Dolabololo 11
11
1Ma JOU 'o emono ngowa'a wu-wu'unu ga'a 'aḏi sirugi ngowa'a na'o 'aḏi situga 'ori i'a,#Im. 19:35-36; Dad. 25:13-16; Mi. 6:10-11
mada'a Unanga 'o sanangi ngowa'a wu-wu'unu na'o ananga gena-ge ga'a 'aḏi pake kilo ba-banari.
2Ngowa'a momole ḏuanga i'a sanga sipula'a mara'a
mada'a ngowa'a maholo 'aḏi dadi ngowa'a 'akala soro'unu
3Ngowa'a ga'a manga 'ahu 'i boloto, enanga gena-ge 'i sinyanyasele manga 'ahu
mada'a ngowa'a ga'a tukanga sihaga, ananga manga haga masiretene ya'u sijira.
4Toma Kiamata ma Wangere, 'ori i'a rana ma faeda 'i cua;
mada'a 'ahu loasa re banari, gena-ge ḏuanga i'a 'i sisalamata ngowa'a toma sengene.
5Ngowa'a ga'a manga de'oso re ḏegoro kama rapu ua, ananga gena-ge manga loasa re banari 'i sinyanyasele manga 'ahu,
mada'a ngowa'a kajahatana, ananga gena-ge 'aḏi eta'a sababu manga kajahatana masiretene.
6Ngowa'a ga'a manga 'ahu 'i boloto, ananga gena-ge manga 'ahu loasa re banari ya'u sisalamata;
mada'a ngowa'a ga'a tukanga sihaga, ananga gena-ge manga nyafusu masiretene ya'u siwejere.
7Wakutu ngowa'a kajahatana 'aḏi sengene, manga ngo-nganono mai 'i sengene,
ananga gena-ge 'aḏi masinganono tamanga de-de'e masiretene ma faeda cua.
8Ngowa'a loasa re banari 'aḏi sanga silalo'o toma bodito;
ḏua ngowa'a kajahatana ḏuanga i'a 'aḏi sanga bodito.
9Ngowa-ngowa'a ga'a 'aḏi celolo manga ḏuḏunu ra Ma Jou'ongu Madutu, ananga gena-ge remanga demo 'i sijira manga ḏagilomu;
mada'a ngowa'a loasa re banari manga wo-waro 'i sigasa ananga toma salamata.
10Wakutu ngowa'a loasa re banari 'aḏi sanga hasili, limau ma manusia 'aḏi maroanga;
re wakutu ngowa'a kajahatana 'aḏi sengene, rayata 'aḏi mabo-boa'a remanga roanga.
11Limau 'i dadi lamo'o sababu ngowa'a ga'a manga 'ahu 'i boloto manga barakati;
mada'a limau 'i siruba sababu ngowa'a kajahatana manga madanga.
12Ngowa-ngowa'a ga'a 'aḏi sipa-pake ua manga ḏagilomu, ananga ga'a manga 'akala cua,
mada'a ngowa'a pahe remanga wo-waro di'a 'ahu, ananga gena-ge 'aḏi kanau demo bale moi i'a mai ua.
13Ngowa'a ga'a nyanyaḏi 'aḏi sikanau ngowa'a, ananga gena-ge 'aḏi sijarita 'ori i'a go-gogono,
mada'a ngowa-ngowa'a ga'a setia, ananga gena-ge 'aḏi damunu 'ori i'a ga'a gogono.
14Na'o bangsa rimoi kama bi-biri'i ua, ḏua 'i wejere,
mada'a na'o ngowa'a ga'a pula'a duga re domolo repe, ḏua 'i salamata .
15Ngowa'a ga'a 'aḏi jaji tuusu ngowa'a lelegu 'ai banyatoro, 'aḏi sanga bahala;
mada'a ananga 'aḏi majaji ua, 'aḏi salamata.
16We-were'a ga'a mi 'akala re sinyingara 'i la-la, ngowa'a mi silamo'o;
mada'a na-nau'u ga'a kajahatana, unanga gena-ge pa'i 'o lomu harata.
17Ngowa'a remanga 'akala re sinyingara ma la-la 'aḏi si'utungu manga diri masiretene,
mada'a ngowa'a ga'a ruta-ruta 'aḏi sijira manga diri masiretene.
18Ngowa'a kajahatana manga 'utungu gena-ge pa'i taḇe i'a.
mada'a ngowa'a ga'a 'aḏi 'a'a 'ori i'a ma la-la, ananga 'aḏi sanga ngogele mode-mode'e.
19Ngowa'a ga'a 'aḏi 'a'a 'ori i'a ma la-la tau-taunu, ananga 'aḏi sanga 'ahu,
mada'a ngowa'a ga'a 'aḏi 'a'a kajahatana, ananga 'aḏi jau i'a sengene.
20Ma JOU 'o emono ngowa'a ga'a manga 'akala re sinyingara 'i cira
mada'a ngowa'a ga'a 'ahu manga de'oso re ḏegoro kama rapu ua, ananga gena-ge 'aḏi sisanangi Unanga.
21Tantu ḏua, ngowa'a ma jira ḏuanga i'a 'aḏi sanga hukumana,
mada'a ngowa'a loasa re banari manga ju'uda ḏuanga i'a 'aḏi sanga salamata.
22We-were'a rousu ga'a kami 'akala ma la-la ua
ma tero sa'olo 'ali-'ali guraci toma soto ma ngunungu
23Ngowa'a loasa re banari manga nyafusu ma hasili pa'i 'i rousu ḇato,
mada'a ngowa'a kajahatana manga ngo-nganono ma hasili pa'i sanga Ma Jou'ongu Madutu 'ai duruta ḇato.
24'Age rema ngowa'a tata-cira ua mada'a manga 'ori i'a rana 'i madogo-dogo;
'age rema ngowa'a tala'a, mada'a 'aḏi dadi ngowa'a ma dinga'unu ua.
25Ngowa-ngowa'a ga'a 'aḏi pula'a bu-bula'a lai lamo'o, ḏuanga i'a 'aḏi sanga pai-pai'i,
ngowa'a ga'a 'aḏi nyafusu riono ngowa'a, unanga ḏuanga i'a ngowa'a 'u riono.
26Ngowa-ngowa'a ga'a 'aḏi tahana gandum, ngowa'a ya'u kutuki,
mada'a ngowa'a 'aḏi wu'unu gandum, 'aḏi sanga sitoro.
27Ngowa-ngowa'a ga'a 'aḏi makutale mete'e 'ori i'a ma banari, Ma Jou'ongu Madutu ya'u nyanyaḏi,
mada'a ngowa'a ga'a 'aḏi disa jira, ḏuanga i'a 'aḏi sanga enanga ma jira.
28Ngowa-ngowa'a ga'a 'aḏi masinganono tamanga harata, ḏuanga i'a 'aḏi eta'a,
mada'a ngowa'a loasa re banari, ḏuanga i'a 'aḏi sela sa'olo so'a ma j̱imutu
29Ngowa'a 'aḏi sikaco manga ngitu re ngale, ḏuanga i'a 'aḏi sanga warisi ua,
re ngowa'a haga 'aḏi dadi ngowa'a 'akala soro'unu 'ai budaka
30Ngowa'a loasa re banari manga hasili ma tero ate ga'a pula'a 'ahu,
re ngowa'a 'akala soro'unu manga me-mete'e 'aḏi madogo-dogo
31Na'o ngowa'a loasa re banari 'aḏi sanga ngogele toma dungia,
tantu ḏua, ngowa'a kajahatana re ngowa'a baraḏosa ḏuanga i'a 'aḏi sanga hukumu.
Currently Selected:
Dolabololo 11: SAJ
Highlight
Share
Compare
Copy
Want to have your highlights saved across all your devices? Sign up or sign in
2025 Indonesian Bible Society (LAI)