Dolabololo 6
6
Duga re domolo ma lelegu
1Hai 'ari ngowa'a nau'u, na'o ngana reno jaji tuusu 'ani ḏagilomu 'ai binyatoro, re no jaji pula'a bau pipisi toma ngowa'a lelegu,#6:1 ngowa'a lelegu bolo ngowa'a tagi-tagi ino 2na'o ngana 'ani demo-demo ri palisi'i, re no mabiḏi yoḏu'u tani jaji gena-ge, 3Dadi 'ari ngowa'a nau'u, ngana reno eta'a ra unanga 'ai giama ma dara: Sababu gena-ge no 'a'a so'o ne: tagi re no masila-lamo'o ra unanga, la unanga 'o sibebasa ngana. 4Na simaha awa 'ani la'o 'i ruutu, re 'ani la'o ma eno'o 'i damunu. 5Na sieanga 'ani lese ma tero manjanga 'i palasara toma ngowa'a manga jojoḏi, re ma tero namo 'i wiḏi toma da-daiti,
6Hai pamalasa no tagi toma bifi, re na totoho enanga ma 'ahu, re no madoto'o enanga duhu: 7Kalaha kama bi-biri'i ua, kalaha kama si'aturu mai cua, bolo ga'a sioḏi'i mai cua, 8enanga 'i sidodahe ngo-ngoromo toma 'orasa ngogoro, re 'i lomu ma dofoma toma 'orasa gutu'u, 9Hai pamalasa singadolo ngau ngana no otu? Ngau kara ngana no momi'i? 10<<Otu ceka'a ua moju, kakadungu ceka'a ua moju, ma saba'aḏu ceka'a ua moju di'a masibatongo,>>#Dol. 24:33 11ḏua 'ahu ma dinga'unu ua 'i sapolo ma tero sa'olo ngowa'a ra-rabasa, re 'ahu ma ngadolo ua 'i sapolo ma tero ngowa'a ga'a gasa sanapanga. #Dol. 24:34
12Ngowa'a ma pa-pake ua re ngowa-ngowa'a kajahatana ga'a 'aḏi siare manga sa-sakala toma ngi'i le'a ḇato. 13Toma 'orasa unanga 'o mau sa-sakala ngowa'a, unanga 'o coḇi 'ai la'o re 'o sipula'a nana'o rai rou re 'a sijumu rai giama ma rarag̱a. 14'Ai 'akala romanga reo sa-sakala, 'ai fikirana ma sanga pa'i 'a'a kajahatana, toma ngi'i le'a ḇato unanga 'o 'a'a ngowa'a 'aḏi ma'u tolabe. 15Sababu gena-ge kage-kage ananga 'aḏi sanga bahala, pa'i ma soi moi ḇato ananga raḏi wejere singadolo sidiai mai ri yoḏu'u.
16-19Rema ngowa'a 'age nga ḏurama bolo nga tumudingi ga'a Ma JOU ya'u emono gena-ge:
ngowa'a ga'a manga la'o ogoro ua,
ngowa'a ga'a manga yai'i ma sa-salanga,
ngowa'a ga'a 'aḏi sisengene ngowa'a kamanga sala ua,
ngowa'a ga'a 'aḏi mafikiri pa'i 'ori i'a ma jira,
ngowa'a ga'a manga rou jau-jau 'i si'a'a kajahatana,
ngowa'a sakisi ga'a kamanga togumu ua 'aḏi kanau sa-sakala.
re ngowa'a ga'a 'aḏi si'a'a ngowa'a gia nongoḏu 'aḏi ma'u tolabe.
Duga re domolo mangale su-sudala
20Hai 'ari ngowa'a nau'u, na si'a'a 'ani ḇaḇa 'ai parenta, re sidaioranga awa 'ani ngina mi duga re domolo. 21Na 'elingi tau-taunu manga demo-demo, na gogono tani 'akala re sinyingara ma dara, na sikole tani camala. 22Na'o no tagi, enanga ḏuanga i'a 'i sinyanyasele, na'o no otu, enanga ḏuanga i'a 'i jaga, na'o no momi'i, enanga ḏuanga i'a 'i pula'a duga re domolo ma la-la. 23Sababu parenta gena-ge ma tero lapuru, re do-doto'o gena-ge ma tero tarangi; manga ḇangata ra ngana gena-ge 'i sila-la 'ani 'ahu ma ngo'omo, 24dadi so'o gena-ge 'i sikiḏanga ngana toma we-were'a ma jira, re toma we-were'a lelegu manga bo-baja. 25Awa ngana; 'ani 'akala ma dara 'i nyafusu 'ami jamani ma rousu, awa ni 'akala 'i daene 'ami la'o ma gonara. 26Sababu di'a we-were'a sudala pa'i 'o roti jule moi ḇato, mada'a sala ngowa'a manga were'a ma bo-bangu 'o nyawa.
27Sanga le'a ngowa'a 'aḏi gasa u'u tamanga baju ma dara manga baju 'i ro'u ua? 28Bolo nyengara ngowa'a 'aḏi tagi toma u'u ma ngaboso ma re'u manga rou ro'u ua? 29So'o gena ḏi'i ngowa'a ga'a sala ngowa'a lelegu manga were'a; matengo ua ga'a si'a'a so'o gena-ge 'o wiḏi toma hukumu. 30Sanga le'a ngowa'a to-tori'i matengo, ngowa'a 'o sipula'a mara'a ua, na'o unanga 'o tori'i sababu 'o sawini. 31Re na'o unanga sanga cako'o, unanga balasu 'a fangu sidu'o soi tumudingi; sababu gena-ge unanga 'ai harata 'i iranga. 32Ngowa'a ga'a 'aḏi 'a'a tinikai, ananga ga'a manga 'akala cua; ngowa'a ga'a ya si'a'a so'o gena-ge 'aḏi sijira manga diri masiretene! 33Unanga ḏua 'o sanga sikisa re ngowa'a 'o sipula'a mara'a. 'Ai lomanga 'i camari kasingado-ngadolo i'a. 34Sababu na-nau'u matengo 'o hamu unanga 'o dadi ruta madutu, re wakutu unanga 'o balasa 'o sijumu ua 'akala re sinyingara ma la-la;#Dol. 27:4 35unanga 'a dawongo ua 'o du-duusu 'oru ḇato, re unanga 'a ngali ua 'ai 'akala ma de'e, kalaha 'ani bu-bula'a lai repe masala.
Currently Selected:
Dolabololo 6: SAJ
Highlight
Share
Compare
Copy
Want to have your highlights saved across all your devices? Sign up or sign in
2025 Indonesian Bible Society (LAI)