Luk 19
19
Jesus un Zachäus
1Un Hee jinkj nenn un jinkj derch Jericho. 2Un kjikj, doa wia een Maun, met Nomen Zachäus, dee wia een Väaschta von de Taks-Kollakjta, un hee wia rikj. 3Un hee socht doano, Jesus to seenen, wäa hee wia, un kunn nich, wäajens de Volkjshäad, wiels hee wia kjlien von Jestault. 4Un hee rand veropp un stieech opp eenen Mulbäaboom, om Am to seenen, wiels Hee sull doa derchkomen. 5Un aus Jesus bat dän Plauz kjeem, kjikjt Hee nopp un sach am doa un säd to am: Zachäus, stie schwind rauf; wiels vondoag mott Ekj en dien Hus vewielen. 6Un hee stieech schwind rauf un neem Am opp met Freiden. 7Un aus see daut sagen, murden see aula un säden: Bie eenem sindjen Maun es Hee nenjegonen to Jast. Luk 15:2 8Zachäus oba stunt un säd to däm Harn: Kjikj, Har, de Halft von miene Jieta jäw ekj de Oame, un wan ekj irjentwäm aufjelaupst hab, däm woa ekj veamol sooväl trigj-jäwen. 2Mo 21:36; Hes 33:14-16 9Jesus oba säd to am: Vondoag es no dit Hus Radunk jekomen, wiels uk hee een Sän von Abraham es. Luk 13:16 10Wiels de Menschensän es jekomen, to sieekjen un to raden, waut veloaren es. Hes 34:16; Luk 5:32; 1Tim 1:15
Daut Jlikjnis vom Vewaulten
Mat 25:14-30; Mrk 13:34
11Wäarent see oba dit hieeden, jeef Hee doa noch een Jlikjnis to, wiels Hee dichtbie Jerusalem wia, un see meenden, daut Gott sien Rikj sull fuaz jeopenboat woaren. 12Hee säd nu: Een jewessa stotlicha#19:12 Ooda: Aunjeseena. Maun jinkj wietauf en een Launt, om een Rikj fa sikj to kjrieen un dan wada trigj to komen. 13Dan roopt hee tieen von siene Kjnajchts un jeef äant tieen Pund#19:13 Griechisch Mina: Een Mina wia äwareen met 100 Drachmas (100 Doages-Loon), un bie 500 Graum Selwa. un säd to äant: Haundelt, bat ekj kom. 14Siene Birja oba hausten am un schekjten am Bootschoft hinjaraun un leeten am sajen: Wie wellen nich, daut disa äwa ons harscht. Joh 1:11 15Un daut passieed, aus hee trigj-kjeem, nodäm hee daut Rikj jekjräajen haud, leet hee de Kjnajchts, woone hee daut Jelt jejäft haud, ver sikj roopen, om to weeten, waut een jiedra derch Haundlen vedeent haud. 16Dan kjeem de ieeschta opp un säd: Har, dien Punt haft tieen Punt vedeent. 17Un hee säd to am: Goot, gooda Kjnajcht! wiels du em Kjlienen best tru jewast, saust du Macht haben äwa tieen Städa. Luk 16:10 18Un de Tweeda kjeem un säd: Har, dien Punt haft fief Punt jemoakt. 19Hee säd uk to disem: Un du saust äwa fief Städa sennen. 20Un een aundra kjeem un säd: Har, kjikj, hia es dien Punt, woont ekj em Schweetduak oppbewoat hab; 21Wiels ekj fercht die, wiels du een strenja Maun best. Du nemst, waut du nich hanjelajcht hast, un du arntst, waut du nich jeseit hast. 22Dan säd hee to am: Ut dien Mul woa ekj die rechten, du beesa Kjnajcht! Wist du, daut ekj een strenja Maun sie, daut ekj näm, waut ekj nich hanjelajcht hab un arnt, waut ekj nich jeseit hab? 23Wuarom hast du mien Jelt dan nich en de Bank nenjejäft, soo daut, wan ekj kjeem, haud ekj daut met Entras jenomen? 24Un hee säd to de Rom-Stonende: Nämt von am daut Punt un jäft daut däm, dee tieen Punt haft. 25(Un see säden to am: Har, hee haft tieen Punt!) 26Wiels ekj saj junt: Wäa doa haft, däm woat jejäft woaren; von däm oba, dee nich haft, woat uk noch daut jenomen woaren, waut hee haft. Mat 13:12; Luk 8:18 27Oba doch, jane miene Fiend, dee nich wullen, daut ekj äwa äant harschen sull, brinjt häa un moakt dee ver mie doot.
Jesus jeit no Jerusalem
Mat 21:1-9; Mrk 11:1-10; Joh 12:12-15
28Un aus Hee dit jesajcht haud, jinkj Hee veraun un reisd nopp no Jerusalem. 29Un daut passieed, aus Hee dichtbie Betfage un Betanien kjeem, aun dän Boajch, dee doa Oliewen-Boajch jenant woat, schekjt Hee twee von siene Jinja 30un säd: Got han en daut Darp, daut ver junt licht; un wan jie nenkomen, woa jie een Falm aunjebungen finjen, opp daut kjeen Mensch jeemols jesäten haft. Leest daut loos un brinjt daut häa. 31Un wan junt wäa frajcht, wuarom jie daut loos-leesen, dan sajcht soo to am: De Har haft Noot doafäa. 32Un de Jeschekjte jinjen han un fungen daut, soo aus Hee äant jesajcht haud. 33Aus see oba daut Falm loos-leesden, säden de Haren äwa daut to äant: Wuarom lees jie daut Falm loos? 34Un see säden: De Har haft Bederfnis doafäa. 35Un see brochten daut no Jesus un schmeeten äare Kjleeda opp daut Falm un saden Jesus doanopp. 36Aus hee oba wieda-reisd, spreeden see äare Kjleeda opp dän Wajch. 37Un aus Hee aul däm Raufgank vom Oliewen-Boajch nodad, funk de gaunze Häad Jinja aun, met lude Stemm, freidich Gott to lowen äwa aul de Wundawoakjen, dee see jeseenen hauden, 38un säden: Jeloft es de Kjennich, dee em Nomen vom Harn kjemt! Fräd em Himmel un Harlichkjeit em Hechsten! Ps 118:26; Luk 2:14 39Un atelje von de Farisäa ut de Volkjshäad säden to Am: Liera, strof diene Jinja! 40Hee auntwuad un säd to äant: Ekj saj junt: Wan dise wudden stell sennen, dan wudden de Steena schrieen.
41Un aus Hee noda kjeem un de Staut sach, hield Hee äwa ar 42un säd: Wan uk du erkjant hautst, jo du, aun disem dienem Dach, waut to dienem Fräd deent! Nu oba es daut ver diene Uagen vestoaken. Mat 13:13-14; Luk 13:34 43Wiels doa woaren Doag äwa die komen, daut diene Fiend eene Waunt#19:43 Ooda: Poltun. jäajen die oppstalen woaren un woaren die runtom enschluten un die von aule Sieden bedrenjen; 44un dee woaren die un diene Kjinja en die met däm Ieedboddem jlikj-moaken, un woaren en die nich eenen Steen opp däm aundren loten, wäajens du diene Besieekjungs-Tiet nich erkjant hast. Luk 21:6
Jesus reinicht dän Tempel
Mat 21:12-17; Mrk 11:15-19; Joh 2:13-22
45Un Hee jinkj en dän Tempel nenn un funk aun rut to driewen, dee doabennen vekoften un koften, 46un Hee säd to äant: Daut steit jeschräwen: “Mien Hus es een Bädhus”; jie oba haben eene Reibaheel doarut jemoakt. Jes 56:7; Jer 7:11 47Un Hee lieed aule Dach em Tempel. Oba de Huagepriesta un Schreftjelieede un de Väanämste em Volkj sochten Am om to brinjen 48un fungen nich, waut see doonen kunnen, wiels daut gaunze Volkj honk Am aun un horchten.
Lukas
Currently Selected:
Luk 19: DKB
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 von de Kjennichs-Bibel Jesalschoft
