Mariko 12
12
Oluchelo lwabalimili bemitsabibu
(Mat. 21.33-46; Lk. 20.9-19)
1Mana nachaaka okhuboolelana ninabo munjelo; ari Omundu undi yaraaka omukunda kwemitsabibu, nakubotokhasiakhwo olukaka, nayaba obwina bweingulu yeidivai, niyoombakha omunaara, nakuhosia abalimili, natsia mushialo shindi. 2Nolwa induukho yoola, yaruma omusumba undi khubalimili abo, mbu anyoole khubalimili ebiokhubiamo ebiomumukunda kwemitsabibu. 3Nabo nibamutiila, nibamunywekha, nibamwilusia amakhono amakhaya. 4Khandi yabarumila omusumba undi; omwenoyo bamwara tsinguma, nibamuhambia tsisoni. 5Mana naruma oundi; naye nibamwira; nende abandi abanji; abandi nibabanywekha, abandi nibabeera. 6Ne yali nashili ninaye mulala, omwanawe owa yaheela muno; olunyuuna lwabosi yamuruma ye khubo, naboola mbu Balamuria omwana wanje. 7Nebutswa abalimili abo basungana abeene, bari Uno niye owobulaame; chende khumwire, mana obulaame bulaba obweefwe. 8Nibamutiila, nibamwira, nibamuyinia mumukunda kwemitsabibu. 9Kho bulaano omwami omwene mukunda alakhola arie? Mbula aliitsa namalilana abalimili abo, naheelesia abandi omukunda okwo.
10Shimwasoomakhwo kata lihandiiko lino,
mbu Lichina elia aboombashi baloba,
lienelo liakholwa elikhulundu eliomukoona;
11lino liarula ewOmwami niliba eliamakama mumoni tsieefwe?
12Kho nibakhaaba okhumuhamba; ne bali nibariitsanga abomukanda; shichila balola shinga olwa yali nakhupile oluchelo olwo khubo; nibamurulakhwo, nibeenyokha.
Akokhurunga obushuru bwaKaisari
(Mat. 22.15-22; Lk. 20.20-26)
13Bamurumila abandi abokhuba Farisayo nende abokhubaHerode, mbu bamureche mumasungo. 14Nolwa bali niboolile, nibamusunjila bari Omwechesia, khumanyile shinga olwa oli owatoto, norateebanga akomundu yesi ta; shichila shiopaaranga khushiimo shiomundu yesi ta, ne mbu wibaalanga injila yaNyasaye mubwatoto; okhurunga obushuru khuKaisari nomusilo nohomba? 15Khurunje, nohomba khuleshe okhurunga? Naye namanya obubatsa bwabwe, nabasunjila ari Mundeema mbushi? Mundeerele itinari endole. 16Nibachileera. Nabareeba ari Nobwawina obukondo buno, nende lihandiiko lino? Nibamukalusia mbu NebiaKaisari. 17Yesu nababoolela mbu Ebili biaKaisari, mumurunjenje Kaisari; nebili ebiaNyasaye, mumurunjenje Nyasaye. Nibahuka muno.
Lireebo eliokhubulamushi
(Mat. 22.23-33; Lk. 20.27-40)
18AbaSadukayo bandi nibeetsa, ababoolanga mbu bubulaho obulamushi; nibamureeba 19bari Omwechesia, Musa yakhuhandiichila ari Omusiani wabwe omundu naba nafwa, nalekha omukhasi ne naralekha omwana yesi ta, kho omusiani wabwe akhoyile okhukalusia omukhasiwe, amubuusilie omwana wabwe omurwe. 20Bali nibaliho abasiani musaafu abomunzu ndala; owambeli yaleera omukhasi, ne nafwa naralekha olwibulo ta; 21owakhabili namukalusia, nafwa, naralekha olwibulo ta; kata owakhataru yesi ario; 22kata abo bosi musaafu shibalekhakhwo olwibulo tawe. Olunyuma wabo bosi omukhasi yesi nafwa. 23Mukhulamukha aliba omukhasi wawina khubo? Shichila bosi musaafu bali nibamuteeshia. 24Yesu nabasunjila mbu Shikali niko akachilanga nimushiama, mbu shimwamanya akamahandiiko kata obunyali bwaNyasaye shinga olwa buli, ta? 25Okhuba olwa balilamukha okhurula mubafu, shibaliteeshinjia kata okhuteeshibwa ta; ne baliba shinga abamalaika abomwikulu. 26Ne khumakhuwa kabafu, shinga olwa balamusibungwa, shimwasoomakhwo mushitabu shiaMusa, haShitsakha, shinga Nyasaye olwa yamuboolela ari Nisie Nyasaye waAburahamu, khandi Nyasaye waIsaka, khandi Nyasaye waYakobo? 27Shiali ye Nyasaye wabafu ta, habula wabali mwoyo; mwakorwa pe.
Lilako likhongo
(Mat. 22.34-40)
28Mulala khubahandiichi niyeetsa, nahulila nibareebananga ninaye, nalola shinga olwa yali nabakalusiye bulayi, namureeba ari Lili heena lilako eliranjilila mukosi? 29Yesu nakalusia mbu Eliambeli ndielino, mbu Iwe Isiraeli, hulila. Omwami Nyasaye weefwe nOmwami mulala; 30omuheelenje Omwami Nyasayewo nende omwoyokwo kwosi, neshiimoshio shiosi, nobuyililisibwo bwosi, nende amaaniko kosi. 31Eliakhabili ndielino, mbu Oheelenje owashio shinga olwa wiheela omwene. Libulaho lilako lindi elishila kano. 32Omuhandiichi oyo namusunjila mbu Toto mwene, Omwechesia, oteechile noboola mbu niye mulala; oundi ahumaho, habula ye; 33nokhumuheela nende omwoyo kwosi, nende obuchesi bwosi, nende amaani kosi, nokhuheela owashio shinga olwa wiheela omwene, khushila ebihaanwa ebisambe ebilamba nende emisango chiosi. 34Nolwa Yesu yalola shinga olwa yakalusia nobuchesi, yamusunjila mbu Shioli ehale nende obwami bwaNyasaye ta. Nokhurula habwenaho yabulaho owatsaalikha okhumureeba likhuwa liosi ta.
Lireebo eliokhuMwana waDaudi
(Mat. 22.41-46; Lk. 20.41-44)
35Olwa Yesu yali niyeechesinjia muhekalu yareeba mbu Abahandiichi baboolanga barie mbu Kristo nomwana waDaudi? 36Daudi omwene yasunga niyeebaalilwa nende Roho Omutakatifu, mbu
Omwami yasunjila Omwami wanje, ari
Yikhala khumukhono kwanje musaatsa okhuula olwa emba nikholile abasukubo babe aba olambisiakhwo ebilenje.
37Daudi omwene amulanganga mbu Omwami; kho yakhaba arie omwanawe? Abomukanda omukhongo okwo nibamuhulila nobusangaafu.
Yesu yafukula Abahandiichi
(Mat. 23.1-36; Lk. 11.37-54; 20.45-47)
38Ne mukhwibaalakhwe yaboola ari Mwirecheshe khulwa abahandiichi, abachamanga okhuchendachenda nibeefwalile ebiifwalo ebirambi, nokhushiesibwa muluyia, 39nebifumbi ebiambeli mutsisinagogi, nobwikhalo obukhulundu mumasabo; 40abatsana abaliitsanga tsinzu tsiabakhasi abalekhwa, ne khulwa obukaatii basaaya amasaayo amarambi; abeenabo nibo aba eshiina shilifwila eshikhongo.
Eshia omukhasi omulekhwa yahaana
(Lk. 21.1-4)
41Niyeekhala ahahengaane nende lisanduku liebihaanwa, nalola shinga abomukanda olwa bareetsanga amapeesa mwisanduku; abanji abili abayinda nibaramwo amanji. 42Mana omukhasi omulekhwa omumanani niyeetsa, naramwo ebiheela bibili, ebihela isende ndala. 43Kho nalanga abeechibe, nabasunjila ari Emuboolela toto mbu omukhasi uno omulekhwa omumanani areelemwo amanji okhushila bosi abareetsanga ebindu mwisanduku; 44okhuba abo bosi bareelemwo khumiandu chiabwe echiabashilaanila; ne ye khubutakhabwe areelemwo kosi aka ali ninako, niko kosi aka yakheekhoonyeele.
Currently Selected:
Mariko 12: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
