Mariko 14

Abeemilisi babandu basanjila Yesu

(Mat. 26.1-5; Lk. 22.1-2; Yoh. 11.45-53)

1Olunyuma lwetsindaalo tsibili lialilisabo liaPasaka nende eliOmukaate okubulamwo Amamela; abakhulundu babakuhani nende abahandiichi bali nibakhaabanga shinga olwa nabamuhambe mubuchesichesi nibamwira; 2okhuba basunga bari Khuleshe okhukhola mundaalo tsielisabo; indiri yakheekhola mubandu.

Yesu yabashilwa amafura eBetsania

(Mat. 26.6-13; Yoh. 12.1-8)

3Nolwa yali nali eBetsania munzu yaSimoni owobuchele, olwa yali niyeekhaale naliitsanga, omukhasi undi niyeetsa nali nende ichupa yamafura keshing'aari akobukusi obutinyu; niyaara ichupa, nakatsukha khumurwekwe. 4Ne bali nibalimwo abandu bandi abasinyikha abeene nabeene, bari Amafura kano kasasiibwe butswa kario mbushi? 5Shichila amafura kano kakhakusiibwe amapeesa akashila tsitinari ebikhumi bitaru, natsio nitsikabilwa abamanani. Nibamubuutsuluulila. 6Naye Yesu naboola mbu Muleshe abe; mumunyasinjia mbushi? Yakholeele omulimo omulayi. 7Okhuba abamanam mubeetsanga ninabo tsindaalo tsiosi; ne buli olwa mwenyanga lwosi munyala okhubakholela amalayi; ne isie shimuli ninasi tsindaalo tsiosi ta. 8Akholile aka anyala; yeekholeeleele okhunzushiilila omubii kwanje amafura khulwa okhuyabilwa. 9Ne emusunjila toto, mbu Buli aha Amakhuwa Amalayi kaleelwatsungwa mushialo shiosi, akeenako aka omukhasi uno akholile nako kalarumbulungwa, kabe eshiitsuliloshie.

Yuda yafuchiilila okhukhoba Yesu

(Mat. 26.14-16; Lk. 22.3-6)

10Ne Yuda Isikariote oyo, owali mulala khwIkhumi-nababili abo, yarula natsia ewabakhulundu babakuhani, mbu amukhobe mumakhono kabwe. 11Nabo, olwa bahulilakhwo, basangaala nibamulaka okhumuheelesia amapeesa. Naye nakhaaba obwiyangu okhumuhaana mumakhono kabwe.

Yesu yalia Pasaka halala nabeechibe

(Mat. 26.17-25; Lk. 22.7-14,21-23; Yoh. 13.21-30)

12Mana khunyanga yambeli yemikaate echibulamwo amamela, eya bali nibamalilangakhwo Pasaka, abeechibe nibamureeba bari Hali heena aha wenya khutsie khukasie aha noliile Pasaka? 13Naye naruma babili abokhubeechibe, nababiila mbu Mutsie mwitookho, ne mulabukaana nende omusaatsa owituushile isiongo yamatsi; mumulondekhwo; 14ne hosi aha nayeenjile, musunjile omusaatsa omwenengo muri Omwechesia areeba mbu Shili heena eshisika shianje shiobucheni omwa nendiile Pasaka halala nende abeechi banje? 15Naye omwene alamumanyia eshisika eshikali eshiahekulu, eshialilwe nishirecheekhwe; mubwenomwo mukhukasilie. 16Abeechi abo nibarula, niboola khwitookho, nibanyoola bario shinga olwa yali nabasunjiile; nibakasia Pasaka.

17Nolwa bwoola mungoloobe, niyeetsa halala nende abo Ekhumi-nababili. 18Nolwa bali nibeekhale nibaliitsanga, Yesu yaboola mbu Emuboolela toto, mbu mulala khwinywe, ouliitsanga ninasi halala, yeetsa okhukhoba. 19Nibachaaka okhubeelela, nibamureeba mulala mulala, bari Nisie noho? 20Nabasunjila ari Nimulala khubano Ekhumi-nababili, owa khutonjela ninaye halala mulukaye. 21Okhuba Omwana wOmundu yeenyokha, shinga olwa kamuhandiichilwa; ne woowe khumundu oyo oumukhoba Omwana wOmundu! Omundu oyo alabula okhwibulwa ta, khane bwakhabeele obulayi khuye.

Okhusimikha khwelisabo liOmwami

(Mat. 26.26-30; Lk. 22.15-20; 1 Kor. 11.23-26)

22Nolwa bali nibaliitsanga yabukula omukaate, ne namalile okhukusabila ikhabi, yakusonyola, nabaheelesia, nasunga ari, Bukule; kuno nomubili kwanje. 23Nabukula eshikombe, ne namalile okhushiupila mbu orio, yabaheelesia; bosi nibanywakhwo. 24Nabasunjila mbu Kano namabanga kanje akeIndakano, akeebeenela abandu abanji. 25Emuboolela toto mbu shindalanywakhwo khandi khubiamo biemitsabibu ta, okhuula khunyanga yilia olwa ndalanywakhwo obuyia mubwami bwaNyasaye. 26Nolwa bali nibamalile okhwimba olwimbo barula nibatsia ebunashikulu shiEmitseituni.

Yesu yaboola khale aka Petero okhumwambakhana

(Mat. 26.31-35; Lk. 22.31-34; Yoh. 13.36-38)

27Yesu nababoolela ari Inywe mwesi namwisichirasibwe; shichila kahandiikwa mbu Ndalamukhupa omwayi, nako amakondi kalasalaana. 28Nebutswa, olwa ndakhabe nimalile okhulamusibwa, ndakhamuranjilile okhutsia eGalilaya. 29Naye Petero namusunjila mbu Kata bosi nibaba nibeesichirasibwa, ne isie ta. 30Yesu namusunjila ari Ekhuboolela toto mbu iwe, eshilo shiolwa leelo, itaywa niyirashialakula khabili ta, olandiyambakhana khataru. 31Naye nameeta okhuboola butinyu muno, ari Kata nimba nikhoyile okhufwa ninawe, shinekhwiyambakhanekhwo ta Khandi bosi nihahoola bario.

Yesu yasaayila eGetsesemane

(Mat. 26.36-46; Lk. 22.39-46)

32Niboola habundu ahalangwa mbu Getsesemane; nasunjila abeechibe ari Mwikhale hano, nishisaaya. 33Natsia nende Petero naYakobo naYohana, nachaaka okhurambilwa elala, nasitohelwa okhushila mumwoyo. 34Nabasunjila ari Omwoyo kwanje kuli neshibeela eshinji; shienya okhunzira; mulinde hano, ne mube meeso. 35Natsiakhwo imbeli hatiiti, niyeekhupa hasi, nasaaya mbu, nikaba nikanyalikha, eshise eshio shimubirekhwo. 36Naboola mbu Aba, Papa, amakhuwa kosi kanyalikhanga khwiwe; umbiniekhwo eshikombe shino; nebutswa karaba aka enzenya isie ta, habula aka iwe wenya. 37Niyeetsa, nabanyoola nibali mundoolo, nasunjila Petero ari Simoni, okona? Shionyalile okhuba meeso isaa ndala ta? 38Mube meeso, nimusaaya, mbu muleshe okhwinjila mukhuteemwa; omwoyo nomwangu okhwiyama, ne omubili nomutofu. 39Khandi natsia, nasaaya, naboola amakhuwa amalala akeenako. 40Niyeetsa khandi, nabanyoola nibali mundoolo, shichila tsimoni tsiabwe tsiali nitsisitoohe; nibakorwa elia bamukalusia. 41Niyeetsa olwakhataru, nabasunjila mbu Kho mushikona bukona nimuhuluukha noho? Shikahelile? Eshise bulaano shiakhoola, lole, Omwana wOmundu akhobilwe mumakhono kaboonooni. 42Buushe, khutsie; lole, ou'khoba ali ahambi.

Yesu yakhobwa, nahamhwa

(Mat. 26.47-56; Lk. 22.47-53; Yoh. 18.2-11)

43Habwenaho, olwa yali nashisunga, Yuda niyeetsa, mulala khwIkhumi-nababili abo, nali nende omukanda kwabetsinganga nende tsindabushi, abarula khubakhulundu babakuhani nende abahandiichi nende abakofu. 44Ne omwenoyo owamukhoba yali nabamanyiye eshilolelo, nasunga ari Owa nenzunzuune, neniye; mumuhambe, mumuyile bulayi. 45Nolwa yali niyoolileyo, habwenaho niyeetsa ewa Yesu yali, nasunga mbu Rabi; namutsunzuuna muno. 46Mana nibamukwakhwo, nibamutiila. 47Ne oundi khubasinjilaho yatsomola olukangalwe, nakhupa omusumba womukuhani omukhulundu, namurema eshirwi. 48Yesu naye nakalusia, nabasunjila mbu Murulile nende tsinganga netsindabushi okhundiila, shinga abeetsela omunuuli? 49Ndabeelenje nineenywe halala muhekalu khatsotselo ninzechesinjia, nimurambamba ta; ne lekha akamahandiiko koosibwe. 50Bosi nibamulekha nibeelukha. Omusooliili ozaeelukha 51Ne omusooliili undi yamulondakhwo, niyaabaale ingubo yeikitani khumubilikwe omukhaya; nibamuhamba; 52ne yalekha ingubo yeikitani eyo, niyeelukha eshihechenye.

Okhuyaasibwa khwaYesu

(Mat. 26.57-68; Lk. 22.54-55,63-71; Yoh. 18.12-14,19-24)

53Nibamuyila Yesu ewomukuhani omukhulundu; nibakhung'aanayo halala ninaye abakhulundu babakuhani bosi, nabakofu nende abahandiichi. 54Naye Petero yali ehalekhwo namulondangakhwo, okhuula mulwanyi Iwomukuhani omukhulundu mukari; yali niyeekhaale halala nende abakhalabani, niyoora omulilo.

55Abakhulundu babakuhani nende abeshiina bosi nibakhaaba obuloli khuYesu mbu bamwire; ne shibabunyoola ta. 56Okhuba abanji barumbula obuloli bwobubeeyi khuye, nebutswa oburumbusi bwabwe shibwafuchilisania ta. 57Abandi nibasinjila nibarumbula obuloli bwobubeeyi khuye, bari 58Khwamuhulila nasunga mbu Ndalalikulula ihekalu yino eyoombakhwa namakhono, mana mundaalo tsitaru ndaloombakha eyindi eyiroombakhwa namakhono ta. 59Ne kata kario oburumbusi bwabwe shibwafuchilisania ta. 60Mana omukuhani omukhulundu nasinjila hakari wabwe nareeha Yesu ari Shiokalusia likhuwa ta? Namakhuwa shiina aka bano barumbulanga khwiwe? 61Naye naholeela butswa, narakalusia likhuwa liosi ta. Omukuhani omukhulundu namureeba olwakhabili, namusunjila mbu Niwe Kristo owatsana, Omwana woyo owitsoomibwa? 62Yesu naboola mbu Isie nisie; khandi mulalola Omwana wOmundu niyeekhaale khumukhono omusaatsa kwObunyali obwo, niyeetsanga mumaleesi akomwikulu. 63Haho omukuhani omukhulundu narandula inguboye, naboola mbu Khushikhaaba abaloli mbushi? 64Inywe muhuliile obwichelasi bwene; muluutsi murie? Bosi nibamukhalachila eshiina mbu akwanile okhufwa.

65Mana abandi nibachaaka okhumunyilikhakhwo amare, nibamufwimba mumoni, nibamuupa ebifuusi, nibamusunjila mbu Lakula; abakhalabani nabo nibamupaama tsikhofi.

Petero yamwambakhana Yesu

(Mat. 26.69-75; Lk. 22.56-62; Yoh. 18.15-18,25-27)

66Ne olwa Petero yali nali emwalo, mulwanyi, oundi owokhubakhaana abakholi bomukuhani omukhulundu niyeetsa; 67nolwa yalola Petero niyooranga omulilo, yamuhenga, nasunga mbu Wesi wabeele nende omuNazareti oyo, Yesu. 68Naye niyeeyambakhana, ari Shimanyile aka osunga ta, kata shimbulilanga ta; narula natsia hashilibwa; mana itaywa niyilakula. 69Omukhaana oyo namulola, nachaaka khandi okhubasunjila abali nibasinjiileho, ari Uno nimulala khubo. 70Naye niyeeyambakhana khandi. Nolunyumakhwo khandi abo abali nibasinjiileho nibasunjila Petero bari Toto mwene shiochweya okhuba mulala khubo ta; shichila oli omuGalilaya. 71Naye nachaaka okhwifuuha niyeetsubs, ari Shimumanyile omundu uno owa muboolangakhwo tawe. 72Habwenaho itaywa niyilakula olwakhabili. Mana Petero niyeetsulila likhuwa, shinga Yesu olwa yali namusunjiile, mbu Itaywa niyirashialakula khabili ta, naundiyambakhane okhuula khataru. Narundukha mukhulila.

Currently Selected:

Mariko 14: OUV

Highlight

Compare

Copy