Abaroma 10
10
1Baana beefwe, okhwikomba khwomwoyo kwanje nende lisaayo lianje ewaNyasaye bili khulwabo, mbu bahonibwe. 2Okhuba erumbula akobuloli shinga olwa bali abalumilifu khulwa Nyasaye; habula obulumilifu bwabwe bubula obumanyi. 3Shichila olwa bakorwa obulunjishi bwaNyasaye, nibateema okhusinjisia obwabwe abeene, habwenaho shibafuchiilila okhurukwa nobulunjishi bwaNyasaye ta. 4Okhuba Kristo niye okhuhelelesia khamalako, mbu buli mundu ousuubila abe nobulunjishi.
5Shichila Musa yahandiika mbu omundu oukhola obulunjishi obuli bwamalako, alaba mwoyo khulwako. 6Ne obulunjishi oburula mubusuubili buboola buri Orareeba mumwoyokwo mbu Niwina owakhakulushe mwikulu (eshisina mbu okhwisia Kristo ewa khuli), 7kata mbu Niwina owakheeshe mubuko, (eshisina mbu okhubuusia Kristo okhurula mukhufwa), tawe. 8Ne buboola burie? Mbu likhuwa lili ahambi ninawe, mumunwakwo khandi mumwoyokwo; nilio likhuwa liobusuubili elia khwilwatsanga. 9Okhuba noba norumbula ebulafu nende omunwakwo shinga Yesu olwa ali ye Omwami, nende okhusuubila mumwoyokwo shinga Nyasaye olwa yamulamusia mukhufwa, olahonibwa. 10Shichila omundu asuubila mumwoyokwe, nabasilibwa obulunjishi; khandi arumbula ebulafu nende omunwakwe, nahonibwa. 11Shichila lihandiiko liboola mbu Omundu yesi oumusuubilila shiakhafwimbwe omurwe ta. 12Okhuba shibuliho obwahuli bwosi hakari womuYahudi nomuYunani ta; shichila mulala watsana niye Omwami wabosi, khandi abayindihalila bosi abamuhaabila; 13okhuba mbu Omundu yesi oulihaabila eliira liOmwami alihonibwa.
14Ne balamuhaabila barie owa barasuubiliile ta? Kata balamusuubilila barie owa barahuiiilekhwo ta? Kata balahulila barie aharali omwilwatsi ta? 15Khandi baleelwatsa barie, nibararumilwe ta? Shinga olwa kahandiikwa, mbu Nebilayi muno ebilenje biabo abaleera injiili yamakhuwa amalayi. 16Ne shibali bosi abahulila injiili tsana ta. Okhuba Isaya yasunga mbu Omwami, niwina ousuubiile amakhuwa keefwe? 17Kho obusuubili burula mukhuhulila, okhuhulila nakhwo khwitsa khulwa likhuwa liaKristo.
18Nasi ereeba mbu Shibahulila? Ee, toto,
Omwoyo kwabwe kwoola mushialo shiosi,
namakhuwa kabwe okhuula khushihesi shieshibala.
19Khandi ereeba, mbu Khane Isiraeli shiyamanya ta? Olwambeli Musa yaboola ari
Ndilimuhambia imbalikha khu abo abarali lihanga ta,
ndilimutiisia oburima khwihanga lisilu.
20Naye Isaya yasunga chiminiyai, mbu
Ndabanyooleshela abarayakhaaba tawe;
ndabeebisushila abarayareebakhwo likhuwa ta.
21Ne khuIsiraeli yasunga mbu
Eshiteere tulu ndabakalishila amakhono abandu abakhayi abamayinje.
Currently Selected:
Abaroma 10: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
