Zakaria 10
10
Omwami anunula abandube
1Saayenje OMWAMI ifula munduukho yeshirumbi,
mbu OMWAMI ouleera tsinjeka,
nakwisilia abandu ifula,
namesia emimela mumukunda kwabuli mundu.
2Okhuba emiterafi chiboola akabutswa,
nabo abalakusi balolanga akobubeeyi;
abaloori baboolanga amalooro akobukaatii,
nibaboola amakhuwa kobulemia amakhaya.
Niko akachila abandu nibatiimatiima shinga amakondi,
nibasanda shichila omwayi yesi abulaho.
3Oburima bwanje bwashilanga abaayi,
ne ndalakuuma abeemilisi;
okhuba OMWAMI omwene mahe alalinda eshiayoshie, mbu inzu yaYuda,
ne alabakhola babe shinga ifarasiye indayi mwihe.
4Okhurula mubo mularulamwo lichina lieikoona,
okhurula mubo eshibambo shieliheema;
okhurula mubo obuyingo bwelihe;
okhurula mubo buli muruchi yesi.
5Bosi halala balaba shinga abalulu mwihe,
abaseenela abasuku hasi mumatoyi khunjila;
balaseera lihe, shichila OMWAMI ali ninabo abachendela khufarasi balakoyaasibwa.
6Ndalakufuhasia inzu yaYuda,
nihonia inzu yaYusufu.
Ndalabakalusia, shichila embatiililwa eshisa.
Balaba shinga olwa bakhabeele nindabeebalile ta;
okhuba nisie OMWAMI Nyasaye wabwe; ndalabahulilanga.
7AbaEfuraimu balaba shinga omundu omululu;
emioyo chiabwe chileekhoya shinga echiaba nyweele idivai;
abaana babwe balalola, nibeekhoya;
emioyo chiabwe chilasangaalila muMWAMI.
8Ndalabakhupila eshifwototo, nimbakhung'aasia,
okhuba ndabanunula;
baleenjiha babe abanji shinga olwa balinji.
9Kata nimbasalaasiye mumbia tsiabandu,
balanzitsulilanga mubialo biehale;
balamenyayo nabaana babwe, nabo nibakalukha.
10Ndalabachelesia okhurula mushialo shiaMisiri,
nimbakhung'aasia okhurula muAshuru;
ndalaboosia mushialo shiaGileadi naLebanoni,
okhuula olwa balatamba obwiyangu.
11Balabira munyanza yaMisiri,
nako amarunda keinyanza kalakhupwa,
tsisiba tsiosi tsiaOmwalo kwaNaili nitsiuma kar'r'ra.
Obwichinjimisii bwaAshuru buleesibwa,
ne indabushi yobwami yaMisiri yilahwaho.
12Ndalabakufuhasilia muMWAMI,
nabo balachenda nolukungu muliiralie; nilwo olwa OMWAMI aboola.
Currently Selected:
Zakaria 10: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975