Luka 4
4
Okhuteemwa khwaYesu
(Mat. 4.1-11; Mk. 1.12-13)
1Ne Yesu, niyeetsuule nende Roho Omutakatifu, yachelela okhurula Yorodani, niyeemililwa nende Roho mushitsiimi 2tsindaalo amakhumi kane nateemungwa nende Setani. Ne shiyaliakhwo eshindu shiosi mundaalo etsio tawe; ne olwa tsiali nitsihweele, inzala yamuluma. 3Setani namusunjila mbu Noba noli Omwana waNyasaye, laka lichina lino mbu liikhole omukaate. 4Yesu namukalusia ari Liahandiikwa mbu Omundu shialabeetsanga mwoyo khulwa omukaate kwonyene ta.
5Namutikulusia, namumanyia oburuchi bwosi obwomushialo khundakika ndala. 6Setani namusunjila mbu Ndalakhuheelesia iwe obunyali buno bwosi, nende oluyali lwabwo; shichila bwahaanwa mumakhono kanje; nasi embukabiIanga owa enzenya. 7Kho noba niunyinamila, bwosi bulaba obubwo. 8Yesu nakalusia, namusunjila ari Liahandiikwa mbu Omwinamilenje Omwami Nyasayewo, nomukhalabanila ye yenyene.
9Namwimilila okhumuusia eYerusalemu, namusinjisia khubutenje bweihekalu, namusunjila mbu Noba noli omwana waNyasaye, ruuma okhurula hano okwe hasi; 10shichila liahandiikwa liri
Alalachilisia abamalaikabe khumakhuwako okhukhulinda;
11khandi mbu
Balakhuchinga mumakhono kabwe,
oleshe okhwisichirala khwichina.
12Yesu nakalusia, namusunjila ari Kaboolwa mbu Oramuteema Omwami Nyasayewo ta.
13Ne olwa Setani yali namalile buli murechekho kwosi, yamurulakhwo namulekha eshise.
Obukhalabani bwaYesu bwachaachila eGalilaya
(Mat. 4.12-17; Mk. 1.14-15)
14Yesu nakalukha eGalilaya mubunyali bwaRoho; ifumaye niyitswana mumbali tsiosi tsiebweneyo. 15Niyeechesia musinagogi tsiabwe, naheebwa oluyali nabandu bosi.
AbeNazareti bafukula Yesu
(Mat. 13.53-58; Mk. 6.1-6)
16Kho yoola eNazareti, ewa yali niyaleleiwa, ne eshiimashie shinga olwa shialinji, khunyanga yaSabato niyeenjila musinagogi, nasinjila okhusooma. 17Nakaamilwa eshitabu shiomunabii Isaya. Nabambula eshitabu, nanyoola aha kahandiikwa kari
18Roho wOmwami ali mwisie,
shichila yanzushiiliilekhwo amafura mbu embeelwatsile abamanani Amakhuwa Amalayi;
yandumile okhuboolela abahambe ebulafu akobulekhuulwi,
nende ababofu akobutimbusibwi bwetsimoni okhubalekhuula abamiinungwa
19okhuboola ebulafu akomuyika okufuchiililwa kwOmwami. 20Mana nafumba eshitabu, nashimukalusilia omukhalabani, niyeekhala; abali musinagogi bosi nibamuumisiakhwo tsimoni.
21Mana nachaaka okhubaboolela, ari Leelo luno lihandiiko lino liakhoosibwa mumarwi keenywe. 22Bosi nibarumbula akobuloli khuye, nibachenya khumakhuwa akolukoosi akarula mumunwakwe; nibasunga bari Uno shiali ye omwana waYusufu ni? 23Naye nabasunjila ari Haundi mulanjelela oluchelo luno, mbu Omusilishi, wihonie omwene; kosi aka khwahuliile nikeekholile eKaperinaumu, okakhole nende hano mushibala shieweenywe. 24Nasunga mbu Emuboolela toto, mbu abulaho omunabii oufuchiililwa mushialo shiabwe. 25Ne nitoto, emusunjila mbu bali nibaliho abakhasi abalekhwa abanji muIsiraeli mundaalo tsiaEliya, olwa likulu lieekalwa emiyika chitaru nende emiesi chisasaba, olwa inzala ikhongo yeenjila mushialo shiosi; 26ne Eliya shiyarumilwa omundu yesi khubo ta, habula muZarefata mushialo shiaSidoni, khumukhasi owali omulekhwa. 27Khandi bali nibaliho abobuchele abanji muIsiraeli mundaalo tsiomunabii Elisha; ne shiyasiiywa omundu yesi khubo ta, habula Naamani omuSiria. 28Mana bosi abali musinagogi nibatiilwa oburima, olwa bahulila amakhuwa ako; 29nibabuukha, nibamurusia mwitaala, nibamuyila khuluchengulukho Iweshikulu eshia litaala liabwe lioombashilwakhwo, mbu bamusukune hasi. 30Nebutswa yabira hakari mubo, natsia butsia.
Omundu waroho weshifwabwi
(Mk. 1.21-28)
31Nakholomokha niyoola eKaperinaumu, litaala lindi lieGalilaya; ne yali nabeechesia khunyanga yaSabato. 32Abandu nibahumanila okhwechesiakhwe, shichila amakhuwake kali nobunyali. 33Ne musinagogi yabwe yalimwo omundu owali nende roho welidimoni lieshifwabwi; naye nayiiba nende omwoyo omukhongo, ari 34Lekha! Obeele orie nineefwe, iwe Yesu omuNazareti? Witsile okhukhutibia noho? Ekhumanyile shinga olwa oli, mbu Omutakatifu waNyasaye. 35Naye Yesu nalikaania, ari Holeela tsi! Omurulemwo! Ne olwa lidimoni liali nilimukochile hasi hakari mubo, liamurulamwo, oburamutsuunia ta. 36Nibaliibwa ling'ang'a bosi, nibaboolelana abeene nabeene, bari Lino nelikhuwa shi? Okhuba alakanga abaroho beshifwabwi nende obunyali namaani, nabo barulanga. 37Amakhuwa nikatswanibwa khuye hosi hosi mumbali etsiarondokhanaho.
Yesu yahonia nyakhufialanyene Petero
(Mat. 8.14-15; Mk. 1.29-31)
38Naye narula musinagogi, niyeenjila munzu yaSimoni. Ne nyakhufialanyene Simoni yaii natiililwe nomurengo omunji, nibamusaaya khuIulwe. 39Naye nasinjila ahambi ewa omulwale yali nakonile, nahalabila omurengo; nakwo nikumulekha; habwene nahabwene nabuukha nabakhalabanila.
Yesu yahonia abanji khubwile
(Mat. 8.16-17; Mk. 1.32-34)
40Ne olwa eliuba liali niliyeelanga, bosi abali nabateshele abobulwale obwahukhaane babaleera ewa yali, naye nabarakhwo emikhono, mulala mulala, nabahonia. 41Amadimoni nako nikarula mubandu abanji, nikayiiba nikasunga kari Niwe Omwana waNyasaye. Naye nakakondeshela, narafuchiilila mbu kaboolekhwo likhuwa ta, okhuba kamumanya shinga olwa ali ye Kristo.
Yesu yachaaka oluchendo Iwobwilwatsi
(Mk. 1.35-39)
42Olwa eshialo bwashia, yarula natsia aha abandu babula; abemikanda nabo nibamukhaaba, nibeetsa ewa yali, nibeenya okhumwikalila, mbu aleshe okhubarulakhwo. 43Ne yabasunjila mbu Ekhoyile okhubeelwatsila abomumataala kandi nabo Amakhuwa Amalayi akObwami bwaNyasaye; niko akachila ndarumwa.
44Ne yali niyeelwatsanga mutsisinagogi tsieGalilaya.
Currently Selected:
Luka 4: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
