Mariko 16
16
Okhulamukha
(Mat. 28.1-10; Lk. 24.1-12; Yoh. 20.1-10)
1Sabato olwa yali niyihweele, Mariamu Magadalene nende Mariamu nyina Yakobo nende Salome nibakula emisaala chieshing'aari, mbu batsie okhumutsushiilila. 2Mana khunyanga yambeli eyomwihonga nibahuuna khung'ani niboolayo omubasu nikuronga. 3Ne bali nibasungananga, bari Niwina ounokhuselenjesilie lichina lirule khumuliango kweshilindwa? 4Nolwa bachinguula tsimoni, balola lichina nilimalile okhuselenjesibwa; shichila liali likali okhushila.
5Nibeenjila mushilindwa, nibalola omusooliili niyeekhaale halubeka Iwomukhono musaatsa, niyeefwalile ikanzu indafu; nibang'ang'aala muno. 6Naye nababiila ari Murang'ang'aala ta; mukhaabanga Yesu omuNazareti, owabambilwe; alamuushe; shiali hano ta; lole, aha bamwalisiye ngahano! 7Ne mutsie, muboolele abeechibe nende Petero, mbu Amuranjilila okhutsia eGalilaya; ebweneyo mulamulolelayo, shinga olwa yamusunjila. 8Nibarula, nibeelukha okhurula hashilindwa; shichila indenga nende ling'ang'a biali nibibahambile; nibaraboolela omundu yesi likhuwa liosi ta; okhuba oburii bwali nibubahambile.
Yesu yamuloleshela Mariamu Magadalene
(Yoh. 20.11-18)
9Mumakhubakhubwe khunyanga yambeli eyomwihonga, olwa Yesu yali naIamuushe, yaranjilila okhumuloleshela Mariamu Magadalene, owa yali niyarusiamwo amadimoni musaafu. 10Naye natsia naboolela aba Yesu yalinji ninabo, olwa bali nibeekhuula nibalila amasika. 11Nabo, olwa bahulila mbu nomulamu, khandi mbu amuluutsi, shibafuchiilila ta.
Yesu yaloleshela abeechi babili
(Lk. 24.13-35)
12Olunyuma lwamakhuwa ako yabaloleshela abandi khubo babili mubukondo bundi, olwa bali nibachendanga nibarula mwitookho. 13Nabo nibatsia nibaboolela abandi; ne kata shibasuubila abo ta.
Yesu yaruma abo Ekhumi-namulala
(Mat. 28.16-20; Lk. 24.36-49; Yoh. 20.19-23)
14Olunyumakhwo yabaloleshela abo ekhuminamulala abeene nabeene olwa bali nibaliitsanga; nabahalabila khulwa oburasuubila bwabwe nobutinyu obwomumioyo chiabwe, shichila shibali nibafuchiiliile abo abali nibamuluutsi olwa yali namalile okhulamukha ta. 15Mana nabasunjila ari Mutsie mubialo biosi pe, nimwilwatsila ebilonje biosi Injiili. 16Ousuubila nabatisibwa alahona; ne ourasuubila ta alakhalakwa eshiina. 17Ebilolelo bino bilabalonda abo abasuubila; mbu muliira lianje balarusia amadimoni; balaboolanga netsinimi tsimbia; 18balachinganga tsinzokha namakhono; nibaba nibanywa khushindu eshifwisinjia, shishilabakhola obubii bwosi ta; balareetsanga emikhono khubalwale, nabo nibahona.
Okhukulukha
(Lk. 24.50-53)
19Kho mana Omwami Yesu, olwa yali namalile okhusungana ninabo, yakulusibwa nayilwa mwikulu, niyeekhala hamukhono omusaatsa waNyasaye. 20Nabo nibarula nibeelwatsa hosi hosi, Omwami omwene nakholanga ninabo halala, natinyisia Likhuwa nende ebilolelo ebiikholaho. Amina.
Currently Selected:
Mariko 16: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
