Mariko 6
6
AbeNazareti bafukula Yesu
(Mat. 13.53-58; Lk. 4.16-30)
1Kho narula yaho niyoola mushialo shiewa-bwe, abeechibe nibamulondakhwo; 2ne khunyanga yaSabato yachaaka okhwechesia musinagogi. Abanji khubamuhulila bahuka, nibasunga bari Omundu uno anyoolanga heena amakhuwa kano? Namachesi shiina kano aka uno yaheebwa? Shichila amakhonoke kakholanga amakhuwa akamakana akafwana kario. 3Uno shiali ye omubaatsi oyo, omwana waMariamu, omwana wabwe Yakobo, naYusufu, naYuda, naSimoni? Kata bambootsonyene, shikhuli ninabo hano? Nibamusinyishila. 4Yesu nabasunjila mbu Omunabii shiabulanga oluyali tawe, habula mushialo shiabwe, kata mubaluyiabe, kata munzu yabwe yene. 5Ne shiyanyala okhukholelayo eliamakana liosi ta, habula mbu yabarakhwo amakhono abalwale bandi nabahonia. 6Ne yahuka khulwa oburasuubila bwabwe. Yalambuula amataala niyeechesinjia.
Oburume bwabeechi ekhumi nababili
(Mat. 10.5-15; Lk. 9.1-6)
7Mana nalanga abo Ekhumi-nababili, nachaaka okhubaruma babili babili, nabaheelesia obunyali khubaroho beshifwabwi, 8nabakaania oburabukulakhwo eshindu shiosi shioluchendo ta, habula indabushi yonyene; omukaate ta, kata omufuuko, kata amapeesa mungubo tsiabwe ta, 9ne mbu bachendele ebilaaro, nibareefwala tsingubo etsiomukari tsibili ta. 10Nabasunjila mbu Hosi hosi ewa namwinjile munzu, mumenye mubwenomwo okhuula olwa mularulayo; 11ne litaala liosi eliramwinjisia kata okhumuhulila ta, olwa muruleyo muteng'ulule olufu oluli mumalaaro keenywe, khube oburumbusi khubo. 12Kho barula nibeelwatsa mbu abandu bakhoyile okhwikalukhasia. 13Nibarusia amadimoni amanji nibatsushiilila abalwale abanji amafura nibabahonia.
Okhufwa khwaYohana Omubarisii
(Mat. 14.1-12; Lk. 9.7-9)
14Omuruchi Herode naye yahulilakhwo, shichila eliiralie liali nilifumile mushialo. Abandu nibasunga bari Yohana Omubatisii walamuushe mubafu, niko akachila obunyali buno obukhongo nibuli muye nibukholanga emilimo. 15Abandi nibasunga bari Ni Eliya; nabandi bari Nomunabii owinga mulala khubanabii. 16Ne Herode olwa yahulilakhwo, yaboola mbu Yohana, owa ndarema omurwekwe, alamuushe. 17Okhuba Herode omwene yali niyarumana okhumuhamba Yohana, namuboha mumbohe khulwa amakhuwa kaHerodia, mukha Filipo omusiani wabwe, okhuba yali niyamuteeshia: 18okhuba Yohana yali niyamuboolela Herode ari Nomusilo iwe okhuteeshia omukhasi womwana weenywe. 19Khulwako Herodia yamuhamba isila, niyeenya okhumwira; ne shiyanyala ta, 20shichila Herode yali namuriitsanga Yohana, okhuba yamanya shinga olwa ali omundu omulunjishi, omutakatifu, kho namuteetsa. Ne olwa yamuhulila yanyakhana muno mumwoyo; ne yahulila aka yaboola nobusangaafu. 21Inyanga eyikhoyeele niyinyoolekha, olwa Herode yateekha lisabo khunyanga yokhwitsulila okhwibulwakhwe, nalanga abandube abakhulundu, nabaseesia abomwihe nende abakhongo baGalilaya. 22Nolwa omukhaana waHerodia yeenjila nashina, yasangaasia Herode nende aba yali naliitsanga ninabo. Omuruchi namusunjila omukhaana ari Usabe eshia wenya, nasi ndalakhuha. 23Niyeetsuba butinyu, ari Shiosi shiosi eshia nausabe, ndalakhuha, kata okhuula khunusu yoburuchi bwanje. 24Naye narula namureeba nyina ari Eshia ekhoyile okhusaba nishiina? Naye ari Omurwe kwaYohana Omubatisii. 25Habwenaho namutsiila omuruchi matetekhana, namusaba, ari Enzenya mbu umbeelesie bulaano buno khushiibo omurwe kwaYohana Omubatisii. 26Omuruchi yahenda muno khulwa ebiitsubobie khandi khulwabo abali khubiliibwa, nebutswa shiyanyala okhumwima tawe. 27Kho omuruchi yaruma omusikari namulachilisia okhuleera omurwekwe. Naye natsia namurema omurwe m, umbohe, 28naleera omurwekwe khushiibo, nakumuheelesia omukhaana tsana. Omukhaana naye namuheelesia nyina. 29Nolwa abeechibe bahulilakhwo, beetsa nibabukula omulambo nibakuyabila mung'ani.
Yesu yaliisia abandu ebikhumila biraano
(Mat. 14.13-21; Lk. 9.10-17; Yoh. 6.1-14)
30Abarume nabo nibakhung'aana ewa Yesu yali, nibamuboolela kosi aka bali nibakholile nende aka beechesia. 31Nabasunjila ari Mwitse inywe mwenyene aha abandu babula, muhuluushekhwo. Shichila abandu abanji bali nibabiring'anangaho, nibabula obwiyangu kata obwokhulia. 32Kho barulaho neliaro nibatsia bonyene aha abandu babula. 33Abanji babalola nibatsiitsanga, nibabamanya, nibarula mubuli litaala nibatsiayo tsimbilo namakulu, nibabaranjilila okhuulayo. 34Naye narula muliaro, nalola omukanda omukhongo, nabatiililwa eshisa, shichila bali shinga amakondi akabula omwayi; nachaaka okhubeechesia amakhuwa amanji. 35Isi olwa yali niyibirile abeechibe nibeetsa ewa yali, nibasunga bari Hano neshitsiimi butswa, eshialo bulaano shibirile. 36Obaseebule batsie mubisoma nende mumataala ebirondokhana beekulile ebiokhulia. 37Naye nabakalusia mbu Inywe mubaheelesie eshiokhulia. Nibamusunjila bari Khukhatsie khukhakule emikaate chietsitinari ebikhumi bibili, khuheelesie abandu balie? 38Nabareeba mbu Muli nemikaate chinga? Tsie mukoonye. Nolwa bali nibanyoolile, bamuboolela bari Nechiraano, nende tsinyeeni tsibili. 39Nabalaka mbu babeekhasie ebituma ebituma khubunyasi obubisi. 40Nibeekhala mutsinyaali, haundi eshikhumi, haundi amakhumi karaano. 41Naye nabukula emikaate echio chiraano netsinyeeni tsibili, nahenga mwikulu nabisabila ikhabi, nasonyola emikaate nachikabila abeechibe mbu babarenjeshele. Netsinyeeni etsio tsibili natsio yabakabila bosi. 42Bosi nibalia nibeekura. 43Nibakhung'aasia ebisonye ebimwelo ekhumi nabibili, khandi ebietsinyeeni. 44Abalia khumikaate echio bali abasaatsa ebikhumila biraano.
Yesu yachenda khumatsi
(Mat. 14.22-27; Yoh. 6.16-21)
45Mana yanichilisia abeechibe okhwinjila muliaro bamuranjilile okhutsia eBetsesaida injelekha, olwa yakhaba nashiseebula omukanda. 46Yabaseebula, mana natsia mushikulu okhusaaya. 47Olwa eshialo shiali nibwilile, eliaro liali nilili hakari munyanza, naye yali nali yenyene khushialo eshiumu. 48Yabalola nibali mumatinyu nibafukanga eliaro, shichila omuyeka kwali nikuhuutsanga okhurula imbeli wabwe, naye natsia ewa bali mumakhubakhubwe, nachendanga khumatsi, niyeenya okhubabirakhwo. 49Nabo olwa bamulola nachendanga khumatsi, nibakaala mbu neshinabandu, nibalakaya, 50shichila bosi bamulola, ikholo niyibarimukha. Habwenaho naboolana ninabo, nasunga ari Muleme emioyo! ISIE NISIE. Muraria tawe. 51Naniina muliaro omwa bali, omuyeka nakwo nikuyeela. Nabo nibang'ang'aala butswa, 52shichila shibali nibatiilile khushisina shiemikaate ta, nebutswa bali abasiro okhuhulila.
YesuYahonia abalwale eGenesareti
(Mat. 14.34-36)
53Kho olwa bali nibaambuushe, boola khulukuku, eGenesareti, mana nibaboha eliaro. 54Nibakharula muliaro, abandu nibamulola nibamumanya. 55Nibeelukhana mumbali etsio tsiosi, ne buli hosi ewa bahulilanga mbu aliho, bachinga abalwale khumacheela nibabayilayo. 56Khandi buli hosi ewa yeenjilanga mumataala namatookho kata mubisoma, bali nibarenjekhanga abalwale haluyia, nibamusaayanga mbu batiilekhwo kata khundulo weinguboye. Nabo bosi abatiilakhwo bahonanga.
Currently Selected:
Mariko 6: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
