Dolabololo 5
5
Ma 'istiari toma were'a su-sudala
1'Ari ngowa'a nau'u, na totoho 'ari 'akala soro'unu, re 'ani ngau'u balasu 'i gi-gisene wo-waro di'a 'ahu ga'a ngoi reta doto'o, 2la ngana no macako'o toma 'akala soro'unu, re no kanau ma tero sa'olo ngowa'a remanga wo-waro. 3Sababu were'a su-sudala 'ami demo re ganau 'i mami ma tero madu, re 'ami bo-baja lebe sa'i reo bou-bounu, 4mada'a togumu i'a enanga 'i si'a'a 'ani 'ahu 'i ma-maḏi ma tero midingi, re sangisara ma tero sa'olo sitopo'o reo samaranga ma doto romoḏiḏi. 5'Ami rou 'i 'uci toma kubu, 'ami hele sigasa toma dungia ngowa'a sengene. 6Munanga mo tagi ua toma ngo'omo ga'a sigasa 'ahu, munanga mo sai'i mada'a ma waro ua.
7Sababu gena-ge hei 'ari ngowa-ngowa'a nau'u, ni 'isene ngoi, awa na pu'i ninga ngau'u tari demo-demo 8'Ani 'ahu ma ngo'omo balasu maki-kiḏanga ra munanga, ra munanga 'ami wala ma ngalana ḇato no masebanga i'a awa. 9la awa na siparasaja 'ani 'ahu tubaie toma ngowa'a lelegu, re 'ani 'umuru ma giḏanga toma ngowa'a manga 'akala cira. 10La awa 'ani harata ngowa'a lelegu ya oromo simoini, re awa 'ani galasau'u ma duduala ma hasili 'i osama toma ngowa'a manga wala ga'a na'u nana'o ua. 11Ma ḏo-ḏogumu tala ngana 'ani 'akala re sinyingara susa, na'o 'ani lese 'i 'uisi sababu si-siḏi. 12Ḏua ngana no kanau, <<'Ah, i'a sa'olo ngoi to emono do-doto'o re to oḏu'u sanga ḇangata? 13I'a sa'olo ngoi to 'isene ua 'ari guru-guru, re ta mete'e ua ananga manga do-doto'o. 14Ngoi sa'i to eta'a toma bodito lamo'o, re sa'i sipula'a mara'a toma ngowa'a repe manga momina.>>
15Sababu gena-ge, pa'i tani were'a ḇato ngana nimi pake, re pa'i tani were'a ḇato no masa-sanangi. 16I'a sa'olo ngana ma tero ḇanyo ga'a pa'ala lea ḇato, i'a sa'olo no otu ra ngo guna ḇato. 17'Ani lese gena-ge pa'i di'a tani were'a masiretene, awa ni sipula'a toma we-were'a lelegu. 18Sababu gena-ge, ngana no masa-sanangi tani were'a masiretene; no disa 'ani 'akala re sinyingara ma sanangi pa'i tani were'a ma dutu ḇato: 19munanga lai mo rousu, ma tero manjanga were'a ma mosolese. Sieanga i'a, 'Ami lese ma duhu ma rousu 'i si'a'a ngana no pona, sieanga i'a, 'ami dadalara 'i si'a'a ngana no waro gogare riwara. 20Hai, 'ari ngowa'a nau'u, i'a sa'olo no nyafusu we-were'a su-sudala, di'a 'oru no otu reo were'a nakala? 21Sababu Ma JOU 'a oḏi'i mo-moini unanga 'ai 'ahu ma ngo'omo, Toma ngi'i le'a ḇato unanga 'o tagi Ma JOU 'a waro. 22Ngowa'a kajahatana 'o sanga cako'o tai ga'a ma jira, unanga 'o sado tai ḏosa ma jojoḏi masiretene. 23Ngowa'a 'aḏi sengene sababu 'aḏi dawongo do-doto'o ua, re sababu ananga gena-ge manga haga ma lamo'o, ananga 'aḏi iranga ngo'omo.
Currently Selected:
Dolabololo 5: SAJ
Highlight
Share
Compare
Copy
Want to have your highlights saved across all your devices? Sign up or sign in
2025 Indonesian Bible Society (LAI)