Matsayo 18
18
Niwina ouli omukhongo?
(Mk. 9.33-37; Lk. 9.46-48)
1Khushise eshio abeechi nibeetsa ewa Yesu yali, nibareeba bari Kho niwina omukhongo mubwami owomwikulu? 2Nalanga omwana omutuutu, namura hakari wabo, nasunga mbu 3Emuboolela toto, mbu nimuba nimurashiukhana mwaba shinga abaana abatuutu, shimuleenjilakhwo mubwami obwomwikulu nahatuutu tawe. 4Kho omundu yesi owituutuyia shinga omwana uno omutuutu, omwenoyo nomukhongo mubwami obwomwikulu. 5Ne omundu yesi owinjisia omwana omutuutu mulala shinga uno khulwa eliira lianje, yanzinjisia isie.
Akokhurechekha abandu bakwe mubwonooni
(Mk. 9.42-48; Lk. 17.1-2)
6Ne omundu yesi owisichirasia khalala khurutuutu runo oru'suubililanga, bwakhamukaasila oluchina olukali lwabohwa mwikosilie, wasukunwa mulusiba olwomunyanza. 7Woowe khushialo khulwa ebiisichirasio! Okhuba ebiisichirasio shibilichweya okhwitsa ta, nebutswa woowe khumundu oyo ouchila eshiisichirasio nishiitsa!
8Ne omukhonokwo kata eshilenjeshio nishiba nishikhwisichirasinjia, oshireme oshisukune ehale; neshilayi winjile mubulamu noli omulema kata oweindieku, okhushila okhusukunwa mumulilo kwobumeli noli nemikhono chibili kata ebilenje bibili. 9Kata imoniyo niyiba niyikhwisichirasinjia, ochitsomole ochisukune ehale; neshilayi winjile mubulamu noli oweimoni ndala, okhushila okhusukunwa muGehena yomulilo noli netsimoni tsibili.
Oluchelo Iwelikondi eliakora
(Lk. 15.3-7)
10Mwiyile kahala, muleshe okhufwola mulala khubatuutu bano; okhuba emuboolela mbu mwikulu abamalaika babwe obushia balolanga obweni bwaPapa ouli mwikulu. [11Shichila Omwana wOmundu yeetsa okhuhonia eshieneshio eshiali nishiakora.]
12Muluutsi murie? Omundu yesi naba nali nende amakondi eshikhumi, elala khuko niliba nilikorile, shialekhanga kalia amakhumi shienda nashienda, natsia mubikulu, nakhaaba lienelo elikorile? 13Ne naba nalinyoola, emuboolela toto mbu aliikhoyelanga muno okhushila kalia amakhumi shienda nashienda akarakorilekhwo ta. 14Kho kario khandi, Seenywe ouli mwikulu shiachama mbu mulala owokhubatuutu bano akore ta.
Omwana weenywe ouba niyoonoonile
(Lk. 17.3)
15Ne omusiani weenywe naba nakhwonoonela, tsia omumanyie eshikhashie nimuli mwenyene, iwe ninaye; naba nakhuhulila, kho onyoolile omusiani weenywe. 16Ne naba narakhuhulila ta, otsie nende oundi mulala kata babili, mbu khuminwa chiabaloli babili kata bataru buli likhuwa litinyisibwe. 17Ne naba nakhaya okhubahulila, oboolele ikanisa; ne naba nakhaya okhuhulila kata ikanisa, abe khwiwe shinga Omunamahanga nomusololi wobushuru.
Akokhuboha nokhuboholola
18Emuboolela toto mbu ebindu biosi ebia mulabohanga mushialo, bilaba nibiboyilwe mwikulu; nebindu biosi ebia mulabohololanga mushialo, bilaba nibiboholoolwe mwikulu. 19Khandi emusunjila mbu babili khwinywe nimuba nimufuchilisania mushialo khwikhuwa elia balasaba, lilabakholelwa nende Papa ouli mwikulu. 20Okhuba babili kata bataru aha bakhung'aanila halala muliira lianje, nasi siesi embeetsangaho hakari mubo.
Oluchelo Iwomusumba owabula obulesheli
21Mana Petero niyeetsa namureeba ari Omwami, omwana weefwe yakhanzonoonela okhuula khanga, nasi nimuleshelanga? Okhuula musaafu noho? 22Yesu namukalusia ari Shikhuboolela mbu okhuula musaafu ta, habula mbu okhuula amakhumi musaafu khandi musaafu.
23Khulwako obwami obwomwikulu buchelasibwa nende omuruchi undi owali niyeenya okhubasia nende abasumbabe amakhuwa. 24Ne olwa yali nachaachile okhubala, yaleerelwa oundi owali nelikobi lietsitalanda ebikhumila likhumi. 25Ne olwa yali nabula nende eshia arunga, omwamiwe yalaka mbu akusibwe amapeesa, halala nende omukhasiwe, nabaanabe, nemianduchie chiosi, likobi nalio lirungwe. 26Omusumba oyo nakwa mumakuluke, namwinamila, naboola mbu Omwami, undisimilisilie, ne ndalakhurunga biosi. 27Mana omwami womusumba oyo yamutiililwa tsimbabasi, namulekhuula, namuleshela likobi. 28Naye omusumba oyo yarula natsia nanyoola oundi owokhubasumba bashie, owali niyamwiholakhwo tsitinari eshikhumi; namuhamba, namutiila mwikosi, naboola ari Runga likobi lianje. 29Habwenaho omusumba washie nakwa mumakuluke, namusaaya, ari Undisimilisilie, ne ndalakhurunga. 30Naye nakhaya, nebutswa yatsia namura mumbohe, okhuula olwa yakhaba narunjile eshiali nishikhoyeele. 31Kho olwa abasumba bashie balola akali nikeekholile, babeelela muno, nibatsia nibamuboolela omwami wabwe kosi akali nikeekholile. 32Mana omwamiwe namulanga, namusunjila mbu Omusumba omumayaanu iwe, ekhulesheele likobi elo liosi shichila usaayile; 33nawe shiobeele nokhoyile okhumubeela omusumba washio tsimbabasi, shinga isie olwa ekhubeeleele iwe? 34Omwamiwe natiilwa oburima, namuhaana mumikhono chiabo abasaaliisinjia okhuula olwa yakhaba narunjile biosi ebiali nibikhoyeele. 35Nindio Papa ouli mwikulu yesi alamukholela inywe ario, nimuba nimuraleshelana buli mundu nowashie mumioyo chieenywe ta.
Currently Selected:
Matsayo 18: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
