Abaroma 2
2
Obukhalachi bwaNyasaye buli habwene
1Niko akachila iwe, omundu wesi oukhalakanga eshiina, obula eshibeehele shiosi; shichila habwenaho olwa okhalachilanga owashio, wikhalachilanga omwene; shichila iwe oukhalakanga, wesi okholanga amakhuwa malala akeenako. 2Ne khumanyile mbu obukhalachi bwaNyasaye buli habwene khubeenabo abakholanga amakhuwa ako. 3Nawe, omundu iwe oubakhalachilanga eshiina abakholanga bario, omwene nokholanga amalala akeenako, okaalanga mbu oleehonokokha obureenjila mushiina shiaNyasaye noho? 4Nohomba olechile obuyinda bweshisashie nende tsimbabasitsie nende obwisimilisiibwe, nokorwa shinga olwa eshisa shiaNyasaye shikhukhweselanga obwikalukhasii? 5Ne khulwa obutinyu bwomwoyokwo okureekalukhasia ta, wibiishilanga omwene oburima okhuula khunduukho eyo yoburima nobufwimbulwi bweshiina eshilunji shiaNyasaye? 6Ye alakabila buli mundu habwene, ebikholebie shinga olwa bili; 7mbu abeenabo abeesimilisia mukhukhola amalayi, nibakhaaba bario oluyali neifuma noburafwa ta, alabakabila obulamu bwobumeli; 8ne abeenabo abamayinje abakhaya okhuhulila amalako kobwatoto, habula nibahulilanga amalako kobumayaanu, alabakabila oburima nobusinyishi. 9Amatinyu nende amasila kalaba khumwoyo kwabuli mundu oukholanga obumayaanu, olwambeli khumuYahudi, khandi nende khumuYunani; 10ne oluyali neifuma nomulembe bilaba khubuli mundu oukholanga obulayi, olwambeli khumuYahudi, khandi nende khumuYunani; 11okhuba Nyasaye abula ebiela.
12Okhuba abo bosi aboonoona sila amalako, balatiba bario sila amalako; ne abo bosi aboonoona nibali nende amalako, balayaasilibwa khumalako. 13Shibali abahulili bamalako ababa abalunjishi imbeli waNyasaye ta; habula abakholi bamalako balabasilibwakhwo obulunjishi. 14Okhuba Abamahanga ababula amalako olwa baba nibakhola akamalako nibeebaalilwa noburuIanda bwabwe, bo, ababula amalako, bali amalako khubwabwe; 15shichila balolosia emilimo chiamalako akahandiikwa mumioyo chiabwe, emioyo chiabwe nachio nichifuchilisania ninako khukobuloli, amayililisio kabwe akeene khukeene nikabasitaaka kata khandi okhubaterela. 16Kaliba kario khunyanga eyo olwa Nyasaye aliyaasia tsiyemi tsiabandu tsiamabiswi, injiili yanje shinga olwa yiboola, muYesu Kristo.
AhabaYahudi nende Amalako
17Ne iwe, owilanganga mbu omuYahudi, wisetaminjia khumalako, niwiyitsialila, muNyasaye, 18shinga olwa wamanya aka yeenya, nofuchiilila ako akashila obulayi, shichila weechesilibwa khukamalako. 19Omanyilanga elala omwene, mbu toto mwene oli omwimilisi wababofu, nobulafu bwabeenabo abali mushiilima, 20nomwibaali wabayingwa, nomwechesia wabatoro; mumalako tsana oli nende likondo liene liobumanyi nende obwatoto. 21Kho iwe, owechesinjia oundi, shiwiyeechesinjia omwene ta? Iwe owilwatsanga mbu omundu areeba ta, omwene wakhaba wibanga? 22Iwe ouboolanga mbu omundu araheya ta, omwene oheyanga noho? Iwe ousilanga ebifwanani ebiinamilungwa, omwene wibanga ebiomutsihekalu? 23Iwe owichinjimisilia akamalako, khulwa okhwonooninjia amalako wakhaba nomufwolanga Nyasaye? 24Okhuba shinga olwa kahandiikwa, eliira liaNyasaye linyekungwa muBamahanga khulweenywe.
25Shichila eshishebo shikaasanga noba noli omukholi wamalako; ne noba noli omukhayi wamalako, okhushebwakhwo khukwile oburashebwa ta. 26Kho omusinde naba nahulilanga akeenywa mumalako, obusindebwe shibulabasibwa mbu neshishebo? 27Ne ouli omusinde owoburulanda, naba niyoosinjia habwene akamalako, shialakhukhalachila eshiina, iwe oukhayanga amalako, kata olwa oli ninabio amahandiiko nende eshishebo? 28Okhuba ye shiali omuYahudi ouli ario mumakhuwa kelwanyi ta; kata eshio shishili eshishebo eshili elwanyi, khumubili, tawe. 29Ne ye nomuYahudi ouli ario mukari; khandi eshishebo neshieneshio eshiomwoyo, shiaroho, ne eshielihandiiko tawe; owa obupaakwibwe burarula khubandu ta, habula khuNyasaye.
Currently Selected:
Abaroma 2: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
