NƲNƲLI 1
1
Zezwi nɛ ɔ ji ɔ 'wʋbhlinɩngwa Zuzu 'Wlawla 'yuo 'pa
1Teofilɩ, -ma taka -bɔgʋ n -pamö-a 'wʋɔ 'mö, -ɩ la'a 'bhuo Zezwi nʋ-a, -ɩ ɔ 'pa-a nɩkpa ngli, la ɩ tɛnɩ-a, -bhaa gbʋ n gba la -bha. 2Tɛnɩ -bha -n 'yɛ zlɩ -ɛɛ 'mö -Lagɔ 'libhïɔ-a 'wʋ ghlɩ, Zuzu 'Wlawla gbanɩɔ-a 'mö ɔ tiatiangwa ɔ -sa la-a -bha, ɔ kʋa 'dɩ 'mö zʋ 'bhë 'n ɔ ji-a mö. 3Ɔ tlɩ-a ɔ 'wlʋ-a glu, 'mʋa ɔ ghlanɩ-a 'wʋ. -Ɩ wa 'kɔ-a 'mö jɩblɩnɩ, 'n ɔ jua-a ɩ -gɔpöö -bɛ 'ji tuluanɩ. 'Ylɩɛ gwlɩ 'sɔ 'mö, -Lagɔɔ nyininyinipɩɛ gbʋ ɔ gba-a wa de. 4'Ylɩ -bhlʋ, ɔ -nyʋa 'sɔ-ɔ li 'le, 'n ɔ jua-a 'dɩ 'mö zʋ naa, wa 'na-a 'pa wajɩ Zelwizalɛmöö 'gbë yawʋ nimï -nɩ, -ʋ -Tɩbha -Lagɔ nʋ la-a ʋ jua 'nyɛɛ -ʋʋ gbʋ ɔ gba la-a wa de, wa -kʋnʋʋ. 5Ɔ nɛ: “-Wʋʋ yɛ-a, 'nyu nya Za badizenɩ la-a nɩkpa, abhaa -nɩ-ɛ, 'ylɩ ja la'a 'mö, -Lagɔ jiya Zuzu 'Wlawla nya badizenɩ.”
Zezwi yɛ -Lagɔ 'wʋ mö
6Wa 'titanɩɔ -bha ɔ yawʋ 'wlu 'n wa jio-a ngli 'jɩbha naa: “Nyininyɔ, -bha -n ji-a Izlayɛlɩɛ ngëyi tʋngwa -gömö -saa, ɛ 'yɛ ɛjɩ nyini-e?” 7Ɔ nɛ naa: “Zlɩ na -Tɩbha -Lagɔ -sa-a -bha, 'bhë la ʋ -dɩ-a, abha 'nɩɩ-ɩ -jie ji. 8Zuzu 'Wlawla kaya -gömö ji, 'mötɛnɔ a ji-a ghlɩɛ, a 'yɛ-a na 'dɩɛ -sasangwa zʋ, ma'a Zelwizalɛmö, -ma Zwidee dʋdʋ 'bhuo -gömö, -ma Samalie dʋdʋ 'bhuo -gömö, 'bhë a 'yɛ -ma dʋdʋkpataa këti 'bhuoo -gömö nyini.”
9Zezwi zʋʋa-a sa'a 'dɩ 'mö 'bhë, wa -wʋ-ɔ jɩla 'le, 'n ɔ ji-a ghayɩ mö, 'n gbiluko jua-a 'ji zizanɩ. 10Ma Zezwi -wʋ-a -Lagɔ 'wʋ mö 'le, wa 'jie-e -bhla -ma, 'gamö, 'n nɩkpa sɔ-ɔ ka-a -banɩ 'pʋpʋɩ 'mö ji-e -bha wa yawʋ ghlanɩ. 11Wa nɛ: “Galilee nɩkpayi, 'manɩɛ yɛ a 'nɩgbö bhe la'a 'n a -wʋ-ɔ -ma ghayɩ jɩla 'le 'nɩ? Zezwi la'a -ɔ 'wlʋya-a -la 'gbamö, sa a -wʋɔ-ɔ -la jɩla 'le 'n ɔ ji-a -Lagɔ 'wʋ mö-ö, -sɩbha ɔ ji-e -ma 'ylɩ -bhlʋ 'bhönɩɛ ɔ 'yɛ nimï ji.”
Zezwie 'wʋbhlinɩngwa yɛ 'wlu -titanɩɛ mö
12Zezwie tiatiangwa 'bhö-ö -ma Olivieswie -gɔgɔgbʋ 'klʋ, 'n wa ji-e -ma Zelwizalɛmö nimï mö. 'Bhö-ö -bha -gɔgɔgbʋ la'a 'klʋ -n 'yɛ Zelwizalɛmö mö, kilo -bhlʋ -bha ka -bha. 13Wa nyini-e -ma, -budu -ʋʋ ghayɩɛ 'köbhë 'mö wa glɩnɩ la-a 'kɔmʋʋ, 'n wa ji-e -ma mö. Piɛlɩ-ɛ, Za-a, Zakö-ö, Adle-e, Filipö-ö, Toma-a, Batlemi-e, Matie-e, Alɩfee 'gu Zakö-ö, Simo -ɔ -wʋ la-a -tɩtɛ-ɛ -ma 'bhugwiee ghayɩpangwaa -zakpa 'mö, 'bhë Zaköö 'gu Zwidɩ, mʋa-a -sɩbha. 14Wa 'bhuo mlinɩ dlɩ 'mö, 'n wa pa-a -Lagɔ -bɛlɩ 'kɔmʋʋ, wa -yɛ ngwlɩ -mʋmʋa 'sɔ, Zezwie -da Mali -yɛ Zezwie -dagwie kökamö.
Wa yɛ Zwidaa 'bɩpalɩnɩnyɔ -bha -sa
15'Ylɩ -bhlʋ, Zezwie -ganɩngwa -wa 'titanɩɔ-a 'wlu nyini gwlɩ -ngbʋpʋlʋɔ swɩ. Ɔ tiatianyɔ Piɛlɩ 'nɩgbönɩ-ɛ -bha wa 'bhuoo nyɩdɩ ghayɩ ɔ nɛ naa: 16“-Dagwieyi, Zuzu 'Wlawla gbanɩ-a -benyido'o Davidɩ 'mö -ɩ wa 'cɛlɩ-ɛ -ma -Lagɔwɛlɩɛ 'bɔgʋ 'mö Zwidaa yɛ naa: Mɔ-ɔ ji-a Zezwie köbhaköbhangwa 'yu -ganɩɛ ɩ yɛ 'wʋ 'wlenɩ 'bhë. 17-Ma -aa 'gbamö ɔ -wʋ la -bha, sa Zezwi -saya-a -bha -a 'yɛ ɔ tiatiangwa glɩnɩ, -sɩbha ɔ -sɔɔ la 'yɛ-ɛ -bha -nɩ. 18Ɔ 'kuëlɩbhamëni la'a wa 'pɛnɩɔ la-a, 'mɛ ɔ pɩa-a 'lagblɛ 'mö. -Ma 'lagblɛ la'a 'wʋ ɔ bhlinɩ-a 'wlu 'n ɔ ji-a dlɩ wʋlɔ, 'n ɔ 'mlɩɛ 'mwɩ ji-a sɛ 'suluo. 19Zelwizalɛmöö nɩkpa 'bhuo -ji ɩ bhle'ee yɛ wa 'pa-a -ma wa 'bhigbʋ 'mö 'lagblɛ la'a Akɛlɩdama, ɩ zɔmö -yɛ-a dluo 'lagblɛ. 20-Ma ɩ 'mö, sa'a ɩ 'cɛlɩɔ-ɔ -ma -Lagɔɔ bhlɩnɩlʋɩɛ 'bɔgʋ 'mö naa:
Ɔ 'ligbë zʋ -glɔgba,
-bɛ 'na-a glɩa 'wʋ yɛ -nɩ.
Sa'a ɩ 'cɛlɩɔ 'yɛ-a naa:
Nɩkpɛ -mʋmɔ 'libhï ɔ 'bhle 'wʋ.
21Ɩ yɛ, la -a -yɛ Nyininyɔ Zezwi 'sɔ -bhlinɩ la-a 'wʋ, nɩkpa -wa -ganɩya la-a, 22tɛnɩ Za Badizɩɛ nɩkpaa badizede -n 'yɛ zlɩ -ɛɛ 'mö ɔ mö-a -Lagɔ 'wʋɔ de nyini -wa yɩlɩ-ɛ -bha-a, wa gla'aa nɩkpɛ -bhlʋ -jiya-a gla'a pla ɔ 'yɛ Zwidaa 'bhle 'wʋ 'libhï -a -nyɔɔ 'sɔ 'yɛ Zezwie gluwlʋdɩɛ -sasangwa glɩnɩ.” 23Piɛlɩ gba-a sa'a, wa -sa-a -bha nɩkpa 'sɔ. Zozɛfö wa la-a Balɩsabasɩ, wa 'pa 'yɛ-a Zwitisɩ, ɔ -yɛ Matiasɩ 'sɔ. 24'N wa ji-a -Lagɔ -bɛlɩ 'pa, wa nɛ: “-Aa Nyininyɔ, -nmö -ji-a nɩkpa 'bhuoo dlɩa, ɩ yɛ -bha -wa la'a 'sɔɔ gla'a -ɔ -n -sa-a -bha, tuluo 25ɔ 'yɛ -ma -abha Zezwie tiatiangwa gla'a pla, 'bhle Zwida tɩ-ɛ -bha, ma ɔ 'jɩbha la-a 'n ɔ ji-e -ma mö, ɔ 'ka 'wʋ 'plɩnɩ.” 26Wa 'pa-a -nɩgbɩ 'n ɛ ji-e -bha Matiasɩ -sa, 'n ɔ ji-a Zezwie tiatiangwa kugbïa 'sɔ -lɔ panɩ.
Currently Selected:
NƲNƲLI 1: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
