Imamat 20
20
Ngowa'a sanga hukumu ga'a mete'e ua 'atoranga
1Ma JOU 'o kanau ra Musa ma betongo so'o ne: 2<<Siajele toma bangsa Israel so'o ne: 'A guna ḇato ra ngini ninga sigolona bolo ngowa'a tagi-tagi ino ga'a tegoro ra ngini ninga sigolona ga'a manga ngowa'a sidoa'a di'a jou-jou tau'u toma dulada ga'a si'aro'o Molokh, unanga gena-ge balasu sanga hukumu sengene. Re ngowa'a Israel balasu 'aḏi poini unanga gena-ge reo maḏi singadolo 'o sengene. 3Ngoi masiretene ḏuanga i'a To celolo 'Ari ḏuḏunu toma ngowa'a matengo gena-ge re sisupu unanga toma bangsa Israel manga sigolona sababu unanga ro sidoa'a 'ai ngowa'a matengo sa'olo jou-jou tau'u toma dulada ga'a sigaro'o Molokh. Dadi unanga gena-ge sinajis 'Ari Suyu'u re 'o sipa-pake ua 'Ari lomanga ga'a 'i 'ofi-'ofi. 4Mada'a na'o ngowa-ngowa'a ya ruutu manga la'o wakutu unanga 'o sidoa'a 'ai ngowa'a matengo sa'olo jou-jou tau'u toma dulada Molokh, re ananga 'u sihukumu sengene ua, 5unanga gena-ge re ananga mo-moini ga'a mamete'e unanga ga'a ma tero sa'olo ma were'a ga'a mo dadi we-were'a su-sudala na'o 'aḏi silamo'o re siḏubuso dulada Molokh, Ngoi masiretene ḏuanga i'a To celolo 'Ari ḏuḏunu ra unanga gena-ge re 'ai ngitu re ngale re mo-moini ḏi'i ga'a mamete'e ra unanga, Ngoi Ta'u sisupu toma bangsa Israel manga sigolona.
6Na'o ngowa'a matengo 'o macelolo re tagi toma tukanga sarati bolo tukanga ma-maisi di'a golo'o ajele ma ngale, unanga gena-ge ma tero sa'olo ma were'a ga'a mo dadi we-were'a su-sudala wakutu unanga 'o silamo'o re siḏubuso jou'ongu ma somoara. Ngoi ḏuanga i'a To celelo 'Ari ḏuḏunu ra unanga gena-ge re Tu sisupu toma ngowa'a Israel manga sigolona. 7Sababu gena-ge ngini balasu ni siwola i'a ninga diri di'a Ngoi re ni 'ahu sa'olo ngowa'a 'ofi-'ofi Tari momina, sababu Ngoi nena-ne Ma JOU, Ma Jou'ongu Madutu ga'a ni silamo'o re siḏubuso. 8Na mete'e re na si'a'a mode-mode'e 'Ari huku-hukumu, sababu Ngoi nena-ne Ma JOU, ga'a To siwola i'a ngini di'a Ngoi. 9Na'o ngowa'a ga'a 'aḏi sosowini manga ḇaḇa bolo manga ngina, ananga gena-ge balasu sihukumu sengene. Ananga raḏi sosowini manga ḇaḇa bolo manga ngina, dadi ananga masiretene 'aḏi doiti hukumana sengene di'a manga ga'a ma rapu. 10Na'o ngowa'a Israel matengo 'o tinikai toma we-were'a ga'a 'ami nau'u ngowa'a Israel ḏi'i, unanga re munanga gena-ge, ananga nga muḏiḏi balasu 'aḏi sanga hukumu sengene. 11Na'o na-nau'u matengo 'o otu malomu tai ḇaḇa 'ai were'a matengo i'a, unanga 'o sipula'a mara'a tai ḇaḇa, unanga re munanga gena-ge, ananga nga muḏiḏi balasu 'aḏi sanga hukumu sengene; ananga masiretene 'aḏi doiti hukumana di'a ga'a ma rapu. 12Na'o na-nau'u matengo 'o otu malomu tai dunungu, ananga nga muḏiḏi balasu sanga hukumu sengene; ananga 'aḏi si'a'a ga'a ma emo-emono madutu ra Ngoi 'ari momina. Ananga masiretene 'aḏi doiti hukumana di'a ga'a ma rapu. 13Na'o na-nau'u matengo 'o otu malomu reo na nau lelegu, rema duhu ma tero sa'olo reo we-were'a, ananga nga muḏiḏi 'aḏi si'a'a ga'a ma emo-emono ra Ngoi 'ari momina. Tantu ḏua ananga 'aḏi sanga hukumu sengene; Ananga masiretene 'aḏi doiti hukumana di'a ga'a ma rapu. 14Na'o na-nau'u matengo 'o molo'ara we-were'a matengo, re 'a molo'ara ḏi'i were'a gena-ge 'ami ngina, ananga nga ḏu'ange mo-moini balasu ya'u tau'u singadolo 'aḏi sengene. Sababu ananga 'aḏi madaga'a ga'a ma kajahatana ga'a sipula'a mara'a madutu. Duhu so'o gena-ge awa 'age ra ngini ninga sigolona. 15Na'o na-nau'u matengo 'o be-bere haiwani, unanga reo haiwani gena-ge balasu sisengene. 16Na'o we-were'a matengo haiwani mi be-bere, munanga reo haiwani gena-ge balasu sisengene, haiwani re munanga gena-ge, masiretene balasu ya doiti ma hukumana di'a ga'a gena-ge. 17Na'o na-nau'u matengo 'o otu malomu tai biḏanga; bae biḏanga ḇaḇa moi mada'a matai ngina, bae biḏanga ngina moi mada'a matai ḇaḇa. Unanga gena-ge 'ai ga'a 'i sipula'a mara'a tai biḏanga gena-ge re ananga nga muḏiḏi sanga supu toma ngowa'a Israel manga sigolona. Unanga masiretene 'a doiti hukumana di'a 'ai ga'a ma rapu. 18Na'o na-nau'u matengo 'o otu malomu toma we-were'a ga'a mi 'orasa mo maoḏi'i, ananga gena-ge ngini na'u sisupu toma Israel manga sigolona. 19Na'o na-nau'u matengo 'o otu malomu tai ḇaḇa ma biḏanga, bolo tai ngina ma biḏanga. ga'a gena-ge sipula'a mara'a tai biḏanga gena-ge, ananga nga muḏiḏi balasu ya doiti enanga ma hukumana di'a manga ga'a ma rapu. 20Na'o na-nau'u matengo 'o otu malomu tai ḇaḇa jojo 'ai were'a, unanga 'o sipula'a mara'a 'ai ḇaḇa jojo. Dadi ananga nga muḏiḏi balasu doiti ma hukumana di'a manga ḏosa. Ananga gena-ge sanga ngowa'a ua singadolo ananga 'aḏi sengene. 21Na'o na-nau'u matengo 'o otu malomu reo ioro bolo nongoḏu 'ai were'a, ga'a gena-ge 'i najis re emo-emono. Ḏi'i unanga 'o sipula'a mara'a tai ioro bolo nongoḏu re singadolo 'aḏi sengene ananga kama sanga ngowa'a ua.
22Ma Jou'ongu Madutu 'o kanau, "Na mete'e re si'a'a 'Ari hukumu re 'Ari 'atoranga mo-moini, la ngini tana'a itomo ua ma tero sa'olo ngowa'a 'o singunanga ngo-ngoromo ga'a cira. Tana'a gena-ge daeraha Kanaan, ga'a Ngoi ḏuanga i'a To gasa di'a siḏegoro ngini. 23Awa ni cuḏuḏu'u bangsa ga'a tegoro da'a ananga manga 'adata. Ananga, Ngoi ta'u dusu'u sababu 'aḏi madaga'a ga'a ma kajahatana gena-ge. Sababu gena-ge, Ngoi to nga'unu riwara oḏi'i ananga gena-ge. 24Mada'a Ngoi to kanau ra ngini <Ananga gena-ge manga tana'a, Ngoi ḏuanga i'a ta sipula'a sa'olo ninga warisi di'a ta ngini, tana'a gena-ge ga'a rousu madutu re lamo'o, singadolo 'age susu re madu pai-pai'i.> Sababu Ngoi nena-ne Ma JOU, Ma Jou'ongu Madutu ga'a ngini ni silamo'o re siḏubuso ga'a Ta siwo-wola ḏua ngini toma bangsa mo-moini. 25Ma sababu gena-ge ngini balasu ni waro mode-mode'e mangale haiwani re namo diwanga ga'a 'ofi re nyengara na oromo re haiwani re namo diwanga ga'a najis re siwosono di'a oromo. Awa ngini ni si'a'a ninga diri emo-emono ra Ngoi 'ari momina, sababu ni oromo haiwani, namo diwanga bolo haiwani lai ce-ceka'a 'oru ḇato ga'a tare-tare toma tana'a ma re'u. Enanga gena-ge Ngoi ta siwola i'a ḏua sa'olo najis di'a ngini. 26Ngini balasu ni 'ahu 'ofi-'ofi Tari momina, sababu Ngoi, Ma JOU ga'a 'ofi-'ofi. Re Ngoi reto siwo-wola i'a ngini toma bangsa mo-moini, la ngini ni dadi Ta Ngoi. 27'A guna ḇato na-nau'u bolo we-were'a ga'a tukanga sarati bolo tukanga ma maisi, ananga gena-ge balasu 'aḏi sanga hukumu sengene. Ananga gena-ge ngowa'a balasu ya'u poini reo maḏi singadolo 'aḏi sengene. Re ananga masiretene ḏuanga i'a 'aḏi doiti hukumu sengene di'a manga ga'a ma rapu.
Currently Selected:
Imamat 20: SAJ
Highlight
Share
Compare
Copy
Want to have your highlights saved across all your devices? Sign up or sign in
2025 Indonesian Bible Society (LAI)