Mariko 5
5
OmuGerasi owali naroho weshifwabwi yahonibwa
(Mat. 8.28-34; Lk. 8.26-39)
1Niboola injelekha weinyanza, mushibala shiabaGerasi. 2Nolwa yali niyakharula muliaro, habwenaho yabukaana nende omundu owa roho weshifwabwi yali muye, narulanga mubilindwa. 3Yali namenyanga mubilindwa. Ne yali nabulaho owanyala okhumuboha khandi, kata nende eminyololo ta, 4shichila yalinji nabohungwa khandi akhanji nebitiili nende eminyololo, ne yali niyakhalakanga eminyololo nokhutsaanuula ebitiili, ne yabulaho owamaani owanyala okhumuhula. 5Tsindaalo tsiosi, eshiteere neshilo, yali nahonganga mubilindwa khandi mubikulu, niyaayula niyeekhalaka omubilikwe namachina. 6Olwa yalola Yesu nashili ehale, yeelukha namusikamila, 7nayiiba nende omwoyo omukhongo, nasunga ari Obeele orie ninasi Yesu, iwe Omwana waNyasaye Ouli Ikulu Muno? Muliira liaNyasaye ekhusaaya mbu ora'saaliisia ta. 8Okhuba yali namusunjiile mbu Iwe roho weshifwabwi, rula mumundu oyo. 9Mana namureeba ari Eliiralio niwe wina? Naye namukalusia mbu Eliira lianje nisie Legioni, shichila khuli abanji. 10Namusaaya muno oburabeelusia batsie mushindi shialo ta. 11Ne khulukongo olwo lialiho lituuli likali lietsimbiitsi nitsiayanga; 12kho abaroho abo nibamusaaya bari Okhurume mumbiitsi, khwinjile mutsio. 13Habwenaho Yesu yabafuchiilila ario. Abaroho beshifwabwi nabo nibarula nibeenjila mumbiitsi, lituuli liosi lietsimbiitsi shinga ebikhumila bibili niliminina nilikholomokha niliikhupa munyanza, nitsifwilamwo. 14Abaayi batsio nibeelukha nibatswania amakhuwa ako mwitaala liosi khandi mulukongo olwo lwosi. Abandu nibeetsa okhulola akali nikeekholile shinga olwa kali. 15Kho boola ewa Yesu yali, nibalola oyo owa amadimoni kabeelenjemwo, owa Legioni yalimwo, niyeekhaale, niyeefwalile tsingubo nali habwene; nibaria. 16Abaloli nibababoolela akali nikeekholile khuwamadimoni shinga olwa kali, nende aketsimbiitsi. 17Nibamusaaya mbu arule mushialo shiabwe. 18Olwa yali niyeenjila muliaro omundu oyo owa amadimoni kalimwo yamusaaya mbu abeetsenje ninaye. 19Naye shiyamufuchiilila ta, ne namusunjila ari Winyoshe otsie ebunanzuwo, khubandu beweenywe, obaboolele amakhuwa aka Omwami yakhukholeele shinga olwa kali amakhongo, khandi shinga olwa akhubeeleele tsimbabasi. 20Naye niyeenyokha natsia nachaaka okhwilwatsa muDekapoli amakhuwa aka Yesu yali namukholeele shinga olwa kali amakhongo, abandu bosi nibachenya.
Akomwana waYairo, nakomukhasi owatiilakhwo khungubo ya Yesu
(Mat. 9.18-26; Lk. 8.40-56)
21Olwa Yesu yali niyaambushiile khandi muliaro injelekha weinyanza, omukanda omukhongo nikukhung'aana ewa yali; ne yali nali hanyanza. 22Mana mulala khubakhulundu beisinagogi yamwitsila, owa eliiralie mbu Yairo. Olwa yamulola, niyeekhupa hasi mumakuluke, 23namusaaya muno ari Omwana wanje omukhaana omutiiti ali okhufwa; ekhusaaya mbu witse omurekhwo amakhono ahone abe mwoyo. 24Naye nalondokhana ninaye, omukanda omukhongo nikulondana ninabo, nikumutiya.
25Ne yaliho omukhasi undi owali niyeerulutsanga emiyika ekhumi nachibili; 26yali niyanyasibwa muno nabasilishi abanji, namala amapeesa kosi aka yali ninako, oburahonakhwo ta; nebutswa obulwale bwali nibwimeetanga. 27Olwa yahulila aka Yesu, yeetsela mumukanda emukongo, natiilakhwo khunguboye. 28Shichila yali nasunganga mbu Kata nindiilakhwo butswa khungubotsie, nehonibwe. 29Habwene nahabwene eshinoko shiokhwirulutsakhwe khwakhalikha, nahulila mumubilikhwe mbu umalile okhuhona mukhunyasibwakhwe. 30Habwenaho Yesu yeemanya mbu obunyali burulile muye, nashiukhana mumukanda, nareeba mbu Outiilile khungubo tsianje niwina? 31Abeechibe nibamukalusia bari Oluutsi omukanda kukhutiyanga, ne oreeba mbu Oundiililekhwo niwina? 32Naye nahenga eyi nende eyi okhulola mbu niwina oukholile likhuwa elo. 33Ne omukhasi oyo yaria natechela, okhuba yamanya akali nikamwikholeele, niyeetsa nakwa mumakuluke, namuboolela obwatoto bwosi. 34Naye namusunjila mbu Omukhaana wanje, obusuubilibwo bukhuhoniye. Otsie nomulembe, ohone mubunyasibwibwo.
35Olwa yali nashisunganga abandu bewomukhulundu oyo weisinagogi nibeetsa, nibasunga mbu Omwanawo utnalile okhufwa. Oshinyasinjia Omwechesia mbushiina? 36Ne Yesu yakhaya okhuhulila aka baboola, namusunjila omukhulundu weisinagogi oyo ari Oraria ta. Suubila busuubila. 37Ne shiyamoka omundu yesi okhulondana ninaye ta, habula Petero naYakobo naYohana omusiani wabwe Yakobo. 38Boola enanzu womukhulundu weisinagogi oyo, Yesu nalola obukoyaani, nende abo abeekhuula nibakhupa tsimbungu muno. 39Yeenjilamwo nabasunjila ari Mbushiina nimukoyaananga nimwikhuula? Omwana uno shiafwile ta; akonanga butswa tsindoolo. 40Nabo nibamutseshelela butswa. Naye nabarusia bosi, nabukula samwana nende nyina, nende aba yali ninabo, niyeenjila omwa omwana yali nakonile. 41Yatiila omwana omukhono, namusunjila ari Talitsa kumu, eshisina mbu, Akhaana khanje, ekhubiila mbu buukha. 42Nonoho omukhaana oyo nabuukha, nachenda, okhuba yali owemiyika ekhumi nachibili. Habwenaho bang'ang'aala nibahuka muno. 43Nabalaka butinyu mbu omundu yesi aleshe okhumanya likhuwa elo; nababiila mbu bamuheelesia eshiokhulia.
Currently Selected:
Mariko 5: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
