Dolabololo 12
12
1Ngowa-ngowa'a ga'a 'aḏi dadalara wo-waro, ananga gena-ge 'aḏi maroanga na'o ngowa'a ya'u ḇangata;
mada'a ngowa'a ga'a 'aḏi oḏu'u sanga ḇangata, ananga gena-ge 'aḏi haga ma tero haiwani.
2Ngowa'a la-la 'aḏi sisanangi Ma JOU,
mada'a ngowa'a ga'a manga 'ulungu 'i cira, ḏuanga i'a 'aḏi sanga hukumu.
3Matengo i'a mai ua 'o salamata sababu 'ai kajahatana,
mada'a ngowa'a ga'a loasa re banari manga 'ahu 'i elala ua.
4Were'a ga'a pahe gena-ge mo dadi 'ami nau'u 'ai lastari,
mada'a were'a ga'a mo sipula'a mara'a 'ami nau'u ma tero sa'olo si-siḏi toma obongo ma dara
5Ngowa'a loasa re banari manga 'ulungu 'i la-la,
ngowa'a kajahatana manga 'ulungu di'a sihaga.
6Ngowa'a kajahatana manga demo-demo 'i sigasa ngowa'a lelegu tamanga se-sengene,
mada'a ngowa'a ga'a manga 'ahu 'i boloto, ananga gena-ge manga demo-demo 'i sigasa ngowa'a toma salamata
7Ngowa'a kajahatana ḏuanga i'a 'aḏi eta'a singadolo ananga 'aḏi iranga;
mada'a ngowa'a loasa re banari manga ju'uda kama togumu ua.
8Ngowa'a 'aḏi sanga sitoro mete'e manga 'akala ma la-la;
re ngowa'a 'aḏi sanga je-jengere mete'e manga haga.
9Jobilaha ngene wo dadi ngowa'a biasa ga'a wo munara di'a nanga diri masiretene,
reo ngene wo ta'ajiri dadi ngowa'a la-lamo'o mada'a wo oromo mai ngadolo ua.
10Ngowa'a loasa re banari 'aḏi kadiarata manga haiwani,
mada'a ngowa'a kajahatana manga 'akala re sinyingara ma la-la 'i cira.
11Ngowa'a guḏa ga'a cufala munara ḏuanga i'a 'aḏi sanga ngo-ngoromo lai repe,
mada'a ngowa'a ga'a koya reo 'ori i'a ma pake ua, gena-ge ngowa'a ga'a manga 'akala cua.
12Ngowa'a kajahatana 'aḏi nyafusu sanga 'utungu toma ngowa'a ma jira;
mada'a ngowa'a loasa re banari ma tero sa'olo ate ga'a 'i sisupu ma sowo'o.
13Ngowa'a ma jira 'aḏi sado ra ananga masiretene manga demo-demo;
mada'a ngowa'a loasa re banari 'aḏi supu tamanga susa re sangisara.
14Ngowa-ngowa'a 'aḏi sanga manga 'ori i'a ma la-la ga'a mete'e manga demo-demo masiretene;
re ananga 'aḏi sanga ngogele mete'e manga galasau'u ma duduala masiretene.
15Ngowa'a haga 'aḏi mabasono manga 'ahu kamanga sala ua,
mada'a ngowa'a 'akala soro'unu 'aḏi nyafusu 'isene duga re domolo.
16Ngowa'a haga 'aḏi ruta cautu ra ngene sababu nanga demo-demo;
mada'a kalaha ngowa'a 'akala soro'unu 'aḏi sanga je-jengere, ananga gena-ge ya kalesanga ua.
17Sakisi ga'a 'akala re sinyingara 'i boloto 'o kanau ba-banari;
mada'a sakisi sa-sakala 'o kanau sa-sakala.
18Kanau cautu woḏi nyengara 'i sinyaboto 'akala re sinyingara ma tero sa'olo siruju samaranga;
mada'a ngowa'a 'akala soro'unu manga demo-demo ma tero sa'olo sou'u di'a si-la si-siḏi.
19Demo-demo ga'a ba-banari, enanga 'i tahana nena-ne re si'a,
mada'a demo-demo sa-sakala, enanga 'i tahana ti'ara ua.
20Ngowa'a ga'a manga 'ulungu 'i cira, ananga 'aḏi nyanyaḏi 'ori i'a ma jira;
mada'a ngowa-ngowa'a ga'a 'aḏi pula'a duga re domolo ma la-la ananga 'aḏi sanga sanangi.
21Ngowa'a loasa re banari 'aḏi sanga bodito ua;
mada'a ngowa'a kajahatana 'aḏi sanga susa re sangisara tau-taunu
22Ma JOU 'o emono ngowa'a sa-sakala;
mada'a ngowa'a setia 'aḏi sisanangi Unanga.
23Ngowa'a ga'a 'akala soro'unu, ananga gena-ge 'aḏi simomole ua manga wo-waro;
mada'a ngowa'a ga'a 'aḏi emono wo-waro, ananga gena-ge 'aḏi sipataha manga haga.
24Ngowa'a cufala manga giama ḏuanga i'a 'aḏi gu'u kuasa;
mada'a ngowa'a pamalasa, ḏuanga i'a 'aḏi si'a'a ananga dadi budaka.
25Basono mojongo 'i sirapo'o 'akala re sinyingara,
mada'a demo-demo ma roanga 'i sisanangi 'akala re sinyingara
26Ngowa'a loasa re banari 'aḏi sijumu ngo'omo di'a manga ḏagilomu;
mada'a ngowa'a kajahatana 'aḏi iranga ngo'omo sababu manga kajahatana.
27Ngowa'a ga'a pamalasa 'aḏi ḏuḏono ua manga kunu'i;
mada'a ngowa'a ga'a cufala 'aḏi sanga 'ori i'a rana.
28Ngowa'a ga'a mete'e ngo'omo loasa re banari, ananga gena-ge 'aḏi sanga 'ahu;
mada'a ngowa'a ga'a mete'e ngo'omo ma jira, ananga gena-ge sanga sengene.
Currently Selected:
Dolabololo 12: SAJ
Highlight
Share
Compare
Copy
Want to have your highlights saved across all your devices? Sign up or sign in
2025 Indonesian Bible Society (LAI)