Mariko 7
7
Ameechio kabakofu
(Mat. 15.1-9)
1Haho olwa abaFarisayo bali nibakhung'aanile ewa yali, nende abandi abokhubahandiichi abali nibarulile eYerusalemu, 2balola abandi abokhubeechibe nibaliitsanga ebiliibwa nama-misu, eshisina mbu amakhono akarasaabilwe ta. 3Okhuba abaFarisayo nende abaYahudi bosi bahandanga khumakhuwa aka beechesibwa nabakofu, oburaliitsanga nibarashiasaaba amakhonol ta; 4kata nibarulile khushiiro shibaliitsanga eshindu shiosi obureeyosiye tawe; biliho nende ebiima bindi ebinji ebia bahandangakhwo, shinga ebiokhwosia ebikombe, nebimuka, nebifulia. 5Kho abaFarisayo nende abahandiichi nibamureeba, bari Nishiina eshichilanga abeechibo nibareeyila muka beechesibwa nabakofu ta, nebutswa nibaliitsanga ebiliibwa namamisu? 6Nabakalusia mbu Isaya yalakula habwene khwinywe abobukaatii, olwa yahandiika mbu
Abandu bano bambeelesinjia oluyali neminwa,
ne emioyo chiabwe chili ehale ninasi.
7Banyinamilanga butswa, nibeechesinjia ameechesio kabwe akali butswa amalako kabandu.
8Mulekhanga lilako liaNyasaye, nimuhanda khuka mwechesibwa nabandu. 9Khandi nabasunjila ari Mwamanya bulayi okhulekha lilako liaNyasaye mbu mana mureho amakhuwa aka mwechesibwa inywe! 10Okhuba Musa yaboola ari Heelesinjia so nende mawo oluyali; khandi ari Oufwola samwana kata nyina, okhuula afwe. 11Nineenywe muboolanga muri Omundu naba nasunjila samwana kata nyina mbu Eshieneshio eshia ndakhakhukhoonyile ninashio ni Korobani, eshisina mbu shiahuliilwe Nyasaye 12ne bulaano shimumufuchiilila okhukholela samwana kata nyina likhuwa khandi ta. 13Kho mukeenywe aka mwechesibwa, aka muungulanga, mwiranga likhuwa liaNyasaye. Mukholanga amakhuwa amanji akafwana kario.
Akoonooninjia omundu
(Mat. 15.10-20)
14Nalanga omukanda ewa yali khandi, nabasunjila ari Mumbulile, inywe mwesi, nimutiila khushisina. 15Shibulaho eshindu eshirula elwanyi womundu mana nishiinjila muye eshinyala okhumwonoonia. Habula akarulanga mumundu niko akamwonooninjia. [16Omundu yesi nali nende amarwi akokhuhulila, ahulile.]
17Olwa yali narulile ewa omukanda kwali niyeenjiile munzu, abeechibe bamureeba akoluchelo olwo. 18Nabasunjila ari Khane kata inywe mulemile murio obumanyilisii? Shimumanyile mbu shibulaho eshindu eshirula elwanyi womundu mana nishiinjila muye, eshinyala okhumwonoonia? 19Shichila shishiinjilanga mumwoyokwe ta, habula munda, nishirula shitsia elwanyi. Kho ario yabiyiniakhwo emisilo ebiliibwa bietsimbia tsiosi. 20Nasunga mbu Akeenako akarulanga mumundu niko akamwonoononjia; 21shichila nokhurula mukari, mumioyo chiabandu, omwa murulangamwo amayililisio amabii, ngakano mbu obusooti, nobwifi, nobwiri, nobuheyi, 22nobwikombi obubii, nobumayaanu, nobukaatii, nobwilaasi, nelikhalikhali, nobuchiishi, nobwichinjimisii, nobuyingwa; 23amabii ako kosi karulanga mukari nikamwonoonia omundu.
Obusuubili bwomukhasi omuSirofoinike
(Mat. 15.21-28)
24Yarula ebweneyo niyeenyokha natsia mumbali tsieTiro nende Sidoni. Niyeenjila munzu, nareenya omundu yesi amanye ta, ne naranyala okhubisikha tawe. 25Ne habwenaho omukhasi undi owa omwanawe omukhaana omutiiti yali nende roho weshifwabwi nahulila amakhuwa khuye niyeetsa nakwa mumakuluke. 26Omukhasi oyo yali omuYunani, woluyia lwabaSirofoinike; ne namusaba mbu arusie lidimoni eliali mumwanawe. 27Yesu namusunjila ari Lekha abaana beekure mbeli, shichila shineshilayi okhubukula omukaate kwabaana nokhusukunila tsimbwa ta. 28Nakalusia mbu Mbula, Omwami, kata tsimbwa etsili mulwalo weimeesa tsiliitsanga khumbungulusi etsia abaana babungulusia. 29Namusunjila mbu Khulwa likhuwa elo, otsie; lidimoni limalile okhurula mumwanawo. 30Kho natsia ebunangowe, nanyoola omwana niyaalisii bwe khushitali; lidimoni nilimurulilemwo.
Yesu yahonia omundu oweekela amareoi khandi oweshilimi
31Olwa yali nachelelanga okhurula mungongo tsieTiro, yabirila khunjila yeSidoni okhuula khuNyanza yeGalilaya hakari mumbali tsieDekapoli. 32Nibamuleerela omundu oweekala amarwi, oweshilimi, nibamusaaya mbu amurekhwo omukhono. 33Yesu yamurusia mumukanda yenyene, nara tsinzala mumarwike. Mana nafuutsa amare, natiilakhwo khululimilwe, 34nahenga mwikulu, nashenya, namusunjila mbu Efatsa, eshisina mbu Wikushe. 35Amarwike nikeekukha, na habwenaho olulimilwe niluboholokha, naye nasunga bulayi. 36Nabakaania baraboolele omundu yesi ta; naye shinga olwa yameeta okhubakaania, nolwa bameeta okhulitswania. 37Bali nibahukanga okhushila, nibasunga bari Yakholile amakhuwa kosi bulayi. Abeekala amarwi abanyalilanga okhuhulila, nende abasilu okhuboola.
Currently Selected:
Mariko 7: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
