Matsayo 2
2
Abachesi bebukwe
1Haho olwa Yesu yeebulwa muBetselehemu ebuYahudi mundaalo tsiaHerode omuruchi, lola, abachesi khuketsinyininyini barula ebukwe nibeetsa eYerusalemu, 2nibareebanga bari Ali heena owibuulwe abe omuruchi wabaYahudi? Okhuba khwalola inyininyini yiye ebukwe, ne khwitsile okhumwinamila. 3Nolwa Herode omuruchi yahulilakhwo, ikholo niyimurimukha, halala nende abeYerusalemu bosi. 4Kho nakhung'aasia halala abakhulundu babakuhani bosi nende abahandiichi abomubandu, nabareebelesia mbu Kristo yakheebulilwa heena? 5Nibamukalusia bari MuBetselehemu ebuYahudi; shichila kahandiikwa kari nanwa nende omunabii, mbu
6Nawe Beselehemu, mushialo shiaYuda,
shiolikhwo omutuutu mubakhulundu baYuda ta;
shichila mwiwe alirulamwo omwami ouliaya abandu banje Isiraeli.
7Mana Herode nalanga abachesi khuketsinyininyini abo mabiswi, nanoonelesia kahala eshise eshia inyininyini yaloleshelakhwo. 8Nabaruma eBetselehemu, naboola mbu Tsie mureebelesie muno amakhuwa komwana oyo; nolwa muba mumunyoolile, mukhupile omunwa, mbu siesi enzie emwinamile.
9Nabo olwa bali nibahuliile aka omuruchi yaboola, batsiililila khuluchendo lwabwe; ne lola, inyininyini eya bali nibaluutsi ebukwe yabeemilila, okhuula olwa yoola niyisinjila ikulu ewa omwana yali. 10Nolwa balola inyininyini, beekhoya omwikhoyo omukali. 11Nibeenjila munzu, nibalola omwana nende Mariamu nyina; nibakwa mumakuluke nibamwinamila; nibaboholola amabiikho kabwe nibamuyiniliamwo ebihaanwa, mbu itsahaabu, nobubaane, namanemane. 12Ne olwa beebaalilwa nende Nyasaye mwilooro mbu baleshe okhukalukha ewaHerode, beenyoshela khunjila yindi nibakalukha ewabwe.
Okhwilushila eMisiri
13Ne olwa bali nibeenyooshe, lola, malaika wOmwami yamuloleshela Yusufu mwilooro, nasunga ari Buukha, obukule omwana nende nyina, wilushe otsie eMisiri, omenyeyo okhuula olwa ndilikhukhupila omunwa; shichila Herode alakhaaba omwana mbu amwire. 14Naye nabuukha nabukula omwana nende nyina mushilo, natsia eMisiri; 15nabayo okhuula Herode olwa yafwa; mbu aka Omwami yaboola mumunwa kwomunabii koosibwe, mbu EMisiri newa ndamulanga omwana wanje.
Obwirwi bwabaana
16Mana Herode olwa yalola shinga abachesi khuketsinyininyini abo olwa bali nibamukaatiye, yatiilwa oburima muno, naruma abandu mbu beere abaana abasiani bosi abali nibali muBetselehemu, nende mumbali tsialio tsiosi, abemiyika chibili nende abaleemakhwo, eshise shinga olwa shiali eshia yanoonelesia khubachesi abo. 17Mana amakhuwa kali nikoosiibwe akasungwa nende Yeremia omunabii, ari
18Omwoyo kwahuliilikha muRama,
okhulila nende okhwikhuula okhunji,
Raheli nalililanga abaanabe;
nakhaya okhulemibwa omwoyo, shichila babulaho.
Okhurula eMisiri
19Ne olwa Herode yali namalile okhufwa, lola, malaika wOmwami yamuloleshela Yusufu mwilooro eMisiri, 20naboola mbu Buukha, obukule omwana nende nyina, otsie mushibala shiaIsiraeli; shichila abali nibayimanga obulamu bwomwana bamalile okhufwa. 21Naye nabuukha nabukula omwana nende nyina, natsia niyoola mushibala shiaIsiraeli 22Ne olwa yahulila mbu Arikhelao niye ourukanga ebuYahudi mushilenje shiaHerode samwana, yaria okhutsiayo; ne niyeebaalilwa nende Nyasaye mwilooro, yarulayo natsia mumbali tsieGalilaya, 23niyoola khwitaala elilangwa mbu Nazareti, namenyamwo; mbu mana akasungwa nende abanabii koosibwe, mbu yakhalangwa mbu omunNazorayo.
Currently Selected:
Matsayo 2: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
