Zakaria 14
14
Yerusalemu nende amahanga
1Lole, induukho yindi yOMWAMI yiitsanga, olwa ebia wayaaywa bilakabulilwa hakariwo. 2Okhuba ndalakhung'aasia amahanga kosi okhuseera Yerusalemu lihe; litookho lilabukulwa, netsinzu okhuyaaywa, nabakhasi okhwonoonibwa; inusu yabomwitookho balaatisibwamwo nabo abandu abalaba nibatong'a shibalaakamiiibwa elala mwitookho ta. 3Mana OMWAMI alarula naseera amahanga ako, shinga olwa aseeranga khunyanga yelihe. 4Khunduukho eyo ebilenjebie bilasinjila khushikulu shiEmitseituni, eshili hambeli weYerusalemu, ebukwe; nashio eshikulu shiEmitseituni shilaatishila hakari, okhurula ebukwe okhuula mumbo, nilibaho libanda libambalifu; mana eshitonye shieshikulu shileesunda enanotsi, neshindi enasautsi. 5Nalio libanda lietsingulu tsianje lileekalwa; okhuba libanda lietsingulu lilashitiilakhwo elubeka; neenyu muleelukha shinga olwa mweelukha okhurenga khweshialo mundaalo tsiaUzia omuruchi waYuda; mana OMWAMI Nyasaye weenywe aleetsa, nabatakatifu bosi halala ninaye.
6Khunduukho eyo shibulabaho obushindu kata isakitu ta; 7ne khunduukho eyo eshiteere shilaba shilala, eshitsiililila; OMWAMI washimanya; eshiteere nende eshilo ta; okhuba khubwile obulafu bulabaho.
8Khandi khunduukho eyo amatsi amalamu kalarula muYerusalemu; inusu yako kalachooma enanyanza yebukwe, neinusu yako enanyanza yamumbo; kalaba kario murootso khandi mushiubwe. 9Naye OMWAMI alaba omuruchi ouruka eshialo shiosi pe; khunduukho eyo OMWAMI alaba mulala, neliiralie elala. 10Eshialo shiosi shilakwa omuhololookhwe, okhurula eGeba okhuula eRimoni, elubeka Iwesautsi weYerusalemu. Ne Yerusalemu lilatong'a nilichinguushile, habundu walio, okhurula khushilibwa shiaBenyamini okhuula habundu heshilibwa shiambeli, nokhuula khushilibwa shieikoona, khandi okhurula khumunaara kwaHananeli okhuula khubitiinyilo bieidivai biomuruchi. 11Abandu balamenyamwo, ne akeshilaamo shiobubii shikalabakhwoho khandi ta; ne Yerusalemu lilamenya shisale.
12Ne oluumbe olwa OMWAMI alakhupa ninaIwo tsimbia tsiosi tsiabandu abaseeranga Yerusalemu ndwoluno; mbu inyama yemibili chiabwe yilabola bubola nibashisinjiile, netsimoni tsiabwe okhubolela mubiikochi mukari, netsinimi okhubolela mumunwa. 13Ne khunduukho eyo obukoyaasii obukhongo oburula khuMWAMI bulabaho hakari wabwe; buli mundu alatiila owashie omukhono, khandi buli mundu alachinguula omukhono okhuupa owashie; 14ne kata Yuda alaseera Yerusalemu. Obuyinda bwamahanga kosi akabotokhanaho bulakhung'aasibwa halala, mbu itsahaabu, neifeetsa, nebiifwalo, ebinji muno. 15Khandi oluumbe olufwana lurio lulaba khutsifarasi, nokhutsinyumbu, nokhutsingamia, nokhutsisishili, nokhumiruko chiosi echilaba nichili mukambi etsio.
16Mana buli mundu ouba natong'ile khubamahanga ako akaseera Yerusalemu, alatikulukhanga omuyika buli muyika natsia okhumwinamila Omuruchi, OMWAMI omwene mahe, nokhulia lisabo liamatili. 17Ne eshilibwa shiosi eshiokhushialo eshiratikulukha shitsie eYerusalemu okhwinamila Omuruchi, OMWAMI omwene mahe, ifula shiyilabakwila ta. 18Ne kata eshilibwa shiaMisiri nishiba nishiratikulukha shiuleyo ta, oluumbe tsana lulaba khubo olwa OMWAMI yakhupa ninalwo amahanga ako akaratikulukhanga okhulia lisabo liamatili ta. 19Obukuumwi bwaMisiri bulaba burio, nobukuumwi bwamahanga kosi akaratikulukhanga okhulia lisabo liamatili ta.
20Khunduukho eyo amakhuwa kalasaarwa khunyimba tsietsifarasi, mbu INDAKATIFU YOMWAMI; kata tsinyungu etsiomunzu yOMWAMI tsilaba shinga tsindaabo etsibeetsanga imbeli weshimalilo. 21Kata buli nyungu muYerusalemu nomuYuda yilaba indakatifu khuMWAMI omwene mahe; nabo bosi abamalanga emisango baleetsa nibatsibukulakhwo, nibateeshelamwo; kata khunduukho eyo shialabamwo omundu yesi oweinganga munzu yOMWAMI omwene mahe khandi ta.
Currently Selected:
Zakaria 14: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975