Imamat 21
21
'Imam balasu 'aḏi 'ofi
1Ma JOU 'o kanau ra Musa ma betongo so'o ne: <<Siajele toma 'imam-'imam, gena-ge 'a Harun 'ai ngowa'a nau'u, so'o ne: <Awa 'imam matengo i'a mai ua, unanga 'o sinajis 'ai diri, sababu 'o cigi 'ai ioronongoḏu 'ai mayeti, 2ḏuga-ḏuga na'o 'ai ioronongoḏu sengene gena-ge: 'ai ngina, 'ai ḇaḇa, 'ai ngowa-ngowa'a nau'u bolo ngowa-ngowa'a were'a, 'ai ioro bolo nongoḏu, 3re ḏi'i 'ai biḏanga ga'a mo mosolese moju, singadolo munanga mo masinganono ra ma iḏanga moju (sababu mo molo'ara nyangu, dadi ra ananga ) unanga 'o masinajis nyengara 'o si'a'a 'ai diri di'a ananga gena-ge. 4Unanga 'a sinajis 'ai diri yoḏu'u sababu 'o cigi ngowa'a manga mayeti, ananga ga'a 'aḏi molo'ara 'ai ioronongoḏu. 5'Imam matengo i'a mai ua 'o simaha ua 'o ḇukuku 'ai sae'e kaci moi, re 'o guti 'ai kukumu ma dere, bolo 'o ḏui-ḏuiti 'ai lese di'a sijumu unanga 'o duka re balisa. 6'Imam gena-ge balasu 'o siwola i'a di'a Ma Jou'ongu Madutu ga'a unanga 'o silamo'o re siḏubuso re dadi 'o si'u'ua 'Ari lomanga awa. Sababu unanga 'o sidoa'a jou-jou ngo-ngoromo di'a Ngoi, Ma JOU. Jou-jou gena-ge ngo-ngoromo di'a Ma Jou'ongu Madutu ga'a unanga 'o silamo'o re siḏubuso. Sababu gena-ge, unanga gena-ge balasu 'o 'ahu sa'olo siwola i'a di'a Ngoi. 7'Imam 'o molo'ara yoḏu'u we-were'a ga'a mo wu'unu 'ami diri, bolo re mo waro nau'u ḏua, bolo re mo ḏiḏi'utu, sababu 'imam 'o siwola i'a di'a Ngoi, Ma Jou'ongu Madutu ga'a unanga 'o silamo'o re siḏubuso. 8Ngini bangsa Israel balasu ni mangaku 'imam gena-ge reto siwola i'a di'a Ngoi, sababu unanga 'o sidoa'a jou-jou ngo-ngoromo ra Ngoi, Ma Jou'ongu Madutu ga'a ngini ni silamo'o re siḏubuso. Ngini balasu ni mangaku 'imam gena-ge unanga 'o siwola i'a di'a Ngoi, sababu Ngoi, Ma JOU to 'ofi-'ofi re Ngoi to si'ofi ngini. 9Na'o 'imam 'ai ngowa'a were'a matengo, mo dadi we-were'a su-sudala toma jou'ongu ma somoara ma wala ma dara, munanga mo sije-jengere 'ami ḇaḇa, dadi ngini balasu ni tau'u munanga singadolo sengene. 10<<'Imam 'Agung ga'a goroho 'urapana 'i siba-ba'ala tai sae'e re 'o sisolano di'a 'o pake 'Imam 'Agung 'ai pakeanga, unanga gena-ge 'ai utu kawusa yoḏu'u re 'o ma'acingi ua 'ai pakeanga sa'olo nana'o rimoi di'a sijumu unanga 'o duka re balisa. 11Awa unanga gena-ge 'o cigi a guna ḇato mayeti re sinajis 'ai diri. Kalaha ma ḇaḇa 'ai mayeti bolo ma ngina 'ami mayeti, awa unanga 'a cigi manga mayeti. 12Re ḏi'i, awa unanga gena-ge 'o sisoi'i tala Suyu'u 'Ofi-'Ofi di'a 'o mete'e laya otomo ngowa'a sengene, la awa unanga 'o sinajis ngi'i gena-ge. Ma sababu, goroho 'urapana 'i siba-ba'ala tai sae'e di'a siwola i'a unanga di'a Ma Jou'ongu Madutu ga'a unanga 'o silamo'o re siḏubuso: Sababu Ngoi nena-ne Ma JOU. 13Unanga nyengara molo'ara were'a ga'a waro nau'u nyangu. 14Unanga 'o molo'ara yoḏu'u ngowa'a balo, bolo remo ḏiḏi'utu, bolo we-were'a ga'a re mo wu'unu 'ami diri. Unanga pa'i 'o molo'ara ḇato were'a ga'a waro nau'u nyangu tai bangsa. 15Ma sababu unanga 'ai ngowa-ngowa'a nau'u ḏi'i ḏuanga i'a 'aḏi siwola i'a di'a Ngoi tamanga bangsa masiretene, sababu Ngoi nena-ne Ma JOU ga'a Ngoi to siwola i'a unanga sa'olo 'Imam 'Agung.>>
16Re Ma JOU 'o kanau ra Musa ma betongo so'o ne: 17<<Siajele ra Harun ne: <'Imam matengo i'a taninga ju'uda tala ga'a 'ai lese 'i cira, awa unanga 'o jau i'a ra Ngoi di'a sidoa'a jou-jou ngo-ngoromo ra Ma Jou'ongu Madutu ga'a unanga 'o silamo'o re siḏubuso. 18'Imam matengo i'a rai lese 'i cira, awa unanga gena-ge 'o jau i'a ra Ngoi: ngowa'a hafu bolo ngowa'a ḇolo, ngowa'a manga biono, giama bolo rou kaci moi 'i cira, 19bolo ngowa'a ga'a rou bolo giama 'i rapo'o 20ngowa'a pukutu, ngowa'a 'ai lese 'i ḇoko'o woḏi, ngowa'a rai si-siḏi la'o bolo si-siḏi eno'o, re ngowa'a ga'a dalaḏi 'i siwejere. 21Ngowa'a nau'u toma 'imam Harun 'ai ju'uda ga'a 'ai lese 'i cira, awa unanga 'o jau i'a ra Ngoi di'a sidoa'a jou-jou ngo-ngoromo ra Ma JOU. Na'o unanga gena-ge 'ai lese 'i cira, awa unanga 'o jau i'a ra Ngoi di'a sidoa'a jou-jou ngo-ngoromo ra Ma Jou'ongu Madutu ga'a unanga 'o silamo'o re siḏubuso. 22Unanga gena-ge nyengara 'o oromo ngo-ngoromo di'a Ma Jou'ongu Madutu ga'a unanga 'o silamo'o re siḏubuso: bae jou-jou ngo-ngoromo 'ofi-'ofi, bae jou-jou ngo-ngoromo lai 'ofi-'ofi i'a ḏi'i. 23Mada'a sababu unanga gena-ge 'ai lese 'i cira, unanga 'o jau i'a ua toma jou-jou ma ngi'i bolo osama toma Suyu'u 'Ofi-'Ofi, la unanga 'o sinajis 'Ari ngi'i 'ofi-'ofi re mo-moini toma dara sababu Ngoi nena-ne Ma JOU ga'a siwola i'a sa'olo 'ofi-'ofi enanga gena-ge.#21:23 Bolo ...sababu Ngoi nena-ne Ma JOU ga'a siwola i'a 'imam gena-ge.> >> 24Dadi 'a Musa 'o siajele mo-moini gena-ge ra Harun re 'ai ngowa-ngowa'a nau'u re ḏi'i ngowa'a Israel mo-moini.
Currently Selected:
Imamat 21: SAJ
Highlight
Share
Compare
Copy
Want to have your highlights saved across all your devices? Sign up or sign in
2025 Indonesian Bible Society (LAI)