Mika 7
7
Obumayaanu bwaIsiraeli
1Ndafuba isie! Okhuba engwile shinga omunochi olwa bamalile okhunoka ebiamo ebiengu pe,
shinga omurulumi olwa bamalile okhuruluma tsinzabibu pe;
shibulaho eshisakanya eshia endia;
libulaho likhuyu lieshirongole elia omwoyo kwanje kwenya.
2Abariitsanga Nyasaye basishile mushialo;
mubandu abulaho omukololofu;
bosi bakoneshelanga eshitsayi;
buli mundu ayiimanga omwana wabwe nolurimba.
3Amakhono kabwe kali khumabii, okhukakhola neshinani;
omukhulundu nomuyaasii basaba eshiomufuusi;
omundu omukhongo arumbulanga amabii aka omwoyokwe kwenya;
ako kosi, bakalukha bulukha bario.
4Ouli omulayi khubo yeenga shinga lirakalu;
ouli omukololofu yeenga shinga olukaka lwamahwa;
inyanga yabalindi babwe, niyo eyobukuumwi bwabwe, yula;
bulaano okhukoyaasibwa khwabwe khuli okhwitsa.
5Orasuubilila owashio yesi,
kata oleesiikanga omwitsa yesi ta;
lindanga omuliango kwomunwakwo,
nokwikalila omukhasiwo oukona khushilifushio.
6Okhuba omusiani afwola samwana,
omukhaana abuukhanga nafukula nyina,
omukhaana nafukula nyakhufialanyene,
nabasuku bomundu nabomwitaalalie.
OMWAMI niye ouleeranga obulafu nobuhonia
7Nebutswa isie khulwanje, ndalahenganga khuMWAMI;
ndalalindiililanga Nyasaye wobuhonia bwanje;
Nyasaye wanje alambulilanga.
8Iwe omusuku wanje, orandikhoyela ta;
kata ningwa, ndalabuukha;
kata ninzikhala mushiilima,
OMWAMI alambeela obulafu.
9Ndaleefwila obululu bwOMWAMI,
shichila ndamwonoonela;
okhuula olwa alafunaanila eshiina shianje nakholela obuyaasii;
alarusia ebulafu nasi ndalalola obulunjishibwe.
10Mana omusuku wanje alalola,
tsisoni nitsimufuunikha oyo owareeba mbu OMWAMI Nyasayewo ali heena?
Tsimoni tsianje tsilamulola, nindikhoya;
bulaano alaseenelwa hasi,
shinga amatoyi khunjila.
11Inyanga eyokhuumbakha tsingobatsio!
Khunyanga eyo olwakho lulasitibwa ehale.
12Khunyanga eyo balakhwitsila nibarula eAshuru namataala keMisiri,
nokhurula eMisiri okhuula khuMwalo tsana;
okhurula khunyanza okhuula khunyanza yindi;
okhurula khushikulu okhuula khushikulu shindi.
13Nebutswa eshialo shilakwa likunda khulwabo abamenyangamwo,
khulwa ebiamo biebikhole biabwe.
Eshisa shiOMWAMI khuIsiraeli
14Yayanga abandubo neindabushiyo,
eshiayo shiobulaamebwo,
abamenya eshisoma mumutsuru hakari wemikunda eminulu;
baayenje muBashani naGileadi, shinga olwa bakholanga khale.
15Ndalabamanyia amakhuwa kamakana,
shinga olwa ndakhola mundaalo etsia warulilakhwo eMisiri.
16Amahanga kalalola nikafwimbwa omurwe khulwa amaani kako kosi;
balara emikhono khuminwa;
amarwi kabwe kalaba nikeekaale.
17Balakhomba olufu shinga inzokha,
shinga ebindu ebimoola hasi;
balarula mubwibisilo bwabwe nibarenga;
baleetsela OMWAMI Nyasaye weefwe nibatechela;
balaba nibaria khululwo.
18Ali heena omunyasaye owinga iwe,
ouleshelanga abandu obumayaanu,
nomaayia obukhayi bwomusikalo kwobulaamebwo?
Shiobiikhanga oburimabwo inziayo ta,
okhuba osangaalilanga obuheeli oburalilu.
19Olashiukhana nokhubeela tsimbabasi;
olaseenela obumayaanu bweefwe hasi webilenjebio.
Olasukuna ebionoono bieefwe biosi mulusiba olwomunyanza.
20Olakholela Yakobo akobwisiikwabwo,
nobuheelibwo oburalilu khuAburahamu,
shinga olwa weetsubila abakuuka beefwe okhurula khale nakhale.
Currently Selected:
Mika 7: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975