Dolabololo 4
4
Duga re domolo di'a disa 'akala soro'unu
4:1-27
1'Ari ngowa-ngowa'a nau'u, na 'isene la-la 'ani ḇaḇa 'ai duga re domolo!
Na totoho gena-ge la ngana nga'unu no sahe wo-waro lai ngido.
2Ga'a ngoi to doto'o ngini nena-ne 'i la-la,
sababu gena-ge na sito-to'u awa.
3'Au nga'ene 'orasa ngoi 'ari ḇaḇa ga'a 'o doto'o ngoi,
re ngoi ngowa'a nau'u pa'i matengo ga'a 'ari ngina mo dadalara madutu,
4ḏua 'ari ḇaḇa 'o doto'o ngoi so'o ne: <<No 'elingi 'ari duga re domolo tani 'akala re sinyingara
re no macako'o tari parenta, la ngana ḏuanga i'a 'ani 'ahu 'i sanangi.
5No kutale di'a sanga 'akala soro'unu, no kutale di'a sanga wo-waro lai ngido,
re 'ari duga re domolo na sidaioranga awa re sipa-pake ua awa.>>
6Awa no sipa-pake ua 'akala soro'unu, la enanga ḏuanga i'a 'i riono ngana,
dadalara enanga, la enanga ḏuanga i'a 'i jaga ngana, la 'ani 'ahu 'i ogoro.
7'Akala soro'unu gena-ge ma faeda lai lamo'o masala dadi siḏa-siḏa na disa,
reo ngo'omo 'oru ḇato no kutale di'a sanga wo-waro lai ngido.
8No silamo'o 'akala soro'unu, la enanga ḏuanga i'a 'i sikau'u ngana,
no macako'o namo-namoto ra enanga, la enanga ḏuanga i'a 'i si'a'a ngana ngowa'a ni silamo'o.
9Enanga ḏua 'i sigare saya-saya tani sae'e,
gena-ge 'i dadi lastari ma rousu i'a ḏuanga i'a 'i sipula'a ra ngana.
10'Ari ngowa'a nau'u, no 'isene ngoi re na mete'e 'ari bobita,
la 'ani 'umuru kiḏanga.
11Ngoi to sinyanyasele ngana toma ngo'omo ga'a tagi toma 'akala soro'unu,
re to sibi-biri'i ngana tani 'ahu ga'a tagi toma ngo'omo boloto.
12Na'o no tagi, 'ani hele 'i sanga dola'aku ua,
na'o no lalara, 'ani rou 'i pele'e ua.
13No macako'o tari do-doto'o, awa na eanga,
balasu na palihara enanga, sababu enanga 'ani 'ahu ma cimi.
14Mete'e awa ngowa'a kajahatana manga 'ahu ma ngo'omo,
re na cuḏuḏu'u awa ngowa'a ga'a manga de'oso re ḏegoro ma rousu ua.
15Balasu no maki-kiḏanga ra ananga manga 'ahu ma ngo'omo, re no osama awa toma dara,
no malalo'o toma ngo'omo gena-ge re na siboloto 'ani ḏo-ḏagi.
16Sababu ananga 'aḏi otu yoḏu'u,
na'o 'aḏi 'a'a 'ori 'a ma jira nyangu;
ananga 'aḏi kakadungu nyangu,
na'o 'aḏi sibodito ngowa'a nyangu.
17Sababu ananga manga ga'a ma jira gena-ge 'i dadi sa'olo manga ngo-ngoromo, re ananga manga kajahatana ma tero sa'olo manga ngo-ngo'e.
18Mada'a ngowa'a loasa re banari manga 'ahu ma ngo'omo ma tero sa'olo wangere 'aro pilata ie,
enanga ma tarangi 'i ganapu ma dogo-dogo singadolo wangere 'olona.
19Ngowa'a kajahatana manga 'ahu ma ngo'omo 'i hafu ma tero lobi'i;
ananga 'aḏi pele'e mada'a ananga ya waro ua.
20'Ari ngowa'a nau'u, no totoho la-la 'ari demo-demo!
'Ani ngau'u balasu mangono tari duga re domolo.
21Mo-moini gena-ge na sidaioranga awa,
mada'a na gogono ino tani 'akala re sinyingara ma dara.
22Sababu gena-ge mo-moini, 'i sipula'a 'ahu di'a ananga, ga'a ya sanga,
re 'i dadi sou'u di'a 'i si-la ananga manga lese rimoi simoini.
23Na kaḏiarata 'ani 'akala re sinyingara la-la,
sababu 'ani 'ahu ma ngo'omo 'i supu gena ino.
24Upa'a 'ani madanga lamo'o,
re awa yai'i sa-salanga.
25'Ani la'o tatapu 'i tatamo toma biono,
re 'ani momina tatapu toma 'ahu ma ngo'omo ma banari.
26Na mete'e 'ahu ma ngo'omo ga'a 'i rata,
singadolo 'ani munara mo-moini rema hasili.
27Awa no malalo'o kuwiḏa bolo kuḇali, jaga 'ani rou
la awa na mete'e ngowa'a ma jira manga 'ahu ma ngo'omo.
Currently Selected:
Dolabololo 4: SAJ
Highlight
Share
Compare
Copy
Want to have your highlights saved across all your devices? Sign up or sign in
2025 Indonesian Bible Society (LAI)