Zakaria 5
5
Eshitabu eshikanye eshipulukha
1Mana ninjinguula tsimoni khandi, nindola, mbu eshitabu eshikanye shieshio, nishipulukha. 2Niyareeba mbu Eshia olola nishiina? Ningalusia nisunga mbu Endola eshitabu eshikanye nishipulukha; oburambi bwashio buhela amakhono amakhumi kabili, nobuchiikha bwashio amakhono ekhumi. 3Mana niyamboolela mbu Shino nishio eshilaamo shiobubii eshirula nishitsia mushialo shiosi pe; khulwa amakhuwi kashio, buli mundu owiba alaakamibwaho; khandi khulwa amakhuwa kashio, buli mundu owitsuba akobubeeyi alaakamibwaho. 4OMWAMI omwene mahe aboola mbu ndalashiruma ebulafu, nashio shileenjila munzu yomwibi, khandi munzu ya oyo owitsuba akobubeeyi muliira lianje; shilamenya munzuye mukari, nishichimala pe, netsimbaho tsiayo namachina kayo.
Omukhasi mushichelo shiaEfa
5Mana malaika tsana owali nasungana ninasi narula, niyasunjila mbu Bulaano chinguula tsimoni, olole shino eshirula nishitsia shinga olwa shili. 6Nireeba mbu Shikhali shiina? Naye nasunga mbu Shino nishio eshichelo shia efa, eshirula nishitsia. Nameeta nasunga mbu Shino nishio obumayaanu obuli mushialo shiosi. 7Mana lola, eshifuunikho shieshibia shietsisasi nishichinguulwa, ne omukhasi ngwoyo, niyeekhaale mu efa tsana mukari. 8Nasunga mbu Uno niye Obubii; namukhupa hasi mu efa tsana, niyeekala omunwa kwayo butinyu netsisasi tsana tsisiro 9Mana ninjinguula tsimoni, nindola, mbu abakhasi babili mbabo, nibarula nibeetsa; omuyeka kwali nikuli mumbaha tsiabwe, okhuba bali netsimbaha shinga tsimbaha tsielikuyi; nibachinga efa tsana hakari weshialo nelikulu. 10Mana nireeba malaika owali nasungana ninasi, mbu Kho bayila heena eshichelo shia efa tsana? 11Niyamboolela mbu Batsia okhushiumbashila inzu mushialo shiaShinari; ne olwa yilaba niyikasiibwe, shilareebwamwo khushichibi shiashio.
Currently Selected:
Zakaria 5: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975