Matsayo 19
19
Aka Yesu yeechesia khukokhulekhana khwomusaatsa nomukhas we
(Mk. 10.1-12; Lk. 16.18)
1Haho olwa Yesu yali namalile amakhuwa ako, yarula eGalilaya, niyoola mungongo tsiebuYahudi injelekha waYorodani; 2emikanda emikhongo nichimulondakhwo; naye nabahonilia ebweneyo.
3AbaFarisayo bandi nibeetsa ewa yali nibamuteema, nibareeba bari Nomusilo omundu okhwilusia omukhasiwe khulwa buli shifune noho? 4Naye nakalusia, nareeba ari Murashiasooma mbu owabalonga okhurula khukhuchaaka yabalonga omusaatsa nende omukhasi, 5naboola mbu Ne niko akachila omusaatsa alalekhanga samwana nende nyina, nahambana nomukhasiwe; nabo bombi balaba omubili mulala? 6Shibalaba babili khandi ta, habula omubili mulala; kho aba Nyasaye yahambania halala, omundu namundu aleshe okhukabukhasia. 7Nibamureeba mbu Kho nishiina eshiachila Musa niyakhulaka okhuhaana ibarwa yobukabukhani nokhumwilusia? 8Nababoolela ari Khulwa obutinyu bwemioyo chieenywe Musa yamufuchiilila okhwilusia abakhasi beenywe; nebutswa okhurula khukhuchaaka shikalinji kario ta. 9Nasi emuboolela mbu omundu yesi owilusia omukhasiwe habula khulwa obuheyi, nateeshia oundi, aheya; noyo oumuteeshia olwa aba niyeelusiibwe, yesi aheya.
10Abeechi nibamusunjila bari Amakhuwa komundu nomukhasiwe nikaba nikali kario, obuteeshani bubula inganga. 11Naye nababoolela ari Shibali bosi abanyala okhufuchiilila likhuwa elo ta, habula abo abanyalilwa. 12Shichila baliho abalate abeebulwa bario okhurula munda tsiabanyina khandi baliho abalate abakholwa bario nende abandu; khandi baliho abalate abeekhola bario abalate khulwa obwami obwomwikulu. Ounyala okhufuchiilila likhuwa elo, alifuchiilile.
Yesu yasabila abaana abatiiti ikhabi
(Mk. 10.13-16; Lk. 18.15-17)
13Mana yaleerelwa abaana abatiiti mbu abarekhwo amakhono nasaaya; abeechibe nibabakondeshela. 14Nebutswa Yesu naboola ari Leshe abaana abatiiti; murabakaania okhwitsa khumubili wanje ta; okhuba obwami bwomwikulu nobwabafwana shinga abo. 15Nabarakhwo amakhono, narulayo.
Omusooliili omuyinda
(Mk. 10.17-31; Lk. 18.18-30)
16Ne lola, oundi yamutsiila, naboola mbu Omwechesia, nelilayi shiina elia ndalakhola kho mana embe nobulamu bwobumeli? 17Naye namukalusia ari Mbushiina niureeba khukobulayi? Aliho mulala ouli omulayi; ne noba niwenya okhwinjila mubulamu, hulilanga amalako. 18Namureeba mbu Akali heena? Yesu naboola ari Oreera ta, Oraheya ta, Oreeba ta, Orachiikha ta, 19Heelesia so nende mawo oluyali; khandi mbu, Omuheelenje owashio shinga olwa wiheela omwene. 20Omusooliili oyo namusunjila ari Ako kosi engakholanga; eshia eshileemilekhwo nishiina? 21Yesu namusunjila ari Noba niwenya okhuba habwene, tsia okusie ebia oli ninabio, oheelesie abamanani, mana olaba nelibiikho mwikulu; mana witse, unondekhwo. 22Ne olwa omusooliili yahulila likhuwa elo, yeenyokha nabeeleele; shichila yali omwene mikunda emikali.
23Mana Yesu yasunjila abeechibe ari Emuboolela toto, mbu nobutinyu omuyinda okhwinjila mubwami obwomwikulu! 24Nasi emuboolela khandi mbu neshiangu ingamia okhubira munduhu yoluchela, okhushila owobuyinda okhwinjila mubwami bwaNyasaye. 25Nolwa abeechi bahulilakhwo, bahuka okhushila, bari Kho niwina owakhanyala okhuhonibwa? 26Yesu nabahenga nabasunjila mbu Khubandu lino shilinyalikha tawe; ne khuNyasaye amakhuwa kosi kanyalikhanga.
27Mana Petero nakalusia, namusunjila ari Lola, ifwe khwalekha biosi, nikhukhulondakhwo; kho nishiina eshia khwakhanyoole? 28Yesu nabasunjila mbu Emuboolela toto, mbu inywe abanondangakhwo, mushialo eshiyia olwa Omwana wOmundu aliikhala khushifumbi shioluyalilwe, nineenywe mwesi muliikhala khubifumbi ekhumi nabibibili, nimuyaasia tsimbia ekhumi natsibili tsiaIsiraeli. 29Ne buli mundu owalekha tsinzuS kata abasiani babwe, kata bambootsonyene, kata samwana, kata nyina, kata abaana, kata emikunda, khulwa eliira lianje, alanyoola okhuula eshikhumi, khandi alilia obulaame bwobulamu bwobumeli. 30Ne abanji abalinji abambeli baliba abeinyuma, nabalinji abeinyuma, abambeli.
Currently Selected:
Matsayo 19: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
