwabwe, 9eshiima shiobukuhani shinga olwa shiali, ikha niyimukwila okhwinjila muhekalu yOmwami okhusamba amalesi kelibuuliesi. 10Omukanda kwosi kwabandu kwali nikusaayila elwanyi khushise shiamalesi kelibuuliesi 11Mana malaika wOmwami yamuloleshela nasinjiile khulubeka Iwomukhono musaatsa weshimalilo shiamalesi kelibuuliesi. 12Ne Zakaria olwa yamulola, ikholo niyimurimukha, oburii nibumuhamba. 13Ne malaika namusunjila ari Oraria ta, Zakaria; okhuba okhusaayakhwo khuhuliilwe, naye omukhasiwo Elisabeti aliibula omwana omusiani, nawe olimukulikha eliira mbu Yohana. 14Oliikhoya notsatsahala; ikhandi abanji baliikhoyela okhwibulwakwe. 15Shichila aliba omukhongo imbeli wOmwami; shialinywakhwo idivai yosi, kata eshimeesinjia, lawe; ne Roho Omutakatifu aliitsula muye, kata okhurula olwa aliibulwa. 16Nabanji abokhubaana baIsiraeli, alibashiukhasia khuMwami Nyasaye wabwe. 17Aliranjilila imbeliwe muroho yaEliya nomubunyalibwe, okhushiukhasilia abaana emioyo chiabasaabwe, nokhushiukhasia abakhayi mumachesi kabalunjishi; okhurecheshela Omwami lihanga liabandu abeekhwaniye.
18Zakaria namureeba malaika ari Nengamanyile khuli shiina amakhuwa ako? Shichila endi omusaakhulu, naye omukhasi wanje wakofula muno. 19Malaika nakalusia, namuboolela mbu Nisie Gaburieli, ousinjilanga imbeli waNyasaye; ne erumilwe okhusungana ninawe, nokhukhuleerela amakhuwa kano amalayi. 20Ne lola, olasiIuhala, noranyala okhuboola ta, okhuula khunyanga olwa amakhuwa kano kaliikhola, okhuba shiosuubiliile amakhuwa kanje ta, nako kaliusibwa munduukho yako.
21Nabo abandu bali nibamulindiililanga Zakaria, nibahuka shinga olwa ashindile muhekalu. 22Nolwa yarulamwo, shiyanyala okhuboolana ninabo ta; nibamanya mbu uluutsi libisulo muhekalu; ne yabasimilanga butswa namakhono, namenya nali omusilu. 23Nikaba mbu olwa tsindaalo tsiobukhalabanibwe tsiali nitsihweele, yeenyokha natsia ebunangowe.
24Nolunyuma lwetsindaalo etsio, Elisabeti omukhasiwe yahela inda; niyeebisa emiesi chiraano, naboola ari 25Omwami yakholeele ario mundaalo etsia yahenjile, okhumbiniakhwo tsisoni mubandu.
Akokhwibulwa khwaYesu kaboolwa khale
26Haho mumwesi kwakhasasaba, Nyasaye yaruma malaika Gaburieli khwitaala lindi lieGalilaya elilangwa mbu Nazareti, 27ewomukhaana omushisila owali nakhweebungwa nende omusaatsa oweliiralie Yusufu, owomushilibwa shiaDaudi; neliira liomukhaana oyo niMariamu. 28Niyeenjila ewa yali, nasunga mbu Mulembe, iwe oukoosiibwe muno; Omwami ali ninawe. 29Ne ikholo yamurimukha muno khulwa amakhuwa ako, nakanakania mumwoyokwe, mbu lishiesii lino lili lirie? 30Malaika oyo namusunjila ari Oraria tawe, Mariamu; okhuba Nyasaye akhukoosiye muno. 31Ne lola, olabelekha inda, niwibula omwana omusiani, nomukulikha eliira mbu YESU. 32Aliba omukhongo khandi alilangwa mbu Omwana waOyo Ouli Ikulu Muno; ne Omwami Nyasaye alimuheelesia eshifumbi shioburuchi eshiaDaudi kuukanyene; 33ne aliruka inzu yaYakobo ebisoni nebisoni; akata oburuchibwe shibuliba neshihesi ta. 34Mariamu namureeba malaika ari Kano kaleekhola karie, olwa endashiamanya omusaatsa ta? 35Naye malaika nakalusia, namusunjila mbu Roho Omutakatifu alakhwitsila, obunyali bwa Oyo Ouli Ikulu Muno nabwo bulakhufwimba; niko akachila eshieneshio eshiitsa okhwibulwa shilalangwa mbu eshitakatifu mbu Omwana waNyasaye. 36Ne lola, omwikho weenywe Elisabeti yesi yabelekha inda yomwana omusiani mubushielebwe; ne kuno nikwo omwesi kwakhasasaba khumwenoyo oulangwa mbu omukumba. 37Shichila khuNyasaye libulaho likhuwa liosi eliranyalikha ta. 38Mariamu naboola mbu Lola, endi omutitiikhani wOmwami; kalambeela shinga olwa osunjile. Mana malaika namulekha.
Olwa Mariamu yatsia obucheni ewaElisabeti
39Mana mundaalo tsienetsio Mariamu yarula natsia bwangu mushibala shiomubikulu, okhuula khwitaala lindi liebuYahudi; 40niyeenjila munzu yaZakaria, nashiesia Elisabeti. 41Ne olwa Elisabeti yahulila amashiesii kaMariamu, omwana yakhupa munda; Roho Omutakatifu niyeetsula muElisabeti, 42naye nachinga omwoyo, nayiiba, nasunga mbu Oli oweikhabi mubakhasi, khandi noweikhabi oyo owa witsa okhwibula. 43Ne lino linzitsiile lirie, nyinamwana Omwami wanje okhunzitsila? 44Okhuba lola, olwa omwoyo kwamashiesiiko kwakhahuliilikha mumarwi kanje, omwana yakhoopa munda yanje, khulwa okhwikhoya. 45Khandi noweikhabi ousubiile; shichila amakhuwa kOmwami aka yabooleelwe kaliusibwa.
Olwimbo Iwobwitsoomii lwaMariamu
46Mariamu naboola, mbu
Omwoyo kwanje kumwitsoomia Omwami.
47Roho yanje nayo yimwikhoyela Nyasaye Omuhonia wanje.
48Shichila yahenjile obumanani bwomukhaana omukholiwe;
okhuba lola, okhurula olwa leelo abetsinzibulo tsiosi balananganga mbu oweikhabi.
49Okhuba omwene obunyali yakholeele amakhuwa amakhongo;
eliiralie nalio nelitakatifu.
50Tsimbabasitsie tsibeetsangaho khubeenabo abamuriitsanga okhuula khunzibulo tsiosi.
51Yakholile akobunyali nomukhonokwe;
yasalaasiye abeekhulumamia mubuyililisii obwomumioyo chiabwe.
52Yayiniye abakhulundu khubifumbi biabwe,
niyeemekha abalinji abamanani.
53Abali inzala yabeekusiye ebilayi,
nabayinda yabaseebuule amakhono amakhaya.
54Yamuhabiine Isiraeli omusumbawe,
niyeetsulila tsimbabasitsie,
55shinga olwa yaboolela abakuuka beefwe,
khuAburahamu nende abeetsukhulube,
okhuula khunzihulo tsiosi.
56Mariamu namenya ninaye eshise shiemiesi shinga chitaru, mana nakalukha ewuwe.
Okhwibulwa khwaYohana Omubatisii
57Haho induukho yaElisabeti eyokhwibula niyula; niyeebula omwana omusiani. 58Abamenyanibe nende abeekhobe nibahulila shinga Omwami olwa yali niyamubambusilia tsimbabasitsie; mana nibeekhoyela halala ninaye. 59Mana khunyanga yomunaane nibeetsa okhumusheba omwana; ne bali nibeenya okhumukulikha eliira khuliira liasamwana, mbu Zakaria. 60Mana nyinamwana nakalusia, nasunga mbu 'A, tawe; ne alalangwa mbu Yohana. 61Nibamusunjila bari Abulaho mubeekho beenywe bosi oulangungwa eliira elo. 62Nibamusimila samwana amakhono mbu aboole eliira elia yeenya akulikhwe. 63Naye nasaba akhabaho akhokhuhandiikakhwo, nahandiika ari Eliiralie niye Yohana. Nibachenya bosi. 64Habwenaho omunwakwe nikwikukha, olulimilwe niluboholokha, nachaaka okhuboola, namwitsoomia Nyasaye. 65Oburii nibubahamba bosi abamenyanga mumbali etsio; amasungo ako kosi nikatswana mungongo tsiosi tsiebikulu biebuYahudi. 66Nabo bosi abakahulila nibakabiikha mumioyo chiabwe, bari Omwana uno aliba owambia shiina? Shichila omukhono kwOmwami kwali khuye.
Obulakusi bwaZakaria
67Roho Omutakatifu niyeetsula muZakaria samwana, naye nalakula, naboola mbu
68Omwami, Nyasaye waIsiraeli, yeetsoomibungwe okhuba yabacheniihe abandube nabakasilia obununulwi,
69nakhusinjisilia olwika lwobuhonia mushilibwa shiomukaliwe Daudi,
70shinga olwa yaboola muminwa chiabanabiibe abatakatifu abalinjiho okhurula khumusuule,
71mbu obuhonia mubasuku beefwe,
nomumakhono kabo bosi abakhukiyanga.
72Okhubabeela tsimbabasi abakuuka beefwe,
nokhwitsulila indakanoye indakatifu,
73niyo eshiitsubo eshia yeetsubila kuuka weefwe Aburahamu,
74okhufuchiilila mbu ifwe, olwa khumalile okhuhonibwa mumakhono kabasuku beefwe,
mana khumukhalabanilenje aharali oburii bwosi ta
75mubutakatifu nende obulunjishi imbeliwe tsindaalo tsieefwe tsiosi.
76Nawe, iwe omwana, olalangungwa mbu omunabii waOyo Ouli Ikulu Muno;
okhuba oliranjilila imbeli wOmwami okhumukasilia tsinjilatsie,
77okhubamanyia abandube akobuhonia,
mubuleshelwi bwebionoono biabwe,
78khulwa tsimbabasi tsiaNyasaye weefwe etsichila okhushia okhwomwikulu khulakhucheniha,
79okhubaashila abeekhalanga mushiilima khandi mushiinikha shioluumbe;
okhwibaalila ebilenje bieefwe munjila yomulembe.
80Naye omwana yakhula, niyeemeeta amaani muroho, nabeetsanga mushitsiimi okhuula khunyanga olwa yalolosilibwa Isiraeli.
Currently Selected:
Luka 1: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
