Matsayo 1
1
Aketsinzibulo tsiabakukanyene Yesu Kristo
(Lk. 3.23-38)
1Eshitabu shiobwibulwi bwaYesu Kristo, omwana wa Daudi, omwana waAburahamu.
2Mbu Aburahamu yeebula Isaka; Isaka niyeebula Yakobo; Yakobo niyeebula Yuda nabaana babwe; 3Yuda niyeebula Faresi nende Zera muTamari; Faresi niyeebula Heseroni; Heseroni niyeebula Ramu; 4Ramu niyeebula Aminadabu; Aminadabu niyeebula Nashoni; Nashoni niyeebula Salumoni; 5Salumoni niyeebula Boazi muRahabu; Boazi niyeebula Obedi muRutsu; Obedi niyeebula Yese; 6Yese niyeebula Daudi omuruchi.
Naye Daudi yeebula Sulemani mumukhasi ousika Uria; 7Sulemani niyeebula Rehoboamu; Rehoboamu niyeebula Abiya; Abiya niyeebula Asa; 8Asa niyeebula Yehoshafati; Yehoshafati niyeebula Yoramu; Yoramu niyeebula Uzia; 9Uzia niyeebula Yotsamu; Yotsamu niyeebula Ahazi; Ahazi niyeebula Hezekia; 10Hezekia niyeebula Manase; Manase niyeebula Amoni; Amoni niyeebula Yosia; 11Yosia niyeebula Yekonia nabaana babwe, mundaalo tsiokhwarwa okhutsia eBabeli.
12Ne olunyuma Iwokhwarwa okhutsia eBabeli Yekonia yeebula Shealitieli; Shealitieli niyeebula Zerubabeli; 13Zerubabeli niyeebula Abiudi Abiudi niyeebula Eliakimu; Eliakimu niyeebula Azori; 14Azori niyeebula Zadoki; Zadoki niyeebula Akimu; Akimu niyeebula Eliudi 15Eliudi niyeebula Eleazari; Eleazari niyeebula Matsani; Matsani niyeebula Yakobo; 16Yakobo niyeebula Yusufu omusaatsa waMariamu oweebula Yesu oulangwa mbu Kristo.
17Kho tsinzibulo okhurula khuAburahamu okhuula khuDaudi netsinzibulo ekhumi natsine nokhurula khuDaudi okhuula khukhwarwa okhutsia eBabeli, tsinzibulo ekhumi natsine; nokhurula khukhwarwa okhutsia eBabeli okhuula khuKristo, tsinzibulo ekhumi natsine.
Okhwibulwa khwaYesu Kristo
(Lk. 2.1-7)
18Ne okhwibulwa khwaYesu Kristo khwali khuri nanwa; mbu olwa Mariamu nyina yali nakhweebungwa nende Yusufu, nibarashiateeshania ta, yanyoolekha nali inda yaRoho Omutakatifu. 19Naye Yusufu omusaatsawe, olwa yali omundu omulunjishi, nareenya okhumufwimbia omurwe ebulafu ta, yapaara okhulekhana ninaye mabiswi. 20Ne olwa yali nayililisinjia khumakhuwa kano, lola, malaika wOmwami yamuloleshela mwilooro, naboola mbu Yusufu, iwe omwana waDaudi, oraria okhuleera Mariamu omukhasiwo ta; okhuba inda eya ali ninayo neyaRoho Omutakatifu. 21Ne aliibula omwana omusiani; nawe olimukulikha eliira mbu YESU; shichila niye oulihonia abandube okhurula mubionoono biabwe. 22Ne kano kosi keekholile mbu mana amakhuwa koosibwe aka Omwami yasunjila mumunabii, ari
23Lola, omukhanna omushisila alihela inda, niyeebula omwana omusiani,
ne balimukulikha eliira mbu Imanueli,
eshisina mbu, Nyasaye halala nineefwe.
24Mana Yusufu nasisimukha mundoolo, nakhola shinga olwa malaika wOmwami yali namulachile, naleera Omukhasiwe; 25naraba ninaye ta okhuula olwa yali niyeebuule omwana omusiani; ne yamukulikha eliira mbu YESU.
Currently Selected:
Matsayo 1: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
