Mariko 3
3
Omundu owomukhono okwanyela
(Mat. 12.9-14; Lk. 6.6-11)
1Niyeenjila khandi musinagogi; ne yalimwo omundu owa omukhonokwe kwanyela. 2Nibamuyichila okhulola naba niyakhamuhonia khuSabato, mbu kho bamwinjilile itookho. 3Nasunjila omundu oyo owa omukhonokwe kwanyela ari Sinjila hakari. 4Mana nabareeba ari Kafuchiililwa okhukhola amalayi nohomba okhukhola amabii khuSabato, okhuhonia obulamu nohomba okhwira? Nabo nibaholeela tsi. 5Naye nabahenga eyi nende eyi noburima, nahuka muno khubutinyu bwemioyo chiabwe, nasunjila omundu oyo mbu Kololosia omukhonokwo. Nakukololosia, omukhonokwe nikukalukha habwene. 6Habwenaho abaFarisayo nibarula halala nende abaHerode, nibamusanjila okhukhaaba shinga olwa nabanyale okhumwira.
Omukanda omukhongo khuluchinga Iweinyanza
7Yesu narulaho nende abeechibe nibatsia hanyanza; omukanda omukhongo kwarula eGalilaya nikulondana ninayei nabebuYahudi 8nende Yerusalemu nende Idumaya nende injelekha weYorodani nende mumbali tsieTiro nende Sidoni, omukanda omukhongo, olwa bahulila aka yakholanga nibatsia ewa yali. 9Nabiila abeechibe mbu eliaro libeele ahambi ninaye omukanda kwakhamutiya; 10shichila yali nahoniye abanji, okhuula olwa bosi abanyakhananga mumibili chiabwe bamufwindisia mbu bamutiilekhwo. 11Olwa abaroho beshifwabwi bamulolanga beekhupanga hasi mumakuluke, nibayiiba, bari Niwe Omwana waNyasaye. 12Naye nabasiomela butinyu, mbu baleshe okhumubuula.
Yesu yalobola abeechi ekhumi nababili
(Mat. 10.1-4; Lk. 6.12-16)
13Kho naniina mushikulu, nalanga abo aba yachama okhulanga, nabo nibatsia ewa yali. 14Nabukula ekhumi nababili nabaraho mbu babeetsenje ninaye, khandi mbu abarumenje okhwilwatsa, 15nibaba nobunyali okhurusinjia amadimoni. 16Kho yaraho abo Ekhumi-nababili, nabo mbabano, mbu Simoni owa yakulikha mbu Petero, 17Yakobo waZebedayo, nende Yohana omwana wabwe Yakobo; nabo yabalaha mbu Boanerige, eshisina mbu Abaana bOmukukumo; 18Anderea, naFilipo, naBaritsolomayo, naMatsayo, naTomasi, naYakobo waAlufayo, naTsadayo, naSimoni Omukananayo, 19nende Yuda Isikariote, owatsana owamukhobana.
Yesu naBeelezebuli
(Mat. 12.22-32; Lk. 11.14-23; 12.10)
Mana niyeenjila munzu. 20Abomukanda nibakhung'aana khandi, okhuula olwa bakhaywa kata okhulia ebiliibwa. 21Abomunzu yabwe olwa bahulilakhwo barula nibatsia okhumutiila, shichila abandu bali nibaboolanga mbu ulaluushe. 22Abahandiichi abali nibakholomooshe okhulula eYerusalemu basunga mbu Beelezebuli ali ninaye, khandi mbu arusinjia amadimoni khulwa obunyali bwomwami wamadimoni. 23Naye nabalanga nabasunjila muluchelo, ari Setani yakhanyala arie okhurusia Setani? 24Oburuchi bwosi nibuba nibwahukhana obwene khubwene, oburuchi obwo shibunyala okhusinjila tawe. 25Kata inzu yosi niyiba niyahukhana eyene khuyene, inzu eyo shiyilanyala okhusinjila tawe. 26Kata Setani naba niyeekholela omwene induli, abeetsanga niyaahukhaane, naranyala okhusinjila ta; kho yoolile khushihesi. 27Ne kata abulaho ounyala okhwinjila munzu yomunelu wamaani, wayaaya emianduchie, habula naranjiliile okhumuboha omundu oyo wamaani; nilwo olwa ayaaya inzuye. 28Emuboolela toto, mbu abandu balaleshelungwa ebionoono biabwe biosi kata nende obunyechi bwabwe obwa banyeka Nyasaye; 29nebutswa ounyeka Roho Omutakatifu shialikhwo nobuleshelwi inziayo ta; ali neshikha shieshionoono shiobumeli. 30Shichila bali nibaboolanga mbu Roho weshifwabwi ali ninaye.
Nyina Yesu, nende abaana babwe
(Mat. 12.46-50; Lk. 8.19-21)
31Nyina nende abaana babwe nibeetsa nibasinjila elwanyi nibarumana okhumulanga. 32Omukanda kwabandu bali nibeekhaale nibamubotokhaane; nibamuboolela bari Lola, mawo nende abaana beenywe bali elwanyi; bakhwenya. 33Naye nakalusia, nabasunjila mbu Mama niye wina, kata abaana beefwe nibeena? 34Nahenga eyi nende eyi khubandu abeekhala nibamubotokhaane, nasunga mbu Mama nende abaana beefwe mbabano. 35Omundu yesi oukhola aka Nyasaye yeenya, omwenoyo niye omusiani weefwe, khandi omukhaana weefwe, khandi mama.
Currently Selected:
Mariko 3: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
