Mariko 13
13
Yesu yaboola akokhukwisibwa kweihekalu
(Mat. 24.1-2; Lk. 21.5-6)
1Nolwa yali narulanga muhekalu, oundi khubeechibe namusunjila mbu Omwechesia, lolakhwo amachina kano shinga olwa kali, kata nende tsinyumbashe tsino! 2Yesu namukalusia mbu Oluutsi tsinyumbashe tsino tsingali? Shililitong'aho lichina elala hekulu khulindi, eliralisukunwa hasi ta.
Eminyakhano nende obusandibwi
(Mat. 24.3-14; Lk. 21.7-19)
3Nolwa yali niyeekhaale khushikulu shiEmitseituni ahahengana nende ihekalu, Petero naYakobo naYohana naAnderea nibamureeba masilisi, bari 4Okhuboolelekhwo, mbu amakhuwa ako kaliikhola liina? Kata neshilolelo shiina eshilibaho ako kosi olwa kaliba nikali okhuusibwa?
5Naye Yesu nachaaka okhubaboolela ari Mwirecheshe, omundu yesi aleshe okhumushiamia. 6Abanji bakheetsenje muliira lianje, nibaboola bari Isie nisie; nibabashiamia bario abanji. 7Ne olwa mulahulilanga khukobusoolo nende amakhuwa kamahe, muleshe okhuhenda; ako kakhoyile okhwikhola; ne obumaliilishi nibushili. 8Okhuba lihanga lilabuushila khwihanga lindi, khandi oburuchi khuburuchi bundi; khulabaho okhurenga khweshialo eyi nende eyi; inzala nayo yilabeetsangaho; ako kosi nokhuchaaka butswa khweinumwa.
9Ne mwirecheshe; shichila balamukhobana nibamuyila mubiina; mutsisinagogi mulanywekhwa; ne mulasinjila imbeli wabaami nende abaruchi khulwanje, mube oburumbusi khubo. 10Ne khatimba injiili yiranjilile okhwilwatsilwa amahanga kosi. 11Nolwa bamuyila nibamwinjilila itookho, murahenda mbeli mbu namuboole shiina, tawe; ne kosi aka mulaheebwa khushise shieneshio, niko aka mulaboola; shichila shimuli inywe ababoola ta, habula Roho Omutakatifu. 12Omundu alakhoba omwana wabwe okhwirwa, nende samwana ario omwanawe; abaana nabo balabuushila khubeebuli babwe, nibachila nibeerwa. 13Ne mulakiywa nabandu bosi khulwa eliira lianje; nebutswa owifwila okhuula khushihesi, omwenoyo alahonibwa.
Akamasila amakali
(Mat. 24.15-28; Lk. 21.20-24)
14Ne olwa mulola Eshisinyo Shiobwonooneshi nasinjiile aha arakhoyile ta (ousooma ayililisie bulayi), mana abali mubuYahudi beelushile mubikulu; 15noyo ouba nali hekulu khushilama shieinzuye aleshe okhwikha kata okhwinjilamwo mbu ayinie eshindu shiosi eshili munzuye; 16kata ouba nali mumukunda arakalukha ingo okhubukula inguboye ta. 17Woowe khubaliba nibabeleeshe nende abaliba nibanuuninjia mundaalo etsio! 18Musaayenje mbu kaleshe okhwikhola murootso. 19Shichila tsindaalo etsio tsiliba tsiamatinyu, nakafwana kario kashili okhubaho kata okhurula khukhuchaaka khwobulonji obwa Nyasaye yalonga okhuula bulaano, kata shikalibakhwoho ta. 20Omwami alabula okhukhalaka tsindaalo, khane shiyakhahonile omundu kata mulala ta; nebutswa khulwa abalobole, aba yalobola, yakhalaache tsindaalo.
21Mundaalo etsio omundu naba namusunjila ari Lole, Kristo ngwowuno; kata mbu Lole, ngwoyo; murafuchiilila ta; 22shichila balibuukha abaKristo bobubeeyi nabanabii bobubeeyi, nibalolosia ebilolelo nende akamakana, mbu bakosie kata abalobole nikaba nikanyalikha. 23Ne inywe mwirecheshe; lole, emubooleele amakhuwa kosi khale.
Okhwitsa khwOmwana womundu
(Mat. 24.29-31; Lk. 21.25-28)
24Ne mundaalo tsienetsio, inyuma wamasila ako, omubasu kulikwa eshiilima, kata omwesi shikuliakhakhwo ta, 25tsinyininyini natsio tsiliakukhanga okhurula mwikulu, ebietsingufu ebiliho mwikulu nibitechesibwa. 26Mana balilola Omwana wOmundu niyeetsa mumaleesi nende obunyali obunji noluyali. 27Habwenaho aliruma abamalaikabe, nakhung'aasia abalobolebe okhurula ahamiyeka chiosi chine, okhurula khushihesi shieshialo okhuula khushihesi shielikulu.
Eliechesio liomukhuyu
(Mat. 24.32-35; Lk. 21.29-33)
28Kho bulaano mweche oluchelo khumukhuyu; mbu olwa lisaka liakwo libeetsanga liakhakalukha libisi nilisebukha, habwenaho mumanyanga mbu tsindaalo tsiomubasu omunji tsili ahambi; 29neenyu mwesi olwa mulalola amakhuwa kano nikeekhola, mumanye murio mbu ali ahambi, kata hamuliango bwene. 30Emuboolela toto, mbu Olwibulo luno shilulihwaho ta okhuula olwa kano kosi kaliba nikamalile okhuusibwa. 31Likulu nende eshibala bilihwaho; ne amasungo kanje shikalihwaho ta.
Abulaho oumanyilekhwo inyanga kata isaa ta
(Mat. 24.36-42; Lk. 17.26-30,34-36)
32Ne inyanga yene kata isaa yene, abulaho oumanyilekhwo, kata abamalaika abomwikulu ta, kata Omwana, habula Samwana. 33Mwirecheshe, nimuba meeso, [musaayenje]; shichila shimumanyile induukho olwa yiliula ta. 34Kali shingana omundu ouli khuluchendo mushialo shindi, niyaleshile inzuye naheelesiye abasumbabe obunyali, buli mundu khumulimokwe, nalachile omulindi weshilibwa yesi okhubeetsanga meeso. 35Khulwako mubeetsenje meeso; okhuba shi-mumanyilekhwo eshise eshia omwami omwenengo yeetsa okhwitsilamwo ta, kata mungoloobe, kata mushilo hakari, kata muyakashio, kata mumabwibwi; 36muleshe okhwitsukhana niyoolile, namunyoola nimukonile. 37Ne elia emuboolela inywe embaboolela bosi, mbu Mube meeso.
Currently Selected:
Mariko 13: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
