Zakaria 1
1
Omulango okhukalushila OMWAMI
1Mumwesi kwomunaane okwomumuyika kwakhabili kwaDario, likhuwa liOMWAMI liamwitsila Zakaria waBerekhia waIdo, omunabii, liri 2OMWAMI yasinyishila abakuuka beenywe muno. 3Khulwako obasunjile mbu Kano niko aka OMWAMI omwene mahe aboola; mbu Mungalushile, OMWAMI omwene mahe aboola; nasi ndalamukalushila inywe; nilwo olwa OMWAMI omwene mahe aboola. 4Muraba shinga abakuuka beenywe olwa bali, aba abanabii abambeli balanjisia bari Kano niko aka OMWAMI omwene mahe aboola; mbu Kalushe bulaano, murule khunjila tsieenywe tsimbii, nokhubikhole bieenywe ebibii; nebutswa shibahulila kata okhurecheshela amarwi ta; nolwa OMWAMI aboola. 5Abakuuka beenywe, kho bali heena? Kata abanabii, bashimenya inziayo noho? 6Nebutswa amakhuwa kanie namalako kanje, aka ndalachilisia abasumba banje abanabii, shikamala kanyoole abakuuka beenywe? Nabo nibeekalukhasia, nibaboola mbu Shinga OMWAMI omwene mahe olwa yapaara okhukhukholela, khulwa tsinjila tsieefwe nebikhole bieefwe, nindio amalile nakhukholela ario.
Libisulo lietsifarasi
7Khunyanga yamakhumi kabili nakhane eyomumwesi kwekhlumi nalulala, nikwo omwesi kwaShebati, mumuyika kwakhabili kwaDario, likhuwa liOMWAMI liamwitsila Zakaria waBerekhia waIdo, omunabii, liri 8Ndalola mushilo; mbu omundu ngwoyo, naniinile khufarasi eyalando, niyeemile hamihatasi echiali mwibanda; ne emukongowe tsialiho tsifarasi tsialando, netsiaratieri, netsindafu. 9Kho nireeba mbu Omwami wanje, kano kakhali amakhuwa shi? Malaika oyo owali nasungana ninasi niyamboolela mbu Nekhumanyie shinga olwa kali. 10Mana omundu tsana owali niyeemile hamihatasi nakalusia, ari Bano nibo aba OMWAMI yarumile okhulambuula eshialo. 11Nabo nibakalusia nibasunjila malaika wOMWAMI owali niyeemile hamihatasi, bari Khulambuulile eshialo, ne lola, eshialo shiosi shiholeelile nishilenjeela. 12Mana malaika wOMWAMI nakalusia, ari E OMWAMI omwene mahe, tsilaba tsindaalo tsinga norabeelanga Yerusalemu tsimbabasi ta, kata nende amataala kaYuda, aka bulaano wasinyishilanga emiyika amakhumi musaafu? 13OMWAMI namukalusia malaika owasungana ninasi amakhuwa amalayi, akobulemia. 14Mana malaika tsana owasungana ninasi niyamboolela mbu Lanjisia ori Kano niko aka OMWAMI omwene mahe aboola; ari Endiiliilwa Yerusalemu nende Sayuni imbalikha ikhongo. 15Khandi engasinyishiile muno amahanga ako akeelembisia; okhuba olwa ndali nisinyishile hatuutu, katsitsachisia butswa amatinyu. 16Khulwako, kano niko aka OMWAMI aboola; mbu Engalushiile Yerusalemu netsimbabasi; inzu yanje yiloombakhwa mulio, khandi omukoye okwokhuchela kulakhweselwa ikulu waYerusalemu; nolwa OMWAMI omwene mahe aboola. 17Olanjisie khandi, ori Kano niko aka OMWAMI omwene mahe aboola; mbu Shikoono khandi amataala kanje kaleetsulamwo obukaasu, nabwo nibuyemba buyemba; naye OMWAMI alalemia Sayum omwoyo khandi, nalobola Yerusalemu khandi.
Libisulo lietsinzika nende abeeraanyi
18Mana ninjinguula tsimoni, nindola. Mbu tsinzika tsine nzietsio; 19nimureeba malaika tsana owali nasungana ninasi, mbu Bino nebindu shi? Niyangalusia mbu Tsino nitsio tsinzika etsiasalaasia Yuda, naIsiraeli, naYerusalemu. 20Mana OMWAMI niyamanyia abeeraanyi bane. 21Nasi nireeba mbu Bano beetsile okhukhola shi? Naye nasunga mbu Tsinzika etsio nitsio etsiasalaasia Yuda, okhuula olwa omundu yesi arachinguula omurwe ta; ne bano beetsile okhutsitechesia, okhutsikwisia tsinzika tsiamahanga akachinga tsinzika tsiako khushialo shiaYuda okhushisalaasia.
Currently Selected:
Zakaria 1: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
