Luka 5
5
Tsinyeeni tsiikalilwa tsinyinji
(Mat. 4.18-22; Mk. 1.16-20)
1Ne olwa abemikanda bamutiya nibahulila amakhuwa kaNyasaye, ye yali nasinjiile khundulo weInyanza yaGenesareti; 2nalola amaaro kabili nikeekhaale khundulo weinyanza; ne abanaabi beene bali nibarulilemwo, ne bali niboosinjia tsikhanda tsiabwe. 3Niyeenjila muliaro elala, eliali liaSimoni, namusaba mbu alisitie lirule hatiiti khulukuku. Mana niyeekhala niyeechesia abemikanda nali muliaro. 4Ne olwa yali naleshile okhuboola, yamubiila Simoni ari Sitia khutsie halusiba, mufuube tsikhanda tsieenywe, mbu mwikalile tsinyeeni. 5Simoni nakalusia, nasunga mbu Omwami, khunyakhaane eshilo tulu, nikhuratiila eshindu ta; ne khulwa likhuwalio ndaleesia tsikhanda. 6Ne olwa bali nibakholile bario, beekalila tsinyeeni tsinyinji muno; tsikhanda tsiabwe nitsienya okhukhalikha; 7nibabakhomola nemikhono abeshisango shiabwe abali muliaro lindi mbu beetse babakhoonye. Nabo nibeetsa, nibeetsusia amaaro kombi, okhuula olwa kachaaka okhwiyinikha. 8Ne Simoni Petero, olwa yalola ario, yakwa mumakulu kaYesu, nasunga ari Urulekhwo; okhuba endi omundu omwonooni, Omwami. 9Shichila yali nahukanga, halala nende aba yali ninabo, khubunji bwetsinyeeni etsia batiilile; 10kata Yakobo nende Yohana, abaana baZebedayo, abali abeshisango shilala nende Simoni, bosi nibahuka bario. Ne Yesu namusunjila Simoni ari Oraria tawe; okhurula olwa leelo wakhahambenje abandu. 11Ne olwa bali nibaleerile amaaro; abwe khulukuku, balekha biosi, nibamulondakhwo.
Yesu yasiiya owobuchele
(Mat. 8.1-4; Mk. 1.40-45)
12Olwa yali nali mwitaala lindi, lola, omundu owa obuchele bwamala omubilikwe kwosi ngwoyo; ne olwa yalola Yesu, yeekhupa hasi mafumama, namusaaya, ari Omwami, noba nochama onyala okhu'siiya. 13Naye nanyiila omukhono, namutiilakhwo, naboola mbu Enjamile; osiiyishe. Habwene nahabwene obuchele nibumurulakhwo. 14Ne Yesu yamukaania, ari Oramuboolelakhwo omundu yesi ta; ne tsia, wilolosie imbeli womukuhani, ne khumakhuwa akokhusiiywakhwo, ohaane shinga olwa Musa yalaka, shibe oburumbusi khubo. 15Nebutswa amakhuwake kameeta okhutswana hosi hosi; emikanda emikhongo nichikhung'aana okhuhulila nende okhuhonibwa obuteshele bwabwe. 16Naye narula yenyene, natsia ewa abandu babula, nasaaya.
Yesu yahonia owelikara
(Mat. 9.1-8; Mk. 2.1-12)
17Khunyanga yindi eyomundaalo etsio, yali niyeechesinjia abandu; ne abaFarisayo bali nibaliho nende abeechesii bameebaalo, nibeekhaaleho, abali nibarulile mubuli taala lieGalilaya nende buYahudi nende Yerusalemu; obunyali bwOmwami nabwo bwali ninaye, anyale okhuhonia. 18Ne lola, abandu nibaleera khwicheela omundu owakwa likara; nibakhaaba shinga olwa bakhamwinjisia mbu bamwalisie imbeliwe. 19Ne olwa bakhaywa okhunyoola shinga olwa bamwinjisia khulwa obunji bwabandu, baniina khushilama shieinzu, nibamwisilia hakari wobutekulal bweshilama halala nelicheelalie, hakari wabwe, imbeli waYesu. 20Ne olwa yalola obusuubili bwabwe, yasunga ari Owashianje, wakhamala okhuleshelwa ebionoonobio. 21Nabo abahandiichi nende abaFarisayo bachaaka okhukanakania, bari Uno niwina ouboolanga akobwichelasii nende Nyasaye? Niwina ounyala okhuleshela abandu ebionoono, narali Nyasaye yenyene? 22Ne Yesu yalola obukanakanii bwabwe, nakalusia nabasunjila ari Mukanakaninjia amakhuwa shiina mumioyo chieeny ve? 23Eliangu lili heena, okhusunga mbu Olesheelwe ebionoonobio; nohomba okhuboola mbu Buukha, ochende? 24Ne mbu kho mumanye shinga Omwana wOmundu olwa ali nobunyali mushialo okhuleshela abandu ebionoono-nasunjila owali owelikara, ari Ekhubiila mbu buukha, wituushe licheelalio, otsie ingowo. 25Habwenaho nabuukha imbeli wabwe niyeetuukha eshia yali nakonilekhwo, niyeenyokha natsia ebunanzuwe, namwitsoominjia Nyasaye. 26Nibaliibwa ling'ang'a bosi, nibamwitsoomia Nyasaye; oburii nibubahamba, nibasunga bari Leelo khuluutsi amakhuwa kamakana.
Okhulangwa khwaLawi
(Mat. 9.9-13; Mk. 2.13-17)
27Kho olunyuma lwamakhuwa ako yarula nalola omusololi wobushuru oulangwa mbu Lawi, niyeekhaale aha basololelanga obushuru, namubiila ari Unondekhwo. 28Naye nalekha biosi, nasinjila, namulondakhwo. 29Mana Lawi yamuteeshela lisabo likhongo munzuye; ne kwaliho omukanda omukali kwabasololi bobushuru nende abandi nibeekhaale nibaliitsanga halala ninabo. 30Ne abaFarisayo nende abahandiichi babwe babuutsuluulila abeechibe, nibareeba bari Mbushiina nimuliitsanga nimunywa halala nende abasololi bobushuru nende aboonooni? 31Naye Yesu nakalusia, nabasunjila mbu Shibali abalamu abakhoyeele omusilishi ta, habula abalwale. 32Shindayeetsile okhulanga abalunjishi ta, habula aboonooni, mbu beekalukhasie.
Lireebo eliokhuhonga inzala
(Mat. 9.14-17; Mk. 2.18-22)
33Nibamusunjila bari Abeechi baYohana bahonganga inzala khandi akhanji, nibakhola emilaamo; khandi abeechi babaFarisayo nabo bario; ne abobo baliitsanga nibanywa. 34Yesu nabakalusia, mbu Onyala okhubahonjia inzala abeshiselelo, omwene shiselelo olwa ashili ninabo? 35Nebutswa tsindaalo tsiakhoole; ne olwa omwene shiselelo yakhabe nabayiniibwekhwo, kho balihonga inzala mundaalo etsio.
36Khandi naboopela oluchelo; mbu Abulaho ourandula eshitonye shieingubo imbia, washira khungubo ikhulu; okhuba yakharandula imbia eyo, khandi mbu eshitonye eshirula khumbia shishiitsa okhuwinjana nende ikhulu ta. 37Kata abulaho outsukhanga idivai indoro mubisiikolo biamaseelo ebikhulu ta; okhuba idivai indoro yakharulaka ebisiikolo, eyene niyisasikha, ebisiikolo nibionoonekha. 38Ne idivai indoro yikhoyile okhutsukhwa mubisiikolo biamaseelo ebiyia. 39Kata abulaho ounyweele indulu, weekomba indoro; okhuba aboola mbu indulu neindayi.
Currently Selected:
Luka 5: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
