Abaroma 1
1
1Eyirula khuPaulo, omusumba waYesu Kristo, owalar gwa okhuba omurume, niyaahulwa khulwa injiili yaNyasaye, 2eyeneyo eya yasuubisia khale muminwa chiabanabiibe mumahandiiko amatakatifu, 3khumakhuwa kOmwanawe, oweebulwa mulwibulo lwaDaudi, halubeka Iweimela yomubili; 4ne halubeka lweimela yaroho yobutakatifu, yarumbulwa ebulafu nobunyali shinga olwa ali Omwana waNyasaye, khulwa okhulamusibwa khwabafu; niye Yesu Kristo Omwami weefwe. 5Ne niye owachila nikhunyoola obukoosia nende oburume, mbu obuhulili bwobusuubili bube mumahanga kosi, khulwa eliiralie; 6ne mubeenabo inywe mulimwo, abalangwa okhuba baYesu Kristo.
Akamashiesii
7Yule khubosi abali ebuRoma, abaheelwa baNyasaye, abalangwa okhuba abatakatifu:
Obukoosia bube khwinywe, nende omulembe, ebimla khuNyasaye Seefwe nende Omwami Yesu Kristo.
Paulo yeekomba okhuula eRoma
8Eliambeli, emuupila Nyasaye wanje orio muno muYesu Kristo khulweenywe mwesi, okhuba obusuubili bweenywe burumbukhanga ebulafu mubialo biosi. 9Shichila Nyasaye, omwenoyo owa ekhalabanilanga muroho yanje munjiili yOmwanawe, niye omuloli wanje, shinga olwa ndarakonelanga tawe okhumurumbula inywe tsindaalo tsiosi mukhusaaya khwanje; 10nisaaya mbu nikaba nikanyalikha bulaano enyalilwe okhuula ewa muli, khulwa tsiyemi tsiaNyasaye. 11Okhuba amahoofu kandiitsanga okhulolana nineenywe, mbu emukabile omukabo kundi okweshiroho, mbu muralisibwe, 12eshisina mbu khutinyilisanie, buli mundu nobusuubili bwowashie, obweenywe nende obwanje burio.
13Khandi, baana beefwe, enzenya mbu mumanye shinga olwa ndarakhwo omwoyo akhandi akhanji okhumwitsila, mbu enyoole ebiamo mwinywe shinga olwa enyoolanga muBamahanga bandi; ne okhuula bulaano eyinjilungwa. 14Endi omwikobi, khubaYunani nende khubarali abaYunani ta; khubachesi nende khubarali abachesi ta. 15Kho khulubeka lwanje, ndirecheeshe okhumwilwatsila injiili inywe abali eRoma mwesi.
Obunyali bweInjiili
16Shichila shifwimbilwa injiili omutwe ta; okhuba niyo obunyali bwaNyasaye obuleera obuhonia khubuli mundu ousuubila; olwambeli khumuYahudi, khandi nende khumuYunani. 17Shichila obulunjishi bwaNyasaye bufwimbulilwa muyo, niburula mubusuubili nibutsiililila mubusuubili; shinga olwa kahandiikwa, mbu Omulunjishi alabeetsanga mwoyo khulwa obusuubili.
Obumayaanu bwabandu
18Okhuba okhurula mwikulu oburima bwaNyasaye bufwimbulwa nibufukula amakhuwa kosi akoburaria Nyasaye ta, nende obumayaanu bwabandu, abeekalilanga obwatoto mubumayaanu bwabwe. 19Shichila akamanyikhanga khumakhuwa kaNyasaye keebakala mubo, okhuba Nyasaye yakabakala khubo. 20Okhuba okhurula khubulongwi bweshialo, akeke akaralolekha ta, niko obunyalibwe bwobumeli nende obunyasayebwe, kalolekhanga nikamanyishila mubienebio ebia yalonga; kho babula eshibeehelel shiosi. 21Shichila kata olwa bamanya Nyasaye shibamuheelesia oluyali shinga olwa ali ye Nyasaye, kata okhumukhupila orio tawe; ne bachaaka okhuyililisinjia khumakhuwa kabutswa, emioyo chiabwe emisilu nichikwa eshiilima. 22Beeboola shinga olwa bali abachesi, khane nibasiluhala, 23nibakalukhasia oluyali lwaNyasaye ourahweetsangaho ta okhumufwanania khubukondo bwomundu ouhweetsangaho, nobwamanyonyi, nende tsisolo tsiamakulu kane, nende ebindu ebimoolanga.
24Khulwako Nyasaye yabalekhuula mubwikombi obubii bwemioyo chiabwe mbu balondachilile akeshifwabwi, oluyali Iwemibili chiabwe niIwifwola mubo abeene; 25shichila bakalukhasia obwatoto bwaNyasaye bube obubeeyi, nibeenamila nokhukhalabanila eshilonje mushilenje shiOmulonji, owitsoomibwa obushia nobushia. Amina.
26Niko akachila Nyasaye yabalekha mubwilaasi bwabwe obwetsisoni; okhuba abakhasi babwe bakalula eshiima shioburulanda shibe eshindi eshirali shioburulanda ta; 27nabasaatsa bosi bario, balekha eshiima shioburulanda shiabakhasi, nibaashila mubwilaasi bwabwe, abasaatsa nibakholana nende abasaatsa abashiabwe akarakhoyeele ta, nibeenyoolela abeene omurungo okuhela obukori bwabwe.
28Ne shinga olwa barafuchiilila okhumumanya Nyasaye ta, kho Nyasaye yabalekhuula mubuyililisi bweshifwabwi, mbu bakholenje akeenako akarakhoyela ta. 29Bali abeetsulamwo obushiamu bwosi, nobumayaanu, nelikhalikhali, nobukhobi; nibeetsulamwo imbalikha, obwiri, obusoolo, obubatsa, obuchesichesi; nabamoonyi, 30abachiishi, abakiyanga Nyasaye, abamahababa, abeechinjimisii, abeisunga, abakulukunzi bamabii, abarahulilanga abeebuli babwe ta, 31ababula obuchesi, abasasii betsindakano, ababula obuheeli bwoburulanda kata tsimbabasi ta. 32Kata olwa bamanya obukhalachi bwaNyasaye mbu abakholanga amakhuwa akafwana kario bakwanile okhufwa, bakakholanga bukhola; ne shikali ako konyene ta, habula bafuchilisaninjia nende abakakholanga.
Currently Selected:
Abaroma 1: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
