Dolabololo 19
19
1Lebe rousu ngini ni dadi ngowa'a ma dinga'unu ua mada'a ninga de'oso re ḏegoro kama rapu ua
reo ngowa'a ga'a 'aḏi emono wo-waro ga'a 'aḏi kanau sa-sakala.
2Cufala faeda 'i cua na'o kama wo-waro ua;
ngowa-ngowa'a ga'a 'aḏi rogu'u woḏi, ḏuanga i'a manga hele 'i rapu.
3Ngowa'a manga haga masiretene 'i si'a'a ananga 'aḏi iranga manga ngo'omo,
mada'a manga 'akala re sinyingara 'i ruta ra Ma JOU.
4Harata 'i si'a'a ni sanga ḏagilomu lebe repe,
mada'a ngowa'a ma dinga'unu ua, ananga manga ḏagilomu ya'u sisoi'i.
5Sakisi-sakisi sa-sakala 'aḏi wiḏi yoḏu'u toma hukumana,
re ngowa'a ga'a 'aḏi siare-are sa-sakala, 'aḏi tagi bebasa yoḏu'u.
6Ngowa'a repe 'aḏi makutale 'oro 'akala re sinyingara toma ngowa'a la-lamo'o;
re ngowa'a mo-moini ma'u ḏagilomu reo ngowa-ngowa'a ga'a 'aḏi pula'a bu-bula'a.
7Ngowa'a ma dinga'unu ua, manga ioro re nongoḏu ya'u sanga ua,
ma la-lamo'o i'a ḏi'i, manga ḏagilomu ga'a ya'u maki-kiḏanga!
Kalaha ngowa'a ma dinga'unu ua 'aḏi kunu'i re 'aḏi 'aro'o ananga,
mada'a ananga gena-ge 'aḏi mairanga.
8Ngowa'a ga'a 'aḏi makutale sanga 'akala ma la la, ananga 'aḏi kadiarata manga diri;
Ngowa'a ga'a 'aḏi macako'o toma wo-waro lai ngido, ananga 'aḏi sanga bara'utungu.
9Sakisi sa-sakala 'aḏi mawiḏi yoḏu'u toma hukumana
re ngowa-ngowa'a ga'a 'aḏi siare-are sa-sakala, ḏuanga i'a 'aḏi sengene.
10Rema 'ori i'a rana 'i patasa ua di'a ngowa'a ga'a 'aḏi emono wo-waro,
re ma la-lamo'o i'a ḏi'i budaka 'aḏi parenta ngowa'a la-lamo'o.
11'Akala ma la-la nyengara 'i si'a'a ngowa'a 'akala ḇanyo;
re ananga gena-ge ngowa'a ya'u silamo'o sababu 'aḏi sima'afu ngowa'a manga sala.
12'Olana 'ai duruta ma tero sa'olo singa ra-ramasa ie 'i muḏutu;
mada'a 'ai 'akala re sinyingara ma la-la ma tero sa'olo gagini toma rurubu ma re'u.
13Ngowa'a nau'u ga'a 'o emono wo-waro, unanga 'o sijira ma ḇaḇa,
re were'a ga'a mo kuḏubungu ma tero sa'olo ḇanyo 'i tege kama togu-togumu ua.
14Wala re harata gena-ge warisi toma ete re dotumu tala,
mada'a were'a ga'a rami 'akala ma la-la, gena-ge cocatu ra Ma JOU ino.
15Pamalasa 'i si'a'a ngowa'a 'aḏi otu rousu i'a,
re ngowa'a kohi ḏuanga i'a 'aḏi sawini.
16Ngowa-ngowa'a ga'a 'aḏi mete'e parenta,#19:16 nyengara Ma Jou'ongu Madutu 'ai parenta-parenta ananga gena-ge 'aḏi kaḏiarata manga 'ahu,
mada'a ngowa'a ga'a 'aḏi sipa-pake ua Ma JOU 'ai 'Idini, ḏuanga i'a 'aḏi sengene.
17Ngowa-ngowa'a ga'a 'aḏi sijumu manga 'akala re sinyingara ma dadalara toma ngowa'a ma dinga'unu ua, gena-ge ma tero sa'olo Ma JOU 'o mabanyatoro ra ananga,
maha ḏua, Unanga 'a fanga ra ananga sababu manga ga'a gena-ge.
18Doto'o#19:18 Nyengara "Ca'olo ningi ngowa 'olo-ngowa 'olo " 'ani ngowa 'olo-ngowa 'olo moju wakutu rema ngo-nganono moju;
na'o so'o gena ua ngini ni mau ananga 'aḏi sengene.#19:18 awa ni sieanga ananga 'aḏi sijira masiretene.
19Ngowa-ngowa'a ga'a 'aḏi ruta caiti,
ḏuanga i'a 'aḏi sanga bo-bangu;
sababu ngini mau ni riono ananga,
ngini pa'i ni sidogo manga duruta ḇato.
20'Isene duga re domolo re dawongo do-doto'o,
la ngini ni dadi 'akala soro'unu toma biono i'a.
21Manusia manga rancana ma repe toma 'akala re sinyingara ma dara,
mada'a pa'i Ma JOU 'ai putusanga ga'a 'i dadi.
22Tabeata ga'a ngene wa nyafusu ra matengo i'a, gena-ge 'o setia,
Lebe rousu ngowa'a ma dinga'unu ua reo ngowa'a sa-sakala.
23Silamo'o re mojongo Ma Jou'ongu Madutu, gena-ge 'i sigasa 'ahu;
ḏua ngini ni siḏagi 'ahu, kama mojongo bodito ua.
24Ngowa'a ga'a pamalasa pa'i 'aḏi sigare manga giama toma suḏe ḇato;
mada'a ananga 'aḏi nga'unu ua, 'aḏi sitowo ngo-ngoromo tamanga madanga masiretene.
25Na'o ngini ni ca'olo ngowa'a ga'a 'aḏi situ-tuhu 'akala soro'unu, gena-ge 'i si'a'a ngowa-ngowa'a ga'a 'ahu ma wo-waro rimoi i'a mai ua, 'aḏi dadi 'akala soro'unu;
Na'o ngini ni ḇangata ngowa'a remanga wo-waro ga'a ya sinyanyasele, gena-ge 'i si'a'a ananga 'aḏi dadi lebe 'akala soro'unu.
26Ngowa'a nau'u ga'a 'o sikangela 'ai ḇaḇa re 'o dusu'u 'ai ngina,
unanga gena-ge 'o sijira re sipula'a mara'a 'ai diri masiretene.
27Hai 'ari ngowa'a nau'u, na'o ngana no 'isene do-doto'o riwara,
ngana no sidaioranga wo-waro ga'a na madoto'o ḏua!
28Sakisi-sakisi ga'a ma faeda cua, ananga gena-ge 'aḏi situ-tuhu 'adili,
re ngowa'a kajahatana manga madanga 'i nyamolo sa-sakala ma tero sa'olo ngo-ngoromo ga'a lai sa'i.
29Hukumana ri ḏu-ḏuanga ḏua di'a ngowa'a ga'a 'aḏi situ-tuhu 'akala soro'unu,
re bu-butulu ri ḏu-ḏuanga ḏua di'a ca'olo ngowa'a manga ḏuḏunu ga'a 'aḏi emono wo-waro manga ḏuḏunu.
Currently Selected:
Dolabololo 19: SAJ
Highlight
Share
Compare
Copy
Want to have your highlights saved across all your devices? Sign up or sign in
2025 Indonesian Bible Society (LAI)