Mariko 8
8
Yesu yaliisia abandu ebikhumila bine
(Mat. 15.32-39)
1Mundaalo etsio, olwa omukanda omukhongo kwaliho khandi, nibabula eshiokhulia, yalanga abeechibe, nabasunjila mbu 2Endiililwa omukanda kuno eshisa, shichila leelo lukhola khataru nibabeetsanga ninasi nibarali nende eshia balia ta. 3Nimba nimbaseebula batsie ingo nibali inzala bakhahlumbutsanila khunjila, ne abandi khubo barulile ehale. 4Abeechibe nibamukalusia bari Mushitsiimi muno omundu yakhanyoola heena emikaate echihela okhubeekusia abandu bano? 5Nabareeba mbu Muli nemikaate chinga? Nibakalusia mbu Nimusaafu. 6Nababiila abomukanda mbu beekhale hasi; nolwa yali nabukuule emikaate echio musaafu nende okhuupa orio yachisonyola nabakabila abeechibe mbu babarenjeshele; nabo nibachirenjekha imbeli wabomukanda. 7Khandi balikhwo norunyeeni oruleemu. Olwa yali narusabiile ikhabi yababiila abeechibe okhururenjekha narwo imbeli wabwe. 8Nibalia nibeekura; nibatoola ebisonye ebiatong'a, ebimwelo musaafu. 9Abandu bali shinga ebikhumila bine. Naye nabaseebula. 10Mana niyeenjila muliaro halala nende abeechibe niboola mungongo tsieDalamanutsa.
AbaFarisayo basaba eshilolelo
(Mat. 16.1-4; Lk. 12.54-56)
11Haho abaFarisayo nibeetsa nibayingana ninaye. Bamusaba eshilolelo eshirula mwikulu, nibamuteema. 12Naye niyeesia amahumo mumwoyokwe, nasunga mbu Olwibulo luno lusabanga eshilolelo mbushiina? Emuboolela toto, mbu olwibulo luno shilulaheebwakhwo eshilolelo shiosi ta. 13Mana nabarulakhwo, niyeenjila khandi muliaro niyeenyokha niyaambukha injelekha.
Amamela kabaFarisayo nakaHerode
(Mat. 16.5-12)
14Bali nibeebiliile okhubukula emikaate, nibaralikhwo nende eshindu muliaro ta habula omukaate mulala kwonyene. 15Nabalaka ari Mubeetsenje meeso, nimwiyila kahala khulwa amamela kabaFarisayo nende amamela kaHerode. 16Nabo bali nibeefuubilanangal abeene bonyene khukachilile nibabula nomukaate. 17Yesu yamanya ario, nabasunjila ari Mbushiina nimwifuubilananga abeene mwenyene murio khukachilile nimubula omukaate? Mushili okhumanya nende eshisina ta? Emioyo chieenywe chishili butswa emisiro? 18Tsimoni muli ninatsio; shimuloIanga ta? Amarwi muli ninako; shimuhulilanga ta? Kata shimwitsulilanga ta? 19Olwa ndasonyolela abo ebikhumila biraano emikaate chiraano, mwatoola ebisonye ebiahela ebimwelo binga? Nibakalusia mbu Ekhumi nabibili. 20Nolwa ndasonyolela abo ebikhumila bine emikaate musaafu, mwatoola ebisonye ebiahela ebimwelo binga? Nibamusunjila mbu Musaafu. 21Nabasunjila mbu Mushili okhumanya eshisina? Omubofu yahonilibwa eBetsesaida 22Niboola eBetsesaida. Abandu nibamuleerela omubofu undi nibamusaaya mbu amutiilekhwo. 23Yamutiila omubofu omukhono namuyila elwanyi welitaala, ne olwa yali nafuutsile amare mumonitsie namureelekhwo amakhono, yamureeba mbu Ololakhwo eshindu noho? 24Naye nachinguula tsimoni, nasunga ari Endola abandu okhuba beengana shiemisaala, nibachenda. 25Mana namurakhwo amakhono khumoni khandi, naye nalola bulayi. Yali nahonile, nalola ebindu biosi ebili ehale habwene. 26Yesu namuseebula atsie ebunangowe; nasunga ari Oraboolelakhwo omundu mwitaala ta.
Aka Petero yarumbula khukaYesu
(Mat. 16.13-20; Lk. 9.18-21)
27Yesu narula nende abeechibe nibatsia mumataala kaKaisaria-Filipi. Olwa bali khunjila yareeba abeechibe ari Abandu baboolanga barie khwisie, mbu nisie wina? 28Nibakalusia nibamuboolela bari Yohana Omubatisii; nabandi, bari Eliya; nabandi, bari Mulala khubanabii. 29Nabareeba mbu Neenyu muboolanga murie, mbu nisie wina? Petero nakalusia, namusunjila mbu Niwe Kristo. 30Naye nabakaania butinyu oburamuboolela omundu yesi akeke ta.
Yesu yaboola akokhufwakhwe
(Mat. 16.13-20; Lk. 9.22-27)
31Yachaaka okhubeechesia mbu Omwana wOmundu akhoyile okhwifwila amakhuwa amanji, nokhulobwa nende abakofu nabakuhani abakhulundu nabahandiichi, nokhwirwa, mana inyuma wetsindaalo tsitaru okhulamukha; 32ne yasunga likhuwa elo katong'ane. Petero namuyila halubeka, nachaaka okhumukaania. 33Naye nashiukhana nahenga abeechibe, namukaania Petero. Nasunga mbu Kalukha munyuma wanje, Setani, okhuba shiopaaranga amapaaro kaNyasaye ta, habula amapaaro kabandu. 34Nalanga abomukanda halala nabeechibe, nabasunjila ari Omundu yesi naba niyeenya okhuba omulondi wanje, yeekanie omwene, yeetuushe omusalabakwe, yanondenjekhwo. 35Okhuba owenya okhuhonia obulamubwe, alabukosia; ne oubukosia obulamubwe khulwanje khandi khulwa Injiili alabuhonia. 36Shichila kamukaasila shiina omundu, okhwinyoolela eshialo eshilamba, ne obulamubwe nibumubukulwakhwo? 37Kata nishiina eshia omundu yakhanyala okhukulaasia obulamubwe? 38Shichila omundu yesi oufwimbilwa isie nende amakhlwa kanje omurwe, mulwibulo luno olwobwonooni, olubula obwisiikwa, khandi Omwana wOmundu alamufwimbilwa ye omurwe olwa yeetsa muluyali lwaSamwana halala nende abamalaika abatakatifu.
Currently Selected:
Mariko 8: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
